Apocalipsis 1

1Bee ninguie' neca nú ulube' Diose lu Jesucristo para nú le'ca scua lube'nue lubee bene'nu, para nú ri'i beella beya' lubee nú yamero nzu aca. Nu Jesucristo uxe'lanu tucu ángele'nu para nú lube'nu bee nucua' lua, li'á Juan enu sibi' lunu, 2nu li'á rniá ye nú neli neca equie cuenda' Stichia' Diose, cuna equie cuenda' Jesucristo nu equie cuenda' ye nú ulañilaa. 3Nza nze'cae equie cuenda' bene enu rula ichi' quie' nu equie cuenda' bee bene enu riene' nú xi rnii nu cuna equie cuenda' bee bene enu rri'i casoe, nu rixiule'e nú xi nzu aca, xne nze'ta riñala tiembu nú aca bee nucua'. 4Li'á Juan rquie'a carta quie' luhua li'ihua bee enu neca bee bene' Jesucristo, li'ihua bee enu nucua'a lu achi eyeche nú nchiucu' lu iliu Asia. Pa'ahua Diose, li'inu enu neca Diose hasta chenu uquixie iliulabe, nu nee nu diqui tiembu. Nu lu achi espíritu enu nucua'a elu rnibiya'nu nu Jesucristo cuna bee espíritu cua' ri'i beenu nú cha nze'cae lu cuenda'hua nu ri'inu nú nzuxe arqui'hua. 5Nu Jesucristo enu neli uni nú neli neca, li'inu enu rluti uhuañi lu eluti nu li'inu rnibiya'nu lubee bene enu rnibiya' lu iliulabequie'. Li'inu secanu lia'ahua nu cuna rene'nu uchilanu stula'ahua, 6nu uri'inu nú unga tucu necatse'ahua cuna poder nú rlu'cunu, nu le'ca uri'inu nú neca'ahua ule'ya enu sibi' lu Pa'nu Diose. ¡Nu lunu riala lu'cu bee bene ula'na, li'inu enu rlu'cu elurnibiya' diqui tiembu! Amén. 7¡Ubi'yacuruhua nú nze'tanu leta xcabe! Ye bee bene lañi' li'inu hasta bee bene enu utse'e lanza cue'tsenu nú ungutinu lañi' zeca' beei li'inu, nu ye bee bene iliulabe chiqui' una' chenu lañi' beella li'inu, neli nucua' scua acane. 8Pa'ahua Diose enu rlu'cu ye elurnibiya', li'inu enu neca Diose hasta chenu uquixie iliulabe nu nee, nu nze'tanu, li'inu uninu equie cuenda'nu: “Li'á neca xi neca letra A nu Z”, nú rquixie nu rlaxu, xne tucutsia li'á rnibiya'a. 9Li'á Juan neca tucu bene enu nzeli arqui' Jesucristo tucu nú nzeli arqui'hua. Nu tucutse rnibiya' Jesucristo lua'ahua, nu tucutse nehuana se'ca'ahua nu rriquia'ahua equie cuenda'nu. Li'á unga preso equie nú rixiule'a stichia' Jesucristo cuna ye lunú nediyaa equie cuenda'nu, lu tucu yuu nú lee Patmos netse lu inzatu'. 10Chenu necaa preso lu yuu inzatu' ze'e, tucu domingo diquila nú rnacua lu Diose ulle'ca xi neca nú rni xcala'a equie cuenda' poder' Espíritu Santo, nu enza di'chia ubenea tucu chii nú neca xi neca chii tucu trompeta nú chiqui' fuerte urixia, 11nú uni: ―Li'á neca xi neca letra A nu Z nú rquixie nú rlaxu uquie'e ye beenú rlañi'lu lu tucu ichi' nu uxe'la ichi' quie' lu achi xcua'a bee benea enu nucua'a lu iliu Asia, lu eyeche Efeso, Esmirna, Pérgamo, Tiatira, Sardis, Filadelfia, nu Laodicea. 12Nu chenu ubelletaa nú ri'ya nú ti rni lua, che ulañia achi candelero de oro, 13nu labe bee candelero ze'e ulañia tucu bene enu rna xi rna bene enu uxe'la Diose lu iliulabe, nu nutunu tucu laquie nú stuñi nú rriña hasta e'yanu, nu nu' tucu sinchiu latsanu. 14Niquichiu ichia equienu tucu nú niquichiu ichia tetsu' sanchi nu xi niquichiu iqui, nu rulu siqui' i'culunu xi rulu quii. 15Nu cuchiu'nu rulusiqui' xi rulu icu' nú lee bronce chenu netse lu quii, nu fuerte chinu xi fuerte nú rula inza nú huaxi rlaca ru'u quiee. 16Yanu chube nzenenu achi belaa, nu ru'unu xiu'u tucu espada nú chiqui' nelatsa rucu ru'u, nu lunu rulusiqui' tucu nú rnaa bichia chenu juerte rulusiqui' bichia. 17Chenu ulañianu uyecata e'yanu xi uyecata tucu bene enu unguti. Pero uricu'nu yanu chube equia nu uninu: ―La lliquilu, li'á neca enu rnibiya' hasta chenu uquixie iliulabe nu lalaxu nú rnibiya'a. 18Li'á ungutia, pero nee nehuañia, nu nehuañia diqui tiembu, nu li'á rnibiya'a lu eluti cuna lu ebila. 19Nee uquie'e, lunú ulañi'la'lu nu lunú rlañi'lu nee nu lunú nze'ta lañi'lu. 20Rluti ixiule'a lunú neca equie cuenda' achi bee belaa enu ulañi'lu yaa chube nu xi rni lu cuenda' achi candelero nú necache' oro: Equie cuenda' achi bee bela cua' rni equie cuenda' achi bene enu rnibiya' lu achi xcua'a bee benea lu iliu Asia, nu lu achi candelero rni equie cuenda' achi xcua'a bee benea.

will be added

X\