Filipenses 4

1Bee sa'a enu nzeli arquia'ahua Jesucristo, chiqui' se'ca li'ihua, nu niarquia nzelabi'ya li'ihua, xne li'ihua rri'ihua nú ñia nzu arquia nu necahua xi neca tucu premio para li'á, utsuta' arqui'hua nú nzeli arqui'hua Jesucristo. 2Zequiea lu Evodia, cuna lu Síntique nú aca tucunecatse elliebacu' beella equie nú tucutse nzeli arqui'beella Jesucristo. 3Le'ca zequiea lulu sa'a enu junto rixiule'a Stichia' Diose, nú ri'ilu faura ri'ilu elietsa lubee una'a quie, xne uri'ibeella elietsa lua nú udixiule'eru stichia' Jesucristo, cuna Clemente nu beelá bee sa'ahua enu uri'i elietsa lua. Nu nzucu ichila nombre' beella lu libro' Diose liñibe elu huañilí bee bene. 4Nia luhua nú siempre ñia utsu arqui'hua equie nú necahua bee bene' Jesucristo. Nia luhua stucu bese nú ñia utsu arqui'hua. 5Ula'nahua nú ye bee bene ri'i beya' nú ñia nze'cahua, lu ye bee bene, xne la lea' nú riña zeca Jesucristo lu iliulabe. 6La chenu arqui'hua lu ni'tucu nú secahua. Sino que una'cu'tsaiahua lu Diose luye nú secahua nu la zañi'hua nihua che'tsa lunu chenu rnacu'hua lunu. 7Nu liqui' Diose nú nzuxe arquia'ahua nú lecati ri'i beya' nu chiqui' llene necane. Nu lunú nzuxe cua' ri'i elietsa luhua para nú nzuxe elliebacu'hua lunú necahua bene' Jesucristo. 8Ante nú laxu quie'a carta quie' nia luhua bee sa'a enu nzeli arqui' Jesucristo, nú ri'ihua elliebacu' lunú neli neca, nu uri'ihua elliebacu' lunú riala ula'na, nu uri'ihua elliebacu' tucu nú necane, nu uri'ihua elliebacu' lunú sibi' riu' arqui' Diose, nu lunú ri'i elietsa luhua nú ri'i nze'cahua, nu lunú riala ri'i tucu bene enu nehuañi nze'ca, uri'ihua elliebacu' nú riu' arqui' Diose bee bene. 9Uri'ihua tucu nú uzetela li'ihua, tucu nú ulubela luhua nú ri'ihua, uri'ihua tucu nú unila luhua nu uri'ihua tucu nú ulañi'la'hua xa uri'á, nu scua ri'i Diose elietsa luhua li'inu enu rliqui' nú nzuxe arqui' bee bene. 10Chiqui' ñia nzu arquia lu Jesucristo nú ullu'cu' zeca arqui'hua li'á. La nia luhua nú uzañi'hua li'á sino que necane nú lá lu'cuhua xneca modo axe'lahua elietsacua' lua. 11La nia luhua nú xi se'cala'cha'a xne nu'beyalá tunu rlu'cua nú rlu'cua urre la lu'cune. 12Nu'lua nú nehuañia lu elitsi nu nu'lua eluxene. Pero nu'beyalá nú rriquia xnecatse sianú neela urre rlia'naa sia nú sucu sobra nú rlu'cua urre rri'i faltae. 13Pero recaa nehuañia xnecatse equie nú rri'i Jesucristo elietsa lua. 14Pero uri'inze'cahua nú uxe'lahua elietsa cua' lua nee nú rqui'ñiane. 15Li'ihua bee bene Filipo nediya'hua chenu uchiu'a lu iliu Macedonia, para nú uquixia udixiule'a stichia' Jesucristo li'itsiahua uri'ihua elietsa lua, nu lecati beelá bee bene enu uri'i elietsa lua, nu tucu nú uri'á elietsa luhua nú uyu'uluhua Jesucristo le'ca scua uri'ihua elietsa lua. 16Le'ca chenu nzucu'sca'a eyeche Tesalónica, uxe'lahua elietsa lua chiucu chuna bese para nú ri'ihua elietsa lua lunú xi rqui'ña. 17La la'naa nú xneca modo ri'iláhua elietsa lua sino que lunú niarquia necane nú cha nze'caláhua lu Diose. 18Uyucu' cuendalá ye elietsa nú uxe'lahua lua ya Epafrodito. Nu nee hasta sucu sobrae. Para li'á nú uxe'lahua lua necane xi neca tucu nú ñia rlia urre xi neca tucu u'na nú riu' arqui' Diose. 19Nu Diose liqui' ye nú xi rqui'ñahua equie eluxene nú rlu'cunu liñibe cuna Jesucristo. 20Nu riala nú yebee bene lu'cu ula'na lu Pa'ahua Diose diqui tiembu. Amén. 21Uri'ihua saludar yebee bene' Jesucristo lu cuendaa. Nu le'ca yebee bene' Jesucristo enu nzunua ca'a xe'labeella saludo luhua. 22Le'ca yebee bene' Jesucristo enu rri'i riña' lu arre Roma nu cuna yebeelá bee bene' Jesucristo xe'la beella saludo luhua. 23Nu Jesucristo enu rnibiya' lua'ahua li'inu ri'inu nú cha nze'cae lu cuenda'hua. Amén.

will be added

X\