Filipenses 3

1Bee sa'a enu nzeli arquia'ahua Jesucristo ñia tsu arqui'hua cuna Jesucristo, la llaca nú nii zecaa bee bedichia' nú unilá luhua, xne neca nze'ca nú ni zecane luhua para nú lecati zequienu li'ihua. 2Ubi'yahua li'ihua lubee bene enu necha neca, nu lubee bene enu necha rri'i, lubee bene enu rri'i juerza bee bene nú quie seña elunecahi' bee bene xi rquie seña elunecachi' bee bene Israel. 3Xne bee bene enu neli nequie seña' Diose neca lia'ahua bee enu rlu'cu ula'na lu Diose, xne nzu Espíritu Santo cuna lia'ahua, nu ñia nzu arquia'ahua lunú neca'la'ahua bene' Jesucristo, pero la necane nú nzenala'ahua bee custumbre nú rri'i bee bene Israel. 4Añinzuca nú rlu'cua resuna nú nelliñiaa, equie ye beenú uri'á, pero tunu nu' bee bene enu nelliñia equie cuenda' nú xi rri'illa, pero li'á máse rlu'cua resuna nú nelliñiaa. 5Xne chenu uza' xunu bichia nú ungulaa uquie seña elunecachia nú necaa bene Israel nu necaa lli'ñi aca tuxie Benjamín, rnia dialu Israel xne neca bene hebreo, nu uri'á ye nú rnibiya' ley nú ri'á, xne unga fariseo. 6Uri'á tucu nú rni ley, nu hasta necha uri'inua bee bene enu nzeli arqui' Jesucristo, hasta nú lecati né uxanabitsi nú lá ri'á tucu nú riala ri'á xne nzie' nú rni ley uzucua. 7Ye beenú uri'á tiembu ze'e chiqui' unga neca equiee ulle'ca, pero nee la neca equie'ae para li'á, xne nee Jesucristo neca enu máse neca equie para li'á. 8Nu para li'á lecaxi stucu nú mase seca luquela nú nzeli arquia Jesucristo, nu equie cuenda'nu ye nú uri'á hua'tu uhuachulane, nu necane xi neca ixi para li'á para nú nibiya'li Jesucristo lua, 9nu aca tucutsia cuna li'inu. Nu la lu'cu cuendaa nú equie nú rri'á tucu nú rnibiya' ley nú la lu'cua'a dula lu Diose sino que rlu'cu cuendaa nú equie nú nzeli arquia Jesucristo la lu'cua'a dula lu Diose. 10Niarquia chululá equie cuenda' Jesucristo, nu niarquia nú lu'cua poder nú ulu'cunu, nú ulu'cunu chenu uhuañi zecanu lu eluti, nu riquia xitse nú nehuana zeca tucu nú uriqui'nu, nu zela nú atia tucu nú uzelanu. 11Lunú nzuta' arquia nú huañi zecaa lu eluti tucu nú uhuañizecanu. 12La nia luhua nú uri'ilá ana uri'á yeene, urre neca bene nze'ca, pero rla'na nú nzeri'ilá tucu nú niarqui' Jesucristo nú ri'á desde bichia nú uyu'uluanu. 13Bee sa'a enu nzeli arquia'ahua Jesucristo, nia luhua nú lasca' ri'a ana nú zucua yeene, pero ye nú uri'á hua'tu uzañiláne, nu nee rri'itsia elliebacu' nú nze'tala, 14para nú ri'á yeene tucu nú rialane, para nú atia premio nú liqui' Diose lua liñibe equie nú nzeli arquia Jesucristo. 15Ye'ahua enu rri'i nze'cala beya' Stichia' Diose, rqui'ña nú ria'ahua elliebacu' scua nu tunu nu'ta enu rri'i elliebacu' nú lacane scua, Diose dete' elliebacu'lla para nú úri'illa beya' xa necane. 16Pero rqui'ña nú huañi nze'ca'ahua tucu nú rri'ila'ahua beya' nú riala huañia'ahua. 17Bee sa'a enu nzeli arquia'ahua Jesucristo, uhuañihua tucu nú nehuañiaa nu le'ca ubi'yahua xneca nehuañi bee bene enu nehuañi tucu nú nehuañiaa. 18Xne huaxi bese unila luhua, nu nee hasta runa rnia luhua nú nu' huaxia'ahua bee enu nehuañi xi nehuañi bee bene enu lachili arqui' para nú xi nú unguti Jesucristo lu cruse. 19Nu' bee bene cua' nzuquietsia castiya li'ibeei xne rri'ibeei puro beenú necha neca nú nu' ana arqui'beei ri'ibeei, luhuare nú tu'beei a'la mase reca nelliñiabeei equie nú mase rri'ibeei elliebacu' lubee nú nu' lu iliulabe quie'. 20Pero lia'ahua liñibe neca elu chua'ahua, nu enza liñibe nellua'a quie'ahua nú nze'ta zeca Jesucristo li'inu enu utsila'ala lia'ahua. 21Nu li'inu che'enu cuerpo nú rlu'cua'ahua nee para nú aca cuerpo'ahua xi neca cuerpo'nu nú ñia naa rlu'cunu liñibe, nu scua ri'inu equie nú rnibiya'nu lu yeene.

will be added

X\