San Mateo 7

1’Nu la ze'tahua sa'hua para nú lecati ze'ta li'ihua. 2Xne tucu nú se'tahua bee bene, le'ca scua ze'ta bee bene li'ihua, nu tucu nú rri'inuhua bee bene le'ca esquie ri'inu bee bene li'ihua. 3¿La ze'tahua beelá bee bene lunú lle'natsia rri'i beella, nzalá nú uyanu arqui'hua lunú llenelá falta nú rlu'cuhua? 4Nu tunu llenelá falta nú rlu'cuhua, ¿xa modo nihua lu stucu bene: “La neca nze'ca lunú rri'ilu scua”? 5¡Bene enu nequichia'! Rluti uri'i tucu nú necane, che nu' modo nilu lu stucu bene la yala nú ri'ilu scua. 6’La ri'ihua juersa bee bene enu la niarqui' ri'i caso lunú neca cuenda' Diose, para nú lecaxi ri'inu beei li'ihua. Xne tunu ri'ihua juersa beei, neca nucua' xi neca chenu si'qui bene tucu nú necachi neca lu nicu. Le'ca la ri'ihua juersa bee enu la yu' arqui' lunú neca cuenda' Diose. Xne tunu ri'ihua juersa beei, neca nucua' xi neca chenu rdu' bene tucu nú huaxi seca lu cuchi nu tse tsiaí equiee. 7’Una'cuhua lu Diose che liqui'nu lunu rnacu'hua lunu, ula'nahua li'inu nu che llela'hua li'inu, uzequiehua lunu che ri'i casonu li'ihua. 8Xne bene enu rnacu' nú rnacu' lunu yucu nze'ene, nu bene enu rla'na Diose llela' nze'e li'inu, nu bene enu rnacu' nu sequie lunu, ri'i casonu nze'e. 9’¿Xie' nu' ta tucuhua enu dete' quiee acu endu' chenu nacu' endu'hua pa acu la? 10¿Urre xie' dete'hua tucu be'la acu endu'hua chenu rnacu' endu'hua bela acu endu'hua la? 11Li'ihua enu la neca bene nze'ca, nu'luhua rdete'hua nú neca nze'ca lubee endu'hua, ¡enzaláquie' Pa'ahua Diose liñibe nú la liqui'nu nú neca nze'ca lubee bene enu rnacu' nucua' lunu! 12’Uri'ihua lubee bene tucu nú niarqui'hua nú ri'ibeella luhua. Xne scua rnibiya' ley' Diose cuna ye beenú uquie'e bee profeta'nu. 13’Uyu'uhua ru'u puerta nú nuxu' neca. Xne ru'u puerta nú llene neca, nu inziu nú llene neca, nucua' neca nú ruya' li'ibee bene lu inziu nú necha neca, nu huaxi bee bene nza inziu cua'. 14Pero puerta nu inziu nú ruya' bee bene lu elunehuañi me'e nu nuxu'e, nu la huaxi bee bene enu nza inziu ze'e. 15’Le'ca ubi'yahua li'ihua lubee bene enu li'á rnibee nú neca beei profeta' Diose, nu rri'i beei nú lle'na arqui'beei, pero scuatsia rri'ibeei para nú sequienu beei bee bene, nu chiqui' necha rri'i beei. 16Pero li'ihua ri'ihua beya' nú xa neca bee bene cua', lunú rri'i beei rixiule'e núti neca beei, xne la ayu cuchiu' lube' lubee aca eche, nu la ayu higo lubee huañi eche. 17Enze'e ye bee aca nze'ca rayu ndixi nze'ca lu. Nu bee aca nu la neca aca nze'ca la ayu ndixi nze'ca lu. 18Leca modo nú ayu ndixi núla neca nze'ca lu aca nú neca nze'ca, le'ca esquie la ayu ndixi nú neca nze'ca lu aca núla neca nze'ca. 19Ye bee aca nú rayu ndixi nu la zibi' lu, rrecu'e nu riu'e lu quii. 20Scua ri'ihua beya' ti neca beella equie nú rri'i beella. 21’Laca ye bee bene enu rni lua: “Detá, Detá”, chu'u liñibe elurnibiya' Diose, sino que chu'utsia bee bene enu sucu' lunú rni Diose Pa liñibe. 22Bichia ze'e huaxi bee bene ni lua: “Detá, Detá, li'iru uniru lunú leelu lubee bene, nu equie nú leelu uluaru bee benechiqui' arqui' bee bene nu equie nú leelu uri'iru huaxi bee milagro.” 23Pero chequie cuaquia lubeei: “Leca xunga uyulua li'ihua, ulluna'hua lua, li'ihua bee bene enu necha uri'i.” 24’Enze'e, bee bene enu riene' stichia'a nu sucu'e, necalla xi neca tucu bene enu netsiña rreche' ni'i equie quiee. 25Añinzuca nú rlaca quiu nu rlaca huaxi inza riu'u tetsu' ni'i ze'e nu reca bii, pero lá rila ni'i ze'e xne nchiucu' simiendu'e equie quiee. 26Pero bene enu riene' nú rnia nu la zucu' stichia'a, li'illa necalla xi neca tucu bene enu netundu enu ureche' ni'i lu eyuxi. 27Chenu rlaca quiubi, nu rlaca huaxi inza riu'u tetsu' ni'i ze'e, che uluquie ni'i ze'e. ¡Nu urilalii! 28Chenu ulaxu nú uni Jesuse scua lubee bene ze'e, chiqui' uyanu arqui' ye beei xneca uzete'nu li'ibeei, 29xne sete'nu beei xi sete' tucu bene enu chiqui' rlu'cu poder, nu la zete'nu xi sete' bee ulaxcuela enu reca ley.

will be added

X\