San Mateo 3

1Tiembu ze'e uyanzee Juan Bautista lu dañi achi lu iliu Judea udixiule'ella Stichia' Diose lubee bene. 2Nu unilla: ―Utsana' arqui'hua stulahua xne nze'ta riñala nú rnibiya' Diose. 3Equie cuenda' Juan Bautista quie', uquie'e profeta Isaías chenu unilla: Uyene chi tucu enu juerte rixiali lu dañi achi elu la nucua'a bee bene nú rni: “Utsu tsiñahua arqui'hua xne nze'tala li'inu enu neca Diose'ahua, utsana' arqui'hua stulahua para nú yucu arqui'hua stichia'nu.” 4Xucu Juan necache'e ichia tsu' camello, nu sinchiu nú riu'u xla'culla necache' iti, nu elubacu nú udaculla neca xe'chiu cuna lliña dañi. 5Nu bee bene Jerusalén cuna ye bee bene lu iliu Judea nu cuna bee bene enu nucua'a axu re'cu Jordán uchiu'u beella, uya beella ubene' beella nú rni Juan. 6Chequie chenu uxucu' dula beella stula beella, urinza Juan li'ibeella re'cu Jordán. 7Pero chenu ulañi' Juan nú huaxi bee fariseo cuna saduceo uriña lulla para nú rinzalla beei, che unilla lubeei: ―¡Li'isihua netsiñahua xi netsiña bee be'la! ¿Ti udixiule'e luhua nú tsila'ahua lu castiya juerte nú axula nzu zeca bee bene? 8Uhuañi nze'cahua para nú aca chee nú neli utsana' arqui'hua stulahua, 9nula aca nelliñahua nú rnihua: “Li'iru nzelaru lu familia' tuxie Abraham”, xne li'á nia luhua nú hasta bee quiee quie' nu' modo nú ri'i Diose nú aca bee familia' tuxie Abraham. 10Nu bee bene enu la zucu' Stichia' Diose tucu nú rialane, li'inu ri'inu lubeella tucu nú rri'inu bee bene aca nú la ayua' ndixilu, xiecu' benene para nú chiquine. 11Li'á, rniaa luhua nú li'á rrinzahua cuna inza xineca tucu seña nú utsana' arqui'lahua stulahua, pero enu nze'ta lulá li'inu rinzanu li'ihua cuna Espíritu Santo nu cuna quii. Li'inu maselá rlu'cunu poder luquela li'á, enze'e ni' nú hua lucunu la yala xne masela neca equienu luquela li'á. 12Nu tucu nú rcuii bene trigo scua ri'inu Diose bee bene. Nu bee bene enu sana' arqui' stula huañi bee nze'e elurnibiya' Diose, nu bee bene enu la tsana' arqui' stula necala nú cha beei lu quii nú leca xunga yala. 13Che uchiu'u Jesuse Galilea para nú nzanu lu Juán re'cu Jordán, para nú rinzalla li'inu. 14Pero chenu uriñanu lu Juan lá zela Juan arinza li'inu, nu unilla lunu: ―Li'ilu riala rinzalu li'á, ¿nu li'á la yala rinza li'ilu? 15Chequie uni Jesuse lulla: ―Uzela nú acane scua, xne mase neca nze'ca nú ria'a ye tucu nú rnibiya' Diose. Chee uzela Juan urinza li'inu. 16Chenu ulaxu nú urinzalla Jesuse, nu uchiu'unu lu inza, tu'natsia uya'la liñibe, nu ulañi'nu nú nze'ta laca Espíritu Santo' Diose xi naa tucu paloma equienu. 17Nu ubene tucu chii enu uni hasta liñibe: ―Li'inu necanu lli'ñia enu chiqui' se'caa, nu ñia nzu arquia lu.

will be added

X\