San Mateo 28

1Chenu udete bichia nú sulachi bee bene, nu chenu uye'e lu yuu zila' domingo. Che uyabi'ya María Magdalena cuna stucu María ru'u eluhua' Jesuse. 2Che tu'natsia unga tucu xú nú juerte, xne ulaca tucu ángele' Diose enza liñibe nu uyabica ángele ze'e ru'u eluhua nu uyucunu quiee nú nacu' ru'u eluhua ze'e, nu uzucunu equiee, 3nu rulu siqui' ángele ze'e xi rulusiqui' lee chenu ria'lane, nu xucunu niquichiu a'quie'e xi nequichi iqui. 4Chenu ulañi' bee sundado enu rriucu ru'u eluhua ze'e ángele cua', chiqui' unga tse'tse' beei nú ulliqui beei, nu uzana' beei lu yuu xi uzana' benenguti. 5Che uni ángele cua' lubee una'a cua': ―La lliquihua. Li'á nediyaa nú rla'nahua Jesuse, enu uquie lu cruse. 6Pero leca'nu ca'a, xne uhuañi zecanu lu eluti tucu nú uninu. Utebi'yacuruhua elu uricu cuerpo'nu ne lañi'hua, 7nu nee chu uquia tixiule'exuhua lubee bene'nu: “Nú uhuañi zecanu lu eluti, nu rlutilánu nzanu lu iliu Galilea, luquela li'ihua nu ze'e lañi'huanu.” Nucua'tsia neca nú rixiule'a luhua. 8Chequie uchiu'u beella ru'u eluhua ze'e, nu xexu'u beella nzuella nzetixiule'e beella lubee bene'nu. Diquitse xiqui beella nu le'ca ñia nzu arqui'beella. 9Chenu nzuebeella ulube'lu Jesuse lubeella inziu nu uninu lubeella. Che uyabica beella lunu nu ulu'cu beella ula'na lunu, nu uchi'chi beella cuchiu'nu, 10nu uninu lubeella: ―La lliquihua. Uquia tixiule'ehua lubee benea nú cha beella lu iliu Galilea, nu ze'e lañi' beella li'á. 11Diquila nú nzubee bee una'a ze'e, le'ca nzubee chiucu chuna bee sundado eyeche ze'e nzetixiule'e beei lubee ule'ya enu rnibiya' lubeelá bee ule'ya luye nú unga. 12Che bee ule'ya enu rnibiya' cua' uyabedichia'nu beei bee usticia' bee bene Israel para nú tucu ricuche'tse stichia' beella, nú xi ri'i beella nu che udete' beella huaxi dimi ya bee sundado, 13nu uni beella lubee sundado ze'e: ―Uni'tsiahua nú rula' chenu ra'tsehua ube'ta bee bene' Jesuse ucachi' cuerpo'nu. 14Che tunu acabiya' gobernador nucua', li'icaru niru lulla para nú lecaxi ri'inulla li'ihua. 15Che una'tse bee sundado dimi, nu uri'i beei tucu nú unibeella lubeei nú ri'i beei. Nu eluquichia' cua' nzeli arqui' bee bene Israel hasta bichia quie'. 16Che nzubee ye chetu'cu bee bene' Jesuse lu iliu Galilea, equie dañi elu unilanu lubeella nú chue beella. 17Nu chenu ulañi' beella Jesuse ulu'cu beella ula'na lunu, añinzuca nú nu' beella la chili arqui' nú necanu Jesuse. 18Che uyabica Jesuse lubeella nu uninu lubeella: ―Uliqui' Diose ye poder lua para nú nibiya'a liñibe cuna luyuu iliulabe. 19Enze'e uquiahua diqui lu iliulabe uze'te'hua bee bene stichia'a para nú aca beei bee benea. Nu urinzahua beei equie nú lee Pa liñibe, cuna equie cuenda' lli'ñinu nu cuna equie cuenda' Espíritu Santo, 20nu uze'te'hua bee bene nú zucu' beei ye nú unilaa luhua. Nu nia luhua nú ye bee bichia nzua cuna li'ihua, hasta chenu laxu iliulabe. Amén.

will be added

X\