San Mateo 27

1Chenu uye'e lu yuu, uyetesa' ye bee ule'ya enu rnibiya' lubee ule'ya cuna bee usticia Israel nu unga tucu necatse stichia' beella nú xa modo ri'i beella para nú ati Jesuse. 2Che ullica'cu beella Jesuse unguya' beella lu gobernador Poncio Pilato. 3Nu Judas enu udete' cuenda Jesuse, chenu ulañi'i nú necala nú atinu chiqui' necha ulle'cai, nu uya de'te cuenda zecai ala llichi'i melu plata lubee ule'ya enu rnibiya', cuna lubee usticia Israel, 4nu uni lubeella: ―Uri'á dula xne udete cuendaa tucu bene enu lecaxi uri'i para nú ati. Nu ucuaqui beella lu Judas: ―¿La biya'ru enze'e? ¡Necatsiahua' cuenda'lu! 5Chequie uya utsi'qui Judas bee melu ze'e liñi indu llene Jerusalén, nu chu uya tsi'i añii nu ungutii. 6Che uquiete'sa' bee ule'ya enu rnibiya' bee melo ze'e, nu uni beella lusa' beella: ―Leca modo dua'ahua melu quie' liñi alcancía elu nu' dimi u'na, xne necane melo nú uyaxu nú ati tucu bene. 7Che chu unga tucu necatse stichia' beella nú tsi beella tucu yuu elu rlua bee bene yuu nú recache' exqui'ñia cuna dimi ze'e, para nú aca ze'e pandiuñi elu achi' bee bene rene. 8Enze'e hasta nee lee yuu ze'e, yuu rene. 9Scua uyalu tucu nú uni profeta Jeremías chenu unilla: “Uyucu bee bene ala llichi'i melo plata (precio nú uni bee bene Israel nú secanu), 10nu cuna melo cua' utsi beella tucu yuu elu rlua bene yuu nú recache'e exqui'ñia, tucu nú uni Diose lua nú acane.” 11Chenu uyayu bee bene Jesuse lu gobernador Poncio Pilato, che unedichia'lla lu Jesuse, nú unilla: ―¿Li'ilu necalu arre' bee bene Israel la? Che uni Jesuse lulla: ―Ahua', tucu nú unilu scua necane. 12Nu chenu rta'quiya bee ule'ya enu rnibiya' lubee ule'ya cuna bee usticia' bee bene Israel li'inu, lecalí xi ucuaquinu. 13Che uni Pilato lunu: ―¿Xie' la yene'lu ye beenú rni cundra bee benecua' lu cuenda'lu la? 14Pero ni' tucu bedichia' né cuaqui Jesuse lu pilato, che chiqui' nzenu arqui'lla. 15Nu bee bichia ze'e reca eliñi baxcu neca costumbre' Poncio Pilato nú rla'alla tucu bene enu nchiñi ni'cu', tatse tucu bene enu nacu' bee bene nu la'a. 16Le'ca bee bichia ze'e nchiñi tucu bene enu lee Barrabás ni'cu', nu ye bee luhuare nediya'la' bee bene ti necalla. 17Nu chenu neyete'sa'la bee bene ze'e, unedichia' Pilato lubeella nú unilla: ―¿Ta bene enu niarqui'hua nú la'a: Barrabás la?, urre ¿Jesuse enu rni bee bene nú neca Cristo la? 18Uni Pilato scua xne uri'illa beya' nú equie nú riatsia arqui'beella enze'e udete' cuenda beella Jesuse lulla. 19Chenu uzucu Pilato elu rnibiya'lla nu rlualulla lu cuenda' Jesuse, uriña tucu resuna' una'alla lulla nú uninchu lulla: “La ri'chialu benecua' xne lecaxi equiya rlu'culla, xne necha uni xcala'a rula' quie' lu cuenda'lla.” 20Pero bee ule'ya enu rnibiya' lubeelá bee ule'ya cuna bee usticia' bee bene Israel udu' beella arqui' bee bene enu nucua'a ze'e nú nacu' beei lu Pilato nú la'alla Barrabás, nu ati Jesuse. 21Chequie unia'la Pilato lubeei: ―¿Ta lu rucu beella niarqui'hua nú la'a che? Che uni bee bene ze'e lulla: ―Ula'a Barrabás. 22Nu uni Pilato lubeella: ―¿Nu xi ri'inua Jesuse enu rni bee bene nú neca Cristo? Che uni ye beella: ―¡Uquie'e nucua' lu cruse! 23Nu uni Pilato lubeella: ―Pero ¿xi nú necha neca uri'illa? Che stucua'la urixialibeella nú uni beella: ―¡Uquie'e nucua' lu cruse! 24Chenu uri'i Pilato beya' nú laria'lla ana tsulla lubee bene ze'e sino que maselá rixialibeei, che unibiya'lla nú ye'tayu tucu bene inza, nu unalla ante lu ye bee bene ze'e, nú unilla: ―Lecaxi culpaa nú ati bene cua', necatsia nucua' cuenda'hua. 25Che uni ye bee bene ze'e lu Pilato: ―¡Neca nucua' culpa'ru cuna bee lli'ñiru, nú ati benecua'! 26Chequie ula'a Pilato Barrabás, nu chu unibiya'lla nú zete'che' bee sundado Jesuse, nu udete' cuendalla li'inu lubee sundado para nú quie'e beei li'inu lu cruse. 27Che unguya' bee sundado ze'e Jesuse liñi palacio' gobernador, elu uyetesa' ye beei lunu. 28Che ulua beei xucunu, nu ungutu beei li'inu tucu laquie neluu, 29nu ureche'e beei tucu ellu'ñi nú necache' eche uzucu' beei equienu, le'ca uzucu' beei tucu bara yanu chube. Che chu utsulliqui beei lunu nu xitse uri'chia beei li'inu nú unibeei lunu: ―¡Huañi arre' bee bene Israel! 30Nu le'ca utsuxene beei lunu, nu mismo bara nú udete' beei yanu unguxi beei yanu udu'beei equienu. 31Chenu ulaxu nú xitse uri'inu beei li'inu, ulua zeca beei laquie neluu nú ungutu beei li'inu, nu ungutu zeca beei nú necaca xucunu li'inu. Che unguya' beei li'inu para nú quie'e beei li'inu lu cruse. 32Chenu nzenu beei Jesuse nú quienu lu cruse ulla'ca beei tucu bene eyeche Cirene, enu lee Simón, che unibiya' bee sundado ze'e lulla nú uya'lla cruse' Jesuse. 33Nu chenu uriña beei tucu luhuare nú lee Gólgota, nu rni nucua' Lluca equie bene nguti. 34Ze'e udete' beei biñu nú nucha inza nú nelá güe'nu, pero chenu uti'ñia'nue, né zelanu agüe'nue. 35Chenu ulaxu nú uquie'e bee sundado ze'e Jesuse lu cruse, urita beei tucu rifa equie xucunu para nú ritsi'beei xucunu lu sa'beei. Scua uyalu tucu nú uquie'e tucu profeta lu ichi' Stichia' Diose elu rni: “Ita bee sundado tucu rifa equie xucua bi'ya ta beei ri'i anae.” 36Che chu ucua'a beei ze'e para nú ri'iucu beei li'inu. 37Nu equie cruse'nu uquie'e beei tucu letrero nú rni xinu uquie'e beei li'inu lu cruse. Nu letrero ze'e rni: “Neca ninguie' Jesuse arre' bee bene Israel.” 38Le'ca uquie'e bee sundado ze'e chiucu huana' lu tucua cruse, tucu nze'e cue'tsenu chube nu stucu nze'e cue'tsenu chubeca. 39Nu bee bene enu udete lunu ze'e, uri'qui equie beei nu rnibeei bee bedichia' nú necha neca lunu, 40nu rnibeei lunu: ―Manú unilu nú chilalu indu llene Jerusalén nulu chunatsia bichia reche' zecalue, utsila'a li'ilu nee. Tunu neli'ilu nú necalu lli'ñi Diose, ulaca lu cruse cua'. 41Le'ca scua bee ule'ya enu rnibiya' lubeelá bee ule'ya cuna bee ulaxcuela enu reca ley, cuna bee fariseo nu cuna bee usticia Israel, uni beella huaxi bee bedichia' nú necha neca lunu, nu unibeella lusa'beella: 42―Utsila'a nucua' bee bene, pero laca nucua' tsila'a nucua' li'i nucua'. Tunu neca nucua' arre' bee bene Israel, chu laca nucua' lu cruse nu che chili arquia'ahua nucua'. 43Nzelí arqui' nucua' Diose, nee tsila'a Diose nucua' tunu secanu nucua', xne rni nucua' nú neca nucua' lli'ñi Diose. 44Nu hasta bee huana' enu nequie lu stucu cruse cue'tsenu unibeei bee bedichia' nú necha neca lunu. 45Chenu unga rrebichia ucabelí diquineca lu iliulabe, hasta rquie chuna uche. 46Nu rquie chuna uche ze'e, urixiali Jesuse nu uninu: ―Elí, Elí, ¿lama sabactani?, rni bedichia' cua': Diosea, Diosea, ¿xinu utsana' arqui'lu li'á? 47Chenu ubene' bee bene enu nucua'a ze'e nú uninu scua, che unibeei lusa'beei: ―A'a rixialla profeta Elías. 48Che chu uyaxu'u tucu beei nu ucuacha nze'e tucu esponja lu inza vinagre, nu uzucu'i lli'i tucu ixi', nu uti'i esponja cua' ru'u Jesuse para nú güe'nu inza vinagre cua'. 49Pero texcua'a beei enu nucua'a ze'e uni: ―La ri'inululla scua bi'ya se nze'ta Elías tsila'a li'illa. 50Che juerte urixiali Jesuse stucu bese, nu chu ungutinu. 51Chequie hora ze'e utsa cortina llene nú nzi'quinala liñi indu llene Jerusalén, nu utsa arli'tillune hasta aya nu hasta aquié. Nu unga xuú lu iliulabe nu ule'e bee quielaa, 52nu uya'la bee eluhua nu uhuañi zeca huaxi bee bene enu nzeli arqui' Diose, bee enu unguti. 53Che uchiu'u beella liñi eluhua lulá nú uhuañi Jesuse, nu uyu'u beella Jerusalén. Nu ze'e ulañi' huaxi bee bene li'ibeella. 54Che capitán cuna beelá bee sundadu'lla enu rriucu Jesuse, chenu ulañi' beella nú reca xú nu cuna ye beenú reca, chiqui' ulliqui beella nu unibeella lusa' beella: ―¡Neli nú neca benequie' Lli'ñi Diose! 55Nu huaxi bee una'a enu uyaquie Jesuse desde Galilea enu uri'i elietsa lunu nucua'a beenchu istu ze'e ri'ya beenchu lunú reca. 56Leta bee una'a quie' nzu María Magdalena, cuna María na' Jacobo nu José, nu cuna na' bee lliana' Zebedeo. 57Chenu uyu'u rula', uriña tucu bene xene enu lee José, necalla bene eyeche Arimatea, nu le'ca uyanzenulla Jesuse. 58Nu uyalla lu Pilato uyana'culla cuerpo' Jesuse. Che unibiya' Pilato nú dete' cuenda bee sundado cuerpo' Jesuse lulla, 59nu chu una'tsella cuerpo' Jesuse nu utelallanu tucu sábana nú lecaxi naa 60nu che uya ca'chi'lla cuerpo' Jesuse liñi tucu eluhua cuqui nú neca stene'lla, nú uda'ñilla liñi tucu quielaa, nu utsacu'lla tucu quiee llene ru'u eluhua ze'e nu chu nzialla. 61Ru'u eluhua ze'e nzucu María enu neca bene eyeche Magdalena cuna stucu María. 62Chenu uye'e lu yuu bichia nú sulachi bee bene uya bee ule'ya enu rnibiya' lubee ule'ya cuna bee fariseo lu Pilato, 63nu uni beella lu Pilato: ―Detá, nchiucu' arqui'ru nú chenu nehuañisca' bene enu nequichia' cua', uni nucua' nú detetsia chuna bichia huañizeca nucua' lu eluti. 64Enze'e unibiya' nú aca ucu ru'u eluhua cua' hasta nú za' chuna bichia para nú la cha bee bene' nucua' rula' che cachi' cuerpo' nucua', nu ni bee bene' nucua' lubee bene nú uhuañi zeca nucua' stucu bese. Xne tunu ri'i bee bene' nucua' scua che masesca'lá aca llene eluquichia' cua' luquelá eluquichia' nú uni nucua' rluti. 65Che chu uni Pilato lubeella: ―Nucua'acua bee sundado. Para nú ri'i ucue. Uya'hua beei nu utsa'cuta'hua ru'u eluhua ze'e. 66Che nzuebeella, nu utsacu'ta' beella ru'u eluhua ze'e, nu chu utsa'na beella bee sundado rriucue.

will be added

X\