San Mateo 26

1Chenu ulaxu uni Jesuse scua lubee bene, che uninu lubee bene'nu: 2―Li'ihua nediya'hua nú xiucutsia bichia rri'i nú aca eliñi baxcu, nu li'á Bene enu uxe'la Diose dete' cuenda bene li'á lubee bene para nú quie'e beei li'á lu cruse. 3Chequie bee ule'ya enu rnibiya' lubeelá bee ule'ya, cuna bee ulaxcuela enu reca ley nu cuna bee usticia' bee bene Israel, uyetesa' beei ru'u ele'ya ni'i ule'ya Caifás enu rnibiya' lubeelá bee ule'ya. 4Nu ze'e ubedichia' beei nú xa modo zequienu beei Jesuse para nú na'tse beei li'inu nú uti beei li'inu. 5Pero unibeei lusa'beei: ―La ria'ahua scua diqui nú reca eliñi para nú la tsu reche bee bene. 6Chenu nzu Jesuse eyeche Betania, ni' Simón enu ri'chia bene leproso, 7che uriña tucu una'a lunu nu nuya'nchu tucu frasco perfume nú chiqui' huaxi seca, nu udu'nchue equienu chenu nzucunu lu mexa. 8Chenu ulañi' bee bene' Jesuse nucua', ulee beella nu unibeella lusa'beella: ―¿Xinu uti'chianchu perfume cua' scua? 9Ala' a'la aiqui perfumecua' para nú ri'inchu elietsa lubee bene enu seca elitsi. 10Nu chenu ubene' Jesuse nú uni beella, che uninu: ―¿Xinu rlehua lu una'a quie'? Nu lunú uri'inchu lua neca nze'cae. 11Xne bee bene elitsí siempre nucua'a letahua, pero li'á la tsua siempre letahua. 12Nu lunú udu' una'a quie' perfume equiea, neca nucua' nú nzuche'la cuerpoa chenu achi'a. 13Li'á nia luhua nu catse lu iliulabe elu ixiule'e bee bene bedichia' nze'ca' Diose, le'ca nibee bene nú uri'inu una'a quie' li'á, para nú ellu'cu arqui' bee bene li'inchu. 14Che tucu lu chi'chiucu bee bene'nu enu lee Judas Iscariote, uya lubee ule'ya enu rnibiya' lubeela bee ule'ya, 15nu uni Judas lubeella: ―¿Calu liqui'hua para nú dete cuendaa Jesuse luhua che? Che udete'beella alallichi'i melu plata yai. 16Nu desde bichia ze'e ucua'na Judas xneca modo dete' cuendai Jesuse lubee ule'ya. 17Bichia xee eliñi baxcu chenu racu bee bene Israel pa nú la chu'u levadura equie, che uyabica bee bene' Jesuse lunu, nu unibeella lunu: ―¿Cá niarqui'lu nú nzereche'ru nú da'cuxe'ahua reché baxcu? 18Chequie uninu lubeella: ―Uquiahua Jerusalén, nzucu tucu bene enu nihua lu: “Singuie rni Maestro: Nze'ta riñala hora'nu, nu niarqui'nu nú acuxenunu bee bene'nu exee baxcu ni'lu.” 19Che uri'i bee bene'nu tucu nú unibiya'nu nú ri'i beella, nu ureche' beella nú acuxee beella reché baxcu. 20Chenu uyu'u rula', uzucu Jesuse lu mexa cuna chi'chiucu bee bene'nu, 21nu diquila nú racuxee beella, uninu lubeella: ―Nia luhua nú tucuhua dete' cuenda li'á para nú atia. 22Che chiqui' nehuana utsu arqui'beella nu uquixie unedichia' tucua tucua beella lunu, nu unibeella lunu: ―Detá, ¿li'á nze'e la? 23Nu ucuaqui Jesuse lubeella: ―Enu se'e pa le'ca liñi pliato elu se'a pa nze'e neca enu dete' cuenda li'á lubee bene enu uti li'á. 24Neli nú li'á Bene enu uxe'la Diose, rqui'ña nú zecaa tucu nú rni lu ichi' Stichia' Diose; pero ¡cue' bene enu dete' cuenda li'á! Máse neca nze'ca lu cuenda' bene ze'e nú né alaxulla. 25Chequie Judas enu dete' cuenda li'inu, uni lunu: ―Maestro, ¿li'á nze'e la? Che uni Jesuse lui: ―Ahua', li'ilu nze'e. 26Diquila nú racu beella, una'tse Jesuse tucu pa nu udete'nu che'tsa lu Diose, nu chu ule'enu pa ze'e udete'nu ya beella, nu uninu lubeella: ―Udacuhua pa quie', ninguie' neca cuerpoa. 27Che chu una'tsenu tucu copa biñu, nu udete'nu che'tsa lu Diose nu chu udete'nu copa cua' ya beella, nu uninu lubeella: ―Uhue' yehua biñu quie', 28xne neca nucua' renea nú ri'chia chenu atia para nú tsila'a huaxi bee bene iliulabe, xne equie cuenda' nú atia ya'la tucu inziu cuqui nú ri'i Diose perdona stula bee bene. 29Pero nia luhua nú la hua'a biñu nú necache'e uva ni' stucu bese, hasta bichia nú hua'anuahua biñu cuqui liñibe elurnibiya' Diose. 30Chenu ulaxu ungula beella canto lu Diose, che chu nzuebeella dañi nú lee Olivos. 31Che uni Jesuse lubeella: ―Yehua tsana' arqui'hua li'á rula' quie', tucu nú rni lu ichi' Stichia' Diose elu rni: “Utia bene enu rriucu bee sanchi, nu ri'chialetse beeií.” 32Pero chenu huañi zecaa, rlutilaa nza'a Galilea, cheelá riñahua ze'e. 33Chequie uni Pedro lu Jesuse: ―Añinzuca nú tsana' arqui' yebeella li'ilu. Pero li'á la tsana arquia li'ilu. 34Che uni Jesuse lu Pedro: ―Nia lulu nú nee rula' quie' ante nú bixia tiula, unilalu chuna bese núla chululu li'á. 35Pero uni Pedro lunu: ―Mase nú atia cuna li'ilu, la cachia nú nu'lua li'ilu. Nu le'ca scua uni ye beelá bee bene'nu lunu. 36Che uriña Jesuse cuna bee bene'nu tucu luhuare nú lee Getsemaní, nu uninu lubeella: ―Ucua'ahua ca'a, diquila nú nzenacua lu Diose inchiu'. 37Che chu nzenunu Pedro cuna rucu lliana' Zebedeo, nu uquixie nú chiqui' nehuana nzu arqui'nu hasta nú lixiua' nzu arqui'nu, 38nu uninu lubeella: ―Chiqui' nehuana nzu arquia hasta nú se'ca nú atia, ya'nasca'hua ca'a, nu ucua'a naahua cuna li'á. 39Che chu nza Jesuse lle'na enza lu ze'elá, nu utsu lliquinu hasta nú uti'nu tequienu lu yuu, nu unacu'nu lu Diose nú uninu: ―Paa, tunu nu' modo utsila'a li'á lunú nehuana enta zecaa, pero la acatsia tucu nú niarquia, acatsia tucu nú niarqui'lu. 40Chenu ubenchila' zecanu elu nucua'a bee bene'nu, ulluna'nu beella nú ra'tse beella, nu uninu lu Pedro: ―¿Xie' lá riqui'hua acua'anahua masia tucu hora cuna li'á la? 41Ucua'a nahua nu una'cuhua lu Diose para nú la ri'i beze'lu ana luhua. Xne li'isihua chiqui' nu' ana arqui'hua nú ri'ihua tucu nú neca nze'ca, pero la riqui' cuerpo'hua. 42Bese rrucu nú uya na'cunu lu Diose uninu: ―Paa, tunu leca modo nu la zeca lunú nehuana nzu nú zecaa, acatsia tucu nú niarqui'lu che. 43Chenu ubenchila' zecanu elu nucua'a beella, ulañi'nu nú ra'tsea'la beella stucu bese xne uri'i cala' ana lubeella. 44Nu utsa'nanu beella ze'e nu uya na'cu'nu lu Diose bese rriuna cuna bee bedichia' nú unilanu. 45Chenu ubenchila'nu elu nucua'a beella, uninu lubeella: ―¿Xie' ra'tsesca'hua nu sulachisca'hua la? Nu li'á Bene enu uxe'la Diose, uriñala hora nú dete' cuenda bene li'á lubee bene enu necha rri'i. 46Uzetehua ne cha'ahua nee, xne axula nze'ta enu dete' cuenda li'á. 47Rdichia'nusca' Jesuse bee bene'nu chenu uriña Judas, enu neca tucu lu chi'chiucu bee bene'nu, uriñayui huaxi bee bene enu nuya' espada cuna acarute lunu. Nu una'tse beei Jesuse xne unibiya'la bee ule'ya enu rnibiya' lubeela bee ule'ya cuna bee usticia Israel nú acane scua. 48Nu Judas enu udete' cuenda Jesuse unilai lubee bene ze'e xa ri'i chenu dete' cuendai li'inu, nu uni lubeella: ―Nee enu acua bichiu' xeca, nze'ella nu nze'e na'tsehua. 49Chequie chenu uriña Judas ze'e uya bicai lunu nu uni: ―¡Malune, Maestro! Nu chu udacui bichiu' xecanu. 50Che uni Jesuse lu Judas: ―Amigo, uri'i lunú nze'talu ri'ilu. Che chu una'tse bee bene ze'e Jesuse para nú uya' beei li'inu. 51Che tucu bee bene enu nzunu Jesuse ze'e uhua espada' nu uchiecu'lla tucu diaca moso' ule'ya enu rnibiya' lubee ule'ya. 52Chequie uni Jesuse lulla: ―Udu'che' espada'lu xne ye bee bene enu rri'i xu cuna espada, le'ca cuna espada atilla. 53¿Xie' la ri'ilu beya' nú nu' modo nacua lu Paa liñibe, nu chu xe'lanu huaxi mili bee ángele'nu enu ri'i elietsa lua la? 54Pero tunu ri'á scua, ¿xneca modo yalu tucu nú nequie lu ichi' Stichia' Diose elu rni nú scua riala zecaa? 55Che chu uninu lubee bene ze'e: ―¿Xinu nze'tahua cuna espada nu cuna acarute para nú uya'hua li'á xi neca tucu huana'? Ye ye'e nzua letahua uzeteahua Stichia' Diose liñi indu llene Jerusalén, nu né na'tsehua li'á. 56Pero ye bee nucua' unga para nú yalu tucu nú nequie lu ichi' Stichia' Diose nú uquie'e bee profeta. Chequie ye bee bene'nu utsana' arqui'beella li'inu nu uyecaxu'u beella nzuebeella. 57Che bee bene enu una'tse Jesuse unguya' beei li'inu ni'i Caifás, ule'ya enu rnibiya' luye bee ule'ya, ze'e neyete'sa' bee ulaxcuela enu reca ley cuna bee usticia' bee bene Israel. 58Nu istu istu nzequie Pedro Jesuse hasta ru'u ni'i ule'ya ze'e, nu chenu uriña Pedro ru'u ni'i ule'ya ze'e uzuculla leta bee bene enu rriucu ze'e para nú lañi'lla xi ri'inu bee benecua' Jesuse. 59Chequie bee ule'ya enu rnibiya' lubee ule'ya, nu cuna ye bee usticia ucua'na beella xa modo ta' beella eluquichia' Jesuse para nú atinu. 60Pero lá llela' beella xi eluquichia' ata' beella li'inu añinzuca nú huaxi bee bene uni nú la neli contra li'inu, che luze'elá uriña xiucu bene enu le'ca uni nú la neli contra li'inu, 61nu unibeei: ―Benequie' uni: “Li'á aca chila indu' Diose nu reche' zecane lu chunatsia bichia.” 62Chequie utsuli ule'ya enu rnibiya' lu ye bee ule'ya nu unilla lu Jesuse: ―¿Xiquie nú lecalí xi cuaquilu? ¿Xi nucua' rnibeei lu cuenda'lu? 63Pero lecalí xi ucuaqui Jesuse. Che uni ule'ya ze'e lunu: ―Equie cuenda' Diose enu nehuañi, uni'i nú neli neca lua tunu li'ilu necalu Cristo lli'ñi Diose. 64Che ucuaqui Jesuse nú uninu: ―Li'á nze'e. Nu le'ca nia luhua nú lañi'hua li'á Bene enu uxe'la Diose nú nzucua'a cue'tsenu chúbe, li'inu enu rlu'cu ye poder, nu le'ca lañi'hua nú nzela liñi xcabe enza liñibe. 65Chenu ubene' ule'ya ze'e nucua' che utsalla xuculla, nu unilla: ―Lu Diose rni nucua' bedichia' nú necha neca, ¿xinu la'na'lá'ahua testigo? Li'ihua ubene'lá'hua bee bedichia' nú necha neca uni nucua' lu Diose. 66¿Xa nihua nee? Che ucuaqui bee bene ze'e nú unibeei: ―Riala nú ati nucua'. 67Che utsuxene beei lunu nu udiñi beei li'inu, nu nu' beei enu udichiue lunu. 68Nu unibeei lunu: ―Tunu li'ilu necalu Cristo, ¡uni' ti udiñi li'ilu! 69Diquila nú nzucu Pedro ru'u eli'ya' ni'i ule'ya ze'e, che uyabica tucu criada' ule'ya ze'e lu Pedro, nu uninchu lulla: ―Se'ca nú le'ca nuulu enzenuulu Jesuse enu neca bene lu iliu Galilea. 70Pero utsacu' arqui' Pedro nú nu'lulla Jesuse lubee bene ze'e, nu unilla: ―La ri'á beya xi rnilu. 71Che chu nza Pedro enza ru'u puerta eli'ya' ze'e, nu ze'e ulañi' stucu criada li'illa nu uninchu lubee bene enu nucua'a ze'e: ―Le'ca nuu benecua' enzenu Jesuse bene eyeche Nazaret. 72Chequie utsacu' arqui' zeca Pedro stucu bese nú la chululla Jesuse, nu uquie'ella Diose nú unilla: ―La chulua benecua'. 73Nu luze'etsia bee bene enu nucua'a ze'e uyabica beei lu Pedro, nu unibeei lu Pedro: ―Ache nze'ca rlube' nú necalu tucu bene' bene cua', xne rdichia'lu tucu nú rdichia' beei. 74Pero utsuta' Pedro nú unilla: ―Dete' Diose castiya li'á tunu la nia nú neli neca la chulua bene cua'. Nu che hora ze'e ubixia tucu tiula. 75Che ullu'cu' arqui' Pedro lunú uni Jesuse lulla: “Ante nú bixia tiula unilálu chuna bese nú la chululu li'á.” Che chu uchiu'u Pedro ru'u eli'ya' ze'e nu chiqui' unguna'lla nú nehuana nzu arqui'lla.

will be added

X\