San Mateo 25

1’Le'ca uni Jesuse stucu ejemplu lubee bene'nu: Para nú chu'u bene liñibe elurnibiya' Diose, huaxi bee bene zeca tucu nú ulle'ca chi'i bee una'a e'ne' enu nuya' quinqué nzetsuquiee novio. 2Ayu' beenchu lá ri'i elliebacu' xi rqui'ña nu sayu' beenchu uri'i elliebacu' xi qui'ñia. 3Bee enu lá ri'i elliebacu' xi qui'ña, unguya'tsia beenchu quinqué' beenchu pero né uya'lá beenchu aceite para nú chu'ulá liñi quinqué' beenchu, 4pero sayu' bee enu uri'i elliebacu' nú xi qui'ña, unguya' beenchu quinqué' beenchu nu le'ca unguya'lá beenchu aceite para nú chu'ulá liñi quinqué' beenchu. 5Nu lunú rle'e nú riña novio, una'tse cala' ye beenchu, nu uda'tse beenchu. 6Nu che tucu ulela' rula', ubene tucu chi nú juerte uni: “¡Nze'tala novio; uquia cha'caluhualla!” 7Che uzetee ye bee una'a ze'e, nu uquixie beenchu nú utsuche' beenchu quinqué' beenchu. 8Nu sayu' beenchu enu lá auya' aceite uni beenchu lu sayu' sa'beenchu enu nuya' tsiña aceite': “Ala' chiu'u arqui'hua uli'quihua lle'na aceite'hua chu'u liñi quinqué'ru, xne enta yalala quinqué'ru.” 9Pero bee enu nuya' tsiña aceite ucuaqui: “La chiu'u arqui'ru liqui'rune, xne tunu liqui'rune la riqui'i ni' para li'iru nu ni' para li'ihua. Nzala nú uquiahua elu riquii nu ze'e tsihuane tsi'hua aceite'hua elu riquii.” 10Pero diquila nú nze tsi beenchu aceite' beenchu, uriña novio. Che uyu'utsia ayu' beenchu enu nucua'a tsiña lu eluchia, cuna novio, nu chu uyacu' ru'u puerta. 11Luze'elá uriña sayu' bee una'a ze'e, nu uni beenchu: “¡Detá, detá, ala' uxa'la ru'u puerta chu'uru!” 12Pero ucuaquilla lubeenchu: “Nia luhua nú la xa'lane xne la chuluahua.” 13Chequie uni Jesuse lubee bene ze'e: ―Ucua'a tsiñahua, xne la ri'ihua beya' xi bichia nu xi hora riña zeca Li'á Bene enu uxe'la Diose. 14’Le'ca uni Jesuse stucu ejemplu lubee bene'nu: Elurnibiya' Diose neca xi neca nú uri'i tucu bene enu nza istu, pero ante nú challa ubixiaxulla bee moso'lla para nú tsa'nalla dimi'lla lubeei. 15’Lu tucu moso' ze'e udete'lla ayu' mili, nulu stucui udete'lla chiucu mili, nulu stucui udete'lla tucu mili. Scua udete'lla yabeei tucu nú aca cada tucua beei ri'inu beei berexe. Cheelá nzalla istu. 16Moso' enu uyucu ayu' mili bexu, uri'inui dimi cua' berexe nu uri'i ana se sayu' mili bexu mase. 17Le'ca scua uri'i moso' enu uyucu chiucu mili, uri'i berexe cuna dimi cua', nu uri'i ana se xiucu mili mase. 18Pero moso' enu uyucu tucu mili, uduche' a'chi'i dimi' patron ze'e liñi tucu i'chiu nú uda'ñii lu yuu. 19’Chequie xee tiembu uya patrón' bee moso' cua', che ubenchila' zecalla nu uquixiella unacu'lla cuenta' dimi'lla. 20Nu rlutila uya moso' enu uyucu ayu' mili lulla, nu udete' cuendai ayu' mili bexu'lla nu cuna se sayu' mili bexu lli'ñine, che uni moso' ze'e lu patron'i: “Detá, li'ilu uliqui'lu ayu' mili bexu ya nu nguie se sayu' mili bexu lli'ñine nú uri'á ana dete cuenda yaalu.” 21Che uni patron'i lui: “Neca nze'ca nú uri'ilu, necalu tucu bene nze'ca. Nu uri'ilu tucu nú necane, nu lunú uri'ilu tucu nú necane lu lle'na nú uliquia lulu, nee tsa'nalá huaxilá nú tsa'na lulu. Uyu'u nu ñia utsu arqui' cuna li'á.” 22Chela uriña moso' enu uyucu chiucu mili bexu, nu uni lulla: “Detá, uliqui'lu chiucu mili bexu ya, nu nguie se xiucu mili bexu lli'ñine nú uri'á ana dete cuenda yalu.” 23Che uni patron'i lui: “Neca nze'ca nú uri'ilu, necalu tucu bene nze'ca. Nu uri'ilu tucu nú necane nu lunú uri'ilu tucu nú necane lu lle'na nú uliquia lulu, nee tsa'nalá huaxilá nú tsa'na lulu. Uyu'u nu ñia utsu arqui' cuna li'á.” 24Pero chenu uriña moso' enu uyucu tucu mili bexu, uni lu patron'i: “Detá, li'á nediyaa nú la lu'cu arqui'lu bee bene, nu riuculu ula'cu elu lá ri'ilu riña' nu rri'ilu ula'cu elu lá du'lu nii. 25Enze'e ulliquia, nu uya'a uduche' a'chia'a dimi'lu luyuu. Pero nguie dimi'lu dete cuenda nee.” 26Che uni patron'i lui: “Necalu tucu moso' enu necha rri'i nu nebichiu. Tunu nediya'lu nú riucua'a ula'cu nú lá ri'á riña'lu nu rri'á ula'cu elu lá du'a nii, 27¿xiquie nú né du'lu dimia banco? Nu chenu benchila'a ayucua'a dimia cuna lli'ñine.” 28Che uni patron ze'e lubee bene enu nucua'a ze'e: “Uxihua tucu mili bexu cua' ya benecua', nu ude'te'huane ya bene enu nzenela chi'i mili bexu. 29Xne bene enu rlu'culane ati'la' nze'e huaxiláe, nu hasta nú lu'cu sobrallae, pero bene enu lle'natsia nú rlu'cu, hasta lu lle'na nú rlu'culla yetsu yalla. 30Nu moso' enu la zibi' quie', uluahuai eli'ya' elu necabe nzu, nu ze'e una'i nu acuxa' layai.” 31’Chenu nze'ta zeca Bene enu uxe'la Diose nze'tanu cuna poder nú rlu'cunu, nu cuna ye bee ángele'nu para nú zucunu lu xleta elu nibiya'nu. 32Nu ye bee bene iliulabe yete'sa' lunu, nu huachunu beella letasa' beella, xi rri'i bene enu rriucu bee sanchi nú rluachulla sanchi leta bee chipa. 33Nu bee bene enu neca bee bene'nu cua'anu bee nze'e chube'nu nu bee bene enu laca bee bene'nu cua'anu bee nze'e chubeca'nu. 34Che li'inu enu neca arre ninu lubee bene enu nucua'a chube'nu: “Utehua yehua bee enu uri'i le'yala Pa liñibe. Nu uyu'uhua liñibe elu rnibiya'nu elu utsuche'lanu para li'ihua desde chenu uquixie iliulabe. 35Xne chenu ulia'naa uliqui'hua nú udacua, nu chenu ubichia uliqui'hua nú ungüa'a, nu chenu unzea xi enze bene rene, uliqui'hua elu uya'naa. 36Nu chenu leca' xucua uliqui'hua xucua, nu chenu unga ritia ube'ta bi'yahua li'á, nu chenu ullutsea ni'cu' ube'ta bi'yahua li'á.” 37Che ni bee bene enu uri'i nze'ca ze'e: “Detá, ¿xunga ulañi'ru nú ulia'na'lu nu uliqui'ru nú udaculu? Nu ¿xunga ulañi'ru nú ubichi'lu nu uliquiru nú ungüe'lu? 38Nu ¿xunga ulañi'ru nú unzelu xi unzee bene rene, nu uliqui'ru elu uya'nalu? nu ¿xunga ulañi'ru nú leca' xuculu, nu uliqui'ru xuculu? 39¿Nu xunga ulañi'ru nú ritilu nu ubela bi'yaru li'ilu?, nu ¿xunga ulañi'ru nú netselu ni'cu' nu ubela bi'yaru li'ilu?” 40Nu li'inu enu neca arre, cuaquinu nú ninu: “Li'á nia luhua nú ye nú uri'ihua elietsa lu tucu bee benea mase nú lecati neca nze'e, neca xi neca nú lua uri'ihua elietsa.” 41’Che ninu lubee bene enu nucua'a chubeca: “Ulluna'hua lua, li'ihua enu necha uri'i, uquiahua lu quii nú leca xunga yala elu neca para beze'lu cuna bee ángele'i. 42Xne chenu ulia'naa, né liqui'hua nú acua, nu chenu ubichia, né liqui'hua xi ahua'a; 43nu chenu unzea xi enzee tucu bene rene né liqui'hua elu aya'naa, nu chenu leca' xucua né liqui'hua xucua nu chenu ungaritia, nu le'ca ullutsea ni'cu' né ye'ta bi'yahua li'á.” 44Chequie ni bee bene ze'e lunu: “Detá, ¿xunga ulañi'ru nú ulia'na'lu nu ubichi'lu, nu uya nzeelu xi enzee tucu bene rene, urre xunga ulañi'ru nú uzecala'cha'lu xuculu, urre ungaritilu, urre xunga ulañi'ru nú ullutselu ni'cu', nu ne ri'iru elietsa lulu?” 45Che cuaquinu lubee bene ze'e: “Li'á nia luhua, luye nú né ri'ihua para nú ari'ihua elietsa lubee benea mase nú lecati neca nze'e, le'ca neca xi neca nú lua né ri'ihua elietsa.” 46Nu bee bene quie' chaa lu castiya nú leca xunga laxu, nu bee bene enu uri'i nze'ca lu'cu elu nehuañi nú leca xunga laxu liñibe.

will be added

X\