San Mateo 21

1Chenu nzeriñala beella axu Jerusalén, uriña beella tucu dañi nú lee Olivos, axu eyeche Betfagé, che uxe'la Jesuse chiucu bee bene'nu, 2nu uninu lubeella: ―Uquiahua eyeche nú nchiucu' enza lucua'. Ze'e llela'hua tucu burro enu nequietu cuna lli'ñií. Uxe'chehua beeí nu ye'tayuhua beeí ca'a. 3Nu tunu nu' ti ni xi ni luhua, uni'hua lu bene ze'e nú Detá, Jesuse rqui'ñaí, nee chu nzelayuzecaru beeí. 4Scua unga para nú uyalu tucu nú uni tucu profeta hua'tu, chenu uquie'ella: 5Uni'hua lubee bene eyeche llene Sión: “Ubi'yacuruhua, nze'tala arré'hua luhua nee, nu nze'tanu xi nze'ta tucu bene enu la neca equie, nchiucu'nu equie tucu burru, tucu burro lla'na, lli'ñi nañi enu ruya' yuhua'.” 6Chequie uya bee bene' Jesuse nu uri'i beella tucu nú uninu lubeella. 7Che uriñayu beella burro ze'e cuna lli'ñií lu Jesuse, nu uricu' beella xucu beella equie burro lla'na ze'e, nu chu uricu Jesuse equieí. 8Nu lunú chiqui' huaxi bee bene nucua'a ze'e, nu' beei rcua'a xucu labe inziu elu detenu, nu texcua'a beei uchiecu' bee leca lubee aca ucua'a beei labe inziu elu detenu. 9Che bee bene enu nzuculu, cuna bee bene enu nzequie, rixiali beei nú rnibeei: ―¡Ñia neca lu cuenda' li'inu enu neca Lli'ñi arre David! ¡Chiqui' ñia neca lu cuenda' li'inu enu nze'ta lu cuenda' Pa'ahua Diose! ¡Che'tsalá Diose Paa enu nzucu liñibe! 10Chenu uriña Jesuse Jerusalén, ye bee bene ze'e uyacha beei nu unibeei lu sa'beei: ―¿Ti bene quie'? 11Che unibeei lusa'beei: ―Profeta Jesuse nucua', enu neca bene eyeche Nazaret lu iliu Galilea. 12Chenu uriña Jesuse labe ele'ya' indu llene Jerusalén utiliaca'nu ye bee bene enu ruti cuna ye bee bene enu si labe ele'ya' indu ze'e. Nu utelletanu bee mexa' bee bene enu xi'la dimi, cuna xleta' bee bene enu ruti bee paloma, 13nu uninu lubeei: ―Lu ichi' Stichia' Diose rni: “Nia chiulee ni'i elu nacu' bee bene lu Diose”, pero li'ihua uri'ihuane xi neca yube' bee huana'. 14Che liñi indu ze'e uyabica bee bene enu la ye'e i'culu cuna bee bene enu necuxu ante Jesuse, nu uriyecanu beei. 15Pero chenu ulañi' bee ule'ya enu rnibiya' lubee ule'ya cuna bee ulaxcuela enu reca ley bee milagro nú rri'i Jesuse, nu chenu ubene' beei nú rixiali bee endu' nucua' ze'e: “¡Ñia neca lu cuenda' li'inu enu neca Lli'ñi arre David!”, ule beei 16nu unibeei lu Jesuse: ―¿Riene'lu nú rni bee endu' cua' la? Che ucuaqui Jesuse lubeei: ―Aahua', rienea. Pero ¿xie' lasca' ulahua lu ichi' Stichia' Diose elu rni lu cuenda' nucua' la? Lu ichi' Stichia' Diose rni: Uri'ilu nú bee endu' lla'na cuna bee endu' me'e enu rachi, neca bee enu ula bee canto nu zucu' aya li'ilu. 17Che uya'na beei ze'e, nu uchiu'unu nzanu eyeche Betania, nu ze'e uya'nanu rula' ze'e. 18Chenu uye'e lu yuu stucu bichia, ubenchila' zecanu Jerusalén, nu ulia'na'nu. 19Che ulañi'nu tucu aca higo ru'u inziu nu uyabicanu lue. Pero lá llela'nu higo lue, bee lecatsia nu'lue. Chequie uni Jesuse lu aca higo ze'e: ―¡Leca' xunga ayu ndixi lulu! Hora ze'e ubichi aca higo ze'e. 20Chenu ulañi' bee bene' Jesuse nucua', chiqui' uyanu arqui'beella nu unidichia' beella lu Jesuse: ―¿Xiquie nú chu ubichi aca higo cua'? 21Chequie uni Jesuse lubeella: ―Li'á nia luhua nú tunu nzeli arqui'hua masia teme', nu la za' arqui'hua, la neca nú nucua'tsia ri'ihua tucu nú uri'á lu aca higo, sino que nihua lu dañiquie': “Uyetsu ca'a nu uzana' lu inzatu'”, nu scua acane. 22Nu ye nú nacu'hua lu Diose, tunu neli nzeli arqui'hua nú liqui'nu nucua', che yucuhuane. 23Luze'elá uyu'u Jesuse liñi indu llene Jerusalén sete'nu bee bene, che uyabica bee ule'ya enu rnibiya' lubeelá bee ule'ya cuna bee usticia' bee bene Israel lunu, nu unibeei lunu: ―¿Ti uliqui' stichia' nú rri'ilu ye bee nucua'?, nu ¿Ti uliqui' elurnibiya' lulu? 24Che uni Jesuse lubeei: ―Le'ca nedichia'a tucu luhua niarquia, tunu cuaquihua nú nedichia' luhua, che ixiule'a luhua ti uliqui' elurnibiya' nú rri'á scua. 25¿Ti uxe'la Juan nú rinzalla bee bene che? ¿Diose uxe'lalla la o bee bene uxe'lalla la? Che unibeei lusa'beei, nú unibeei: ―Tunu nia'ahua nú Diose uxe'la Juan Bautista, che ni nucua' lua'ahua: “¿Xiquie nú né chili arqui'hua nú unilla che?” 26Nu le'ca leca modo nia'ahua nú bee bene uxe'la Juan, xne xiquia'ahua bee bene, xne ye bee bene nzeli arqui' nú neca Juan tucu profeta' Diose. 27Che unibeei lu Jesuse: ―Labiya'ru. Chequie uni Jesuse lubeei: ―Le'ca esquie la ixiule'a luhua ti uliqui' elurnibiya' nú rri'á scua. 28Nu uni Jesuse lubeei: ―¿Xa rri'ihua elliebacu' lunú nia luhua nee? Tucu bene ulu'cu chiucu lliana', nu unilla lu tucui: “Endu', uquia ri'i riña' lu yuua elu nu' uva.” 29Che ucuaqui lliana'lla lulla: “¡La niarquia cha'a!” Pero luze'elá uche'e elliebacu'i nu uyai. 30Chequie uya ni' pa' beei lu stucui, tucu nú unilla lu enu rlu, nu uni lulla: “Nza'ca che.” Uni, pero né chai. 31Neequie uni'hua, ¿ta lu rucu bee lliana'lla uri'i lunú niarqui'lla? Che unibeei lunu: ―Enu unilla lu rluti. Chequie uni Jesuse lubeei: ―Li'á nia luhua nú bee bene enu rri'i cubre impuesto para Roma, cuna bee una'a huexe rluti bee nze'e chu'u elurnibiya' Diose liñibe luquela li'ihua. 32Xne ube'ta Juan Bautista udixiule'e luhua nú xa huañihua, nu né chili arqui'hua nú unilla, a'laquie bee bene enu rri'i cubre impuesto para Roma cuna bee una'a huexe uchilí arqui'beei nú unilla. Pero li'ihua mase ulañi'hua bee nucua', ne che'e arqui'hua, para nú a chili arqui'hua nú unilla. 33’Chequie uni Jesuse lubeei uzu'cu' diacahua ne nia stucu ejemplu luhua: Tucu bene uquieni bee aca uva lu yuu', nu udu'lla elu'u diqui abenchila'e, nu ureche'lla tucu elu tsi'i bee uva, le'ca ureche'lla tucu elu aya para nú aca ucu yuu elu nu' bee aca uva ze'e. ’Che udete'lla yuu cua' lle'la lu chiucu chuna bee bene enu ri'i riña' lue, nu chu nzalla istu. 34Chequie chenu uriña tiembu nú le'e beella uva, uxe'lalla chiucu chuna bee moso'lla chetucu bee uva nú rialalla. 35Pero bee bene enu rri'i riña' lle'la lu yuu'lla una'tse beei bee moso' enu uxe'lalla, tucu moso' ze'e uzete'che' beei, stucu nze'e unguuti beei, nu stucui udu' beei quiee. 36Che bene enu neca stene yuu ze'e, uxe'la'lalla huaxilá bee moso'lla luquela nú rlu, pero le'ca esquie uri'inu beei bee moso' cua'. 37’Último uxe'lalla endu'lla, xne uri'illa elliebacu': “Lu endusia lu'cu beei ula'na.” 38Pero chenu ulañi' beei nú nze'ta endu' bene enu neca stene yuu ze'e, che unibeei lusa'beei: “Bene quie' neca enu ya'nanu yuu quie', te utia'hua nucua' para nú ya'nanua'ahua yuu quie'.” 39Che una'tse beei li'i, nu uhua beei li'i lu yuu ze'e nu chu unguuti beei li'i. 40Chequie unedichia' Jesuse lubee bene ze'e nú uninu: ―Chenu riña bene enu neca stene yuu ze'e, ¿xa rri'ihua elliebacu' nú ri'inulla bee bene ze'e enu udete'lla yuu'lla lle'la lu che? 41Che unibei lu Jesuse: ―Utilla beei sin nú hua'a arqui'lla beei, nu dete'lla yuu'lla lu texcua'a bee bene, enu dete' cuenda ula'cu nú rialalla chenu aca ula'cue. 42Le'ca uni Jesuse lubee fariseo: ―¿Xie' lasca' ulahua lu ichi' Stichia' Diose elu rni? Quiee nú uhua u'na bee bene enu rreche' ni'i, quiee quie' neca nú mase uzibi' ungache' ni'i. Nucua' neca nú uri'i Diose, nu chiqui' nzenu arquia'ahua lunú uri'inu. 43Enze'e nia luhua nú chiu'uchuhua elurnibiya' Diose liñibe nu chu'u téxcua'a bee bene luhuare'hua, bee enu neli ri'i tucu nú niarqui'nu. 44Pero titse bee bene enu llica cuchiu' cuna quiee ze'e, nehuana zecalla, nu tunu nu'ti zana' quiee cua' equie la'xulii li'illa. 45Chenu ubene' bee ule'ya enu rnibiya' lubeelá bee ule'ya cuna bee fariseo bee ejemplu nú uni Jesuse, che uri'i beei beya' nú lu cuenda' beei uninu. 46Chequie hora ze'e uniarqui' beei a na'tse beei li'inu, pero xiqui beei bee bene, xne nzeli arqui' bee bene nú necanu tucu profeta.

will be added

X\