San Mateo 20

1Le'ca uni Jesuse lubee bene'nu. ―Elurnibiya' Diose neca xi neca tucu bene enu rlu'cu tucu yuu llene nú nu' uva, nu sila'tu' uchiu'ulla nzecua'nalla bee moso' para nú ri'i riña' lu uva'lla. 2Nu unixulla lubee moso' ze'e nú calu ixiulla beei tebichia nu uzela beei, che uxe'lalla beei nú che ri'i beei riña' lu yu'lla. 3Cheelá uchiu'ulla nzalla tucu rquie quie' sila' nu ulañi'lla nú nucua'a chiucu chuna bee bene ru'u i'ya enu la lu'cu riña'. 4Che unilla lubeei: “Uquia ri'ihua riña' lu yuua elu nu' uva nu ixiucahua lunú riala yaxuhua.” Che chu nzuebeei riña'lla. 5Le'ca uchiua'la bene ze'e nzalla tucu rebibichia, nu le'ca esquie nza'lalla tucu rquie chuna uche, nu le'ca esquie'ala unilla lubee bene enu nucua'a ru'u i'ya enu la lu'cu riña'. 6Nu tucu rquie ayu' uche, uchiu'u zeca'lalla nzalla ru'u i'ya nu uchu'ulla stexcua'a bee bene enu la lu'cu riña', nu unilla lubeei: “¿Xiquie nú debichia nucua'ahua ca'a nu la ri'ihua riña'?” 7Che uni bee bene ze'e lulla: “Xne lá llela'ru riña' ri'iru.” Che unilla lubeei: “Uquia ri'ihua riña' lu yuua, elu nu' uva nu ixiucahua lunú riala yaxuhua.” 8’Chenu uyu'u rula', uni patrón lu moso' enu rnibiya' lubee moso': “Ubixia bee moso' nu uquixie udixiuxu bee enu uriña último, nuche chu ixiulu beelá bee enu rluti uriña.” 9Nu chenu uriña bee moso' enu uyu'u lu riña' tucu rquie ayu' uche, ye beei uyaxu beei tucu nú rri'i bene ana tebichia. 10Chequie chenu uyala nú yaxu bee moso' enu uyu'u rluti lu riña', uri'i beei elliebacu' nú maselá yaxu beei, pero le'ca ye beei uyaxu beei tucu nú rri'i bene ana tebichia. 11Chequie chenu riaxu beei ulebeei lu patrón ze'e, 12nu unibeei lulla: “Bee bene quie' uriña uche, nu uri'itsia beei riña' tucu hora nu udixiulu beei tucu nú rixiulu li'iru, nu li'iru uriqui'ru uri'iru riña' lubee debichiallu.” 13Chequie ucuaqui patrón ze'e, nú unilla lu tucu beei: “Amigo, lecaxi nú necha neca uri'á lulu. Xne li'á unixua lulu nú calu ixiualu tebichia. 14Enze'e uyucu dimi'lu nu yaalu. Xne li'á niarquia nú ixiua bene enu uche uyu'u lu riñaa tucu nú udixiua li'ilu. 15¿Xie' leca modo ri'á lunú niarquia cuna dimiala?, urre ¿Xie' ria arqui'lu nú rri'i nze'ca la?” 16Scua necane, xne bee bene enu leca tineca nee aca neca equie bee nze'e, nu bee bene enu neca equie nee la aca neca equie bee nze'e bichia ze'e. Xne huaxi bee bene nezene' lu inziu' Diose pero la huaxi bee bene enu chenala inziu'nu. 17Chenu nza Jesuse enza Jerusalén, che ubixianu lu chi'chiucu bee bene'nu tucu chú nu uninu lubeella: 18―Nediya'la'hua nú nza'ahua enza Jerusalén elu dete' cuenda bee bene Li'á Bene enu uxe'la Diose lubee ule'ya enu rnibiya' lubeelá bee ule'ya, cuna lubee ulaxcuela enu reca ley, nu nibiya' beei nú atia. 19Nu dete' cuenda beei Li'á lubee bene rene para nú lli'chinu beei Li'á, nu zete'che' beei Li'á nu quie'e beei Li'á lu cruse, pero bichia rriuna huañi zecaa. 20Chequie uyabica una'a Zebedeo cuna rucu lliana' beella lu Jesuse, nu utsulliquilla lunu, nu unacu'lla tucu faura lunu. 21Che unedichia' Jesuse lulla: ―¿Xi niarqui'lu? Nu unilla lunu: ―Chenu nibiya'lu niarquia nú zucu tucu endua cue'tselu chúbe, nu stucui zucu cue'tselu chúbeca. 22Pero uni Jesuse lubeella: ―La ri'ihua beya' lunú rnacu'hua. ¿Xie' nu' modo nú nehuana zecahua tucu nú nehuana zecaa la? ¿Xie' nu' modo riqui'hua zecahua lunú riala zecaa la? Che uni beella lunu: ―Aahua', riqui'ru. 23Che ucuaquinu lubeella: ―Neli nú nehuana zecahua tucu nú nehuana zecaa. Nu riqui'hua zecahua lunú zecaa. Pero enu zucu cue'tsea chúbe urre chubeca. La neca Li'á enu riala nibiya' nucua', sino que necala nucua' para bee bene enu ucañila Diose Paa liñibe. 24Nu chenu ubene' se xi'i bee bene'nu nucua', ule beella lu Juan cuna lu Jacobo. 25Pero ubixia Jesuse beella nu uninu lubeella: ―Li'ihua nediya'hua, nú bee bene enu rnibiya' lu iliulabe quie' rnibiya' beei lubee bene tucu nú niarqui'tsia beei, nu bee bene enu neca equie cua' rri'i beei tucu nú niarqui'tsia beei lubee bene lunú rnibiya' beei. 26Pero letahua la yala nú acane scua. Sino que enu niarqui' nibiya' letahua, rqui'ña nú zibi'lla lu yehua, 27nu enu niarqui' nú mase aca neca equie letahua, rqui'ña nú acalla enu zibi' luhua, 28scua tucu nú uriña Li'á Bene enu uxe'la Diose, lá yela para nú zibi' bee bene lua, sino que uriña lu iliulabe para nú zibi'a lubee bene, nu equie nú atia tsila'a huaxi bee bene lu stula beei. 29Chenu uchiu'u Jesuse cuna bee bene'nu eyeche Jericó, nzequie huaxi bee bene li'inu. 30Nu chiucu bee bene enu la ye'elu nucua'a ru'u inziu, chenu ubene' beei nú udete Jesuse ze'e, urixialibeei nú unibeei lunu: ―¡Detá, lli'ñi David, uhua'a arqui' li'iru! 31Nu uqui'ya' beei uri'i bee bene para nú zaca beei, pero masesca'lá urixialibeei nú unibeei: ―¡Detá, lli'ñi David, uhua'a arqui' li'iru! 32Chequie utsuxe Jesuse nu ubixianu rucu bee bene enu la ye'elu ze'e nu uninu lubeei: ―¿Xi niarqui'hua nú ri'á luhua? 33Che unibeei lunu: ―Detá, niarqui'ru nú ye'e i'culuru para nú lañi'ru. 34Chequie uhua'a arqui' Jesuse beei, nu uti'yanu i'culu beei. Hora ze'e uye'e lubeei, nu chu nzequie beei li'inu che.

will be added

X\