San Mateo 16

1Uya bee fariseo cuna bee saduceo lu Jesuse para nú ri'i beei preo li'inu. Nu unacu' beei lunu nú ri'inu tucu milagro nú lube'nu lubeei tunu neli nú nze'tanu lu cuenda' Diose. 2Che uni Jesuse lubeei: ―Bee uche chenu neluu rnaa liñibe, che rnihua: “Nú nze'ta nú ñia tsu bichia ye'e.” 3Nu bee zila' chenu rlañi'hua nú neluu rnaa liñibe nu nu' xcabe che rnihua: “Necha tsu bichia quie', rri'ihua beya' xa neca bee seña liñibe.” ¿Xiquie nú la ri'ihua beya' xa neca lunú reca nee? 4Bee enu necha rri'i bee lee lecaxi chili arqui'hua nu rnacu'hua tucu milagro lua, pero leca' xi milagro lañi'la'hua ulañi'tsiahua tucu milagro nú ulle'ca Jonás. Nu chu utsa'nanu bee bene cua', nu chu nzanu. 5Chequie chenu udete beella stucu chu inzatu', uzañi' bee bene'nu a uya' beella pa acu beella. 6Che uni Jesuse lubeella: ―Ubi'yahua li'ihua, lu cuenda' levadura' bee fariseo cuna bee saduceo. 7Che uni bee bene'nu lu sa'beella: ―Uninu scua xne lá auya'ahua pá da'cua'ahua. 8Pero uri'i Jesuse beya' nú unibeella lu sa'beella, nu uninu lubeella: ―¿Xinu rnihua nú la lu'cuhua pá? ¡Xinu lle'natsia nzeli arqui'hua li'á! 9¿Xie' lasca' ri'ihua beya', nu la ellu'cu arqui'hua chenu udetea ayu'tsia pá udacu ayu' mili bee bene la? ¿Nu se xala llume pá nú uzucu subrasca' uquietesa'hua? 10¿Nu xie' le'ca la ellu'cu arqui'hua chenu udetea achi pá udacu tacu mili bee bene, nu se xala llume pá nú uzucu subra uquiete'sa'hua la? 11Xiquie nú lá ri'ihua beya' nú lá nia luhua lu cuenda' pá, li'á rnia luhua nú bi'yahua li'ihua lu levadura' bee fariseo cuna bee saduceo. 12Che uri'i bee bene'nu beya' nú lá ninu lu cuenda' levadura, sino que uninu lubeella nú bi'ya beella li'ibeella lunú xa sete' bee fariseo cuna bee saduceo bee bene. 13Chenu uriña Jesuse lu iliu Cesarea de Filipo, unedichia'nu lubee bene'nu nú uninu: ―¿Ti rni bee bene nú neca Li'á Bene enu uxe'la Diose? 14Nu ucuaqui beella lu Jesuse, nú unibeella: ―Nu' bee bene enu rni nú necalu Juan Bautista, nu le'ca nu' bee enu rni nú necalu profeta Elías, nu nu' bee enu rni nú necalu profeta Jeremías, urre stucu profeta hua'tu. 15Che uninu lubeella: ―Li'iquiehua, ¿ti rnihua nú necaa? 16Nu ucuaqui Simón Pedro lunu: ―Li'ilu necalu Cristo, Lli'ñi Diose enu nehuañi. 17Che uni Jesuse lulla: ―Ñia neca lu cuenda'lu Simón lliana' Jonás, xne ni' tucu bee bene ne ixiule'e nucua' lulu, sino que Paa enu nzucu liñibe ulube' nucua' lulu. 18Nu li'á nia nú necalu Pedro, nu rni nucua' quiee, nu equie cuenda' li'ilu aca huaxilá bee benea nu ni' eluti la ri'i ana nitilu li'ibeella. 19Li'á liquia elurnibiya' nú nze'ta enza liñibe lulu, nu lu titse enu niilu nú neca perdonala stula lu iliulabe quie', le'ca neca perdonala stula nze'e liñibe, nu bene enu niilu nú la neca perdona stula lu iliulabe quie', le'ca la neca perdona stula nze'e liñibe. 20Che uni Jesuse lubee bene'nu nú la ixiule'e beella lu ni'tucu bee bene, nú li'inu necanu Cristo. 21Desde che uquixie Jesuse udixiule'enu lubee bene'nu nú rqui'ña nú nzanu Jerusalén. Nu bee usticia' bee bene Israel cuna bee ule'ya enu rnibiya' lubeelá bee ule'ya cuna bee ulaxcuela enu reca ley, ri'ibeei nú chiqui' nehuana zecanu. Nu udixiule'enu nú utibeei li'inu, pero bichia rriuna huañi zecanu. 22Chequie unguya' Pedro li'inu tucu chu nu unilla lunu: ―¡La zela Diose nú acane scua! ¡Nu la zecalu scua! 23Che ubelleta Jesuse nu uninu lu Pedro: ―¡Ulluna' lua beze'lu, nu la ri'ixi'ilu lua! Xne elliebacu' nú rri'ilu la ye'ta nucua' lu Diose, rri'itsialu elliebacu' tucu nú rri'i bee bene iliulabe elliebacu'. 24Che uninu lubeelá bee bene'nu: ―Tunu nu'ta tucu bee bene enu niarqui' aca bee benea, la yala nú ri'illa tucu nú niarqui'tsialla, rqui'ña nú riqui'lla xitse nú nehuana zecalla nu ye'ta quiella li'á. 25Xne bee bene enu masela niarqui' nú huañi lu iliulabequie' enta bichia nú nitilu nucua', pero bee bene enu ati equie nú neca beei bee benea, lu'cu bee nze'e elunehuañi nú leca xunga laxu lu Diose. 26¿Lecaxi zibi' nú ri'i bee bene ana ye nú nu' lu iliulabequie', tunu nitilulla ante Diose? Xne leca modo tsibene elunehuañi' bene liñibe. 27Nu Li'á Bene enu uxe'la Diose, chenu nzela stucu bese, nzela cuna poder nú rlu'cu Pa Diose nu cuna bee ángele'nu. Bichia ze'e detea lu cada tucua bee bene lunú riala ati'lla, equie cuenda' lunú uri'illa. 28Li'á nia luhua, nú nu' bee bene enu nucua'a ca'a lá ati hasta nú lañi'beei nú riña zeca Li'á Bene enu uxe'la Diose, nzela cuna poder nú rlu'cua para nú nibiya'a.

will be added

X\