San Mateo 11

1Chenu ulaxu nú unibiya' Jesuse lu chi'chiucu bee bene'nu nú xi che ri'i beella, che uchiu'unu nze zete'nu nu nze tixiule'enu Stichia' Diose lubee bene lubee eyeche nú nchiucu' lu iliu ze'e. 2Nu chenu nchiñi Juan Bautista ni'cu' ubene'lla luye nú rri'i Jesuse. Che uxe'lalla chiucu chuna bee bene'lla, 3para nú che nedichia' beella lu Jesuse: ―¿Li'ilu necalu Cristo enu nzu nú nze'ta la, urre lluaquieeru stucu enu enta la? 4Che ucuaqui Jesuse lubeella: ―Uquia tixiule'ehua lu Juan Bautista lunú rlañi'hua nu lunú riene'hua. 5Udixiule'ehua lulla nú rlañi'la' bee bene enu nequie'lu nu bee bene enu necuxu see la bee nze'e, nu le'ca uyeca'la' bee bene enu seca elichia nú lee lepra, nu bee bene enu nenguata' riene'la', nu bee bene enu unguti uhuañi zeca bee nze'e, nu bee bene enu seca elitsi riene'la' bedichia' nze'ca' Diose nú tsila'a li'ibeei. 6Ñia neca lu cuenda' bee bene enu la chiecu' arqui' nú nzeli arqui' li'á. 7Chenu nziue bee bene' Juan enu uya lu Jesuse, che uquixie Jesuse nú uninu lubee bene ze'e equie cuenda' Juan, nu uninu lubeella: ―¿Ti uya bi'yahua lu yuu achi elu la nucua'a bee bene? ¿Ti secahua nú neca bene enu uya bi'yahua, tucu etaa nú rcuñi bii la? 8Urre ¿xa naa bene enu uya bi'yahua? ¿Xie' uya bi'yahua tucu bene enu nutu laquie fiñu la? Li'ihua nediya'hua nú bee bene enu rutu laquie fiñu liñi palacio nucua'a beella. 9¿Ti uya bi'yahua che? ¿Uya bi'yahua tucu profeta la? Neli nú scua necane, pero masesca'lá neca equiella luquela tucu profeta. 10Equie cuenda' Juan quie' rni lu ichi' Stichia' Diose elu rni: Xe'laa tucu benea cha rluti lulu, para nú reche'lla inziu'lu. 11Li'á nia luhua nu luye bee bene enu nucua'a lu iliulabe lá chu'u ni' tucu bee bene enu masesca'lá neca equie tucu nú neca equie Juan Bautista. Pero bene enu menola neca equie liñibe elurnibiya' Diose nze'e mase neca equie luquela Juan. 12’Desde bichia nú ube'ta Juan Bautista nu hasta nee, huaxi bee benechiqui' rcua'na xa modo chu'u elurnibiya' Diose. Nu bee bene enu neli rcua'na nú chu'u elu rnibiya'nu, li'ibeella neca beella enu chu'u ze'e. 13Ley nú udete' Diose lu Moisés cuna yebee profeta udixiule'e beella nú xi nze'ta aca, hasta bichia nu uriña Juan, 14nu tunu li'ihua chili arqui'hua nú nia luhua, nú Juan neca profeta Elías enu uni bee profeta nú riña. 15Titse bee bene enu niarqui' nú yene' nú rnia, quie'e diaca nze'e. 16’¿Xa nia luhua nú xa neca bee bene enu nehuañi lu iliulabe quie' nee? Li'á nia luhua nú neca beei xi neca bee endu' enu rcua'a ru'u i'ya rita nu rixiali beei lusa' beei, nú rnibeei: 17“Ungularu chí para nú ye'ehua nu né ye'ehua, nu le'ca ungularu canción nú nehuana se, nu né una'hua.” 18Scua necahua xne uriña Juan Bautista nú lá aculla nu le'ca la hue'lla viñu nu rnihua nú nchiñi benechiqui' arqui'lla. 19Neequie uriña li'á Bene enu uxe'la Diose, nú racua nu rue'a biñu, nu rnihua nú racuxeta'a nu riu' arquia rue'a viñu nu rquietea bee bene enu rlu'cu dula nu cuna bee bene enu rri'i cubre impuesto para Roma. Pero yebee bene rri'i beya', li'ibeella nediya' beella nú neca nze'ca lunú rri'i Diose. 20Chequie uquixie Jesuse nú uqui'ya'nu bee bene bee eyeche elu mase uri'inu bee milagro, xne né tsana' arqui'beei stula beei. Nu uninu lubeei: 21―¡Cue'hua bee bene Corazín! ¡Cue'hua bee bene Betsaida! Xne tunu eyeche Tiro cuna eyeche Sidón a aca bee milagro nú unga lachihua, xi tiembula a tsana' arqui' bee bene ze'e stula beei, nu le'ca a utu beei laquie natsa nu a tiqui beei tii equie beei, xi neca tucu seña nú lube' nú nehuana nzu arqui'beei. 22Pero li'á nia luhua nú bichia chenu laxu iliulabe, maselá juerte castiya zecahua luquela nú zeca bee bene eyeche Tiro cuna eyeche Sidón. 23Nu li'ihua bee bene eyeche Capernaum, ¿la za' arqui'hua nú riala chu'uhua liñibe? ¡Xne li'ihua riala chu'uhua hasta elu mase aquié rqui' ebila! Xne tunu eyeche Sodoma a aca bee milagro nú unga lachihua, che pianu hasta bee bichia quie' nchiucu'sca' bee eyeche cua' che. 24Pero li'á nia luhua nú bichia chenu laxu iliulabe mase juerte castiya nú zecahua luquela castiya nú zeca bee bene eyeche Sodoma. 25Bee bichia ze'e uni Jesuse: “Pa liñibe li'ilu enu rnibiya' liñibe cuna lu iliulabe, zucu ayaa li'ilu xne ulube'lu lubee bene enu lecaxi reca, nu ucachi'lu lubee bene enu reca nu rri'i beya'. 26Scua necane Pa liñibe, xne scua niarqui'lu nú acane. 27’Uliqui' Pa Diose nú nibiya'a luye beenú nu'. Lecati nediya' ti neca Jesucristo lli'ñi Diose, Diose tsia nediya' nucua', le'ca tucutsia Jesucristo cuna bee bene enu nzeli arqui' li'inu nu'lu Diose. 28Yehua bee bene enu nellaca nzenala lunú neca bee custumbre, nu yehua bee bene enu nellaca lu stula, utehua cuna li'á nu li'á ri'á nú tsulachihua. 29Uzu'cu'hua stichia'a, nu ze'tehua nú acahua bene nze'ca enu lle'na nzu arqui' tucu nú necaa. Che ri'á nú huañi nze'cahua. 30Xne laca neriña' nú zucu'hua stichia'a nu le'ca laca neriña' nú ri'ihua lunú niarquia.

will be added

X\