San Mateo 10

1Chequie ubixia Jesuse chi'chiucu bee bene'nu, nu udete'nu poder lubeella para nú hua beella bee benechiqui' arqui' bee bene nu riyeca beella bee bene enu rcuu catse cuerpo', cuna ye clasia' elichia nú seca beei. 2Bee benequie' neca lu chi'chiucu apóstol' Jesuse: Rluti, Simón enu le'ca lee Pedro, nu bichilla Andrés; nu Jacobo cuna Juan, rucu benequie' neca lliana' Zebedeo. 3Nu le'ca ucañinu Felipe, Bartolomé, Tomás cuna Mateo enu uri'i cubre bee impuesto; Jacobo lliana' bene enu lee Alfeo; nu Lebeo enu le'ca lee Tadeo. 4Nu cuna Simón enu ullutse leta tucu partido nú lee cananista; nu Judas Iscariote enu udete' cuenda Jesuse lubee bene nú ungutinu. 5Ante nú xe'la Jesuse chi'chiucu bee apóstol'nu lubee bene uninu lubeella: ―La chuehua elu nucua'a bee bene enu la neca bee bene Israel ni' lubee eyeche lu iliu Samaria; 6sino que uquiahua lubee bene Israel enu la chenala inziu' Diose. 7Uquiatixiule'ehua lubeella nú nze'ta riñala bichia nú nibiya' Diose. 8Riyecahua bee bene enu riti, nu ri'ihua nú huañi zeca bee bene enu unguti, riyecahua bee bene enu seca elichia nú lee lepra, huahua bee benechiqui' arqui' bee bene. Tucu nú lia uliquia poder cua' luhua, le'ca chenu riyecahua bee bene la ri'ihua cobre. 9’La uya'hua cobre ni' oro ni' plata. 10Uya'hua biti, nu la uya'hua xucuhua nú che'ehua, nu la uya'hua steinza lucuhua, nula uya'hua xcahua, xne bee bene enu rri'i riña' riala nú ati'lla nú aculla. 11’Chenu riñahua tucu eyeche llene urre tucu eyeche lla'na, ze'e cua'nahua ni'i tucu bene nze'ca ya'nahua nu uya'nahua ze'e hasta nú chiu'uhua eyeche ze'e. 12Nu chenu chu'uhua liñi ni'i bene ze'e, uni'hua Diose lubee bene enu nucua'a ze'e. 13Tunu bee bene liñi ni'i ze'e riala nú nzuxe arqui'beella, ria'na nú nzuxe cua' arqui'beella, pero tunu lacane para li'ibeella, benchila'e cuna li'ihua che. 14Nu tunu la yucu arqui' bee bene li'ihua tucu eyeche urre tucu ni'i, uchiu'uhua eyeche ze'e urre ni'i ze'e, nu ri'quihua yuube'cha' nú nu' cuchiu'hua, xi neca tucu seña nulá zela beella ayene' beella bedichia' nú unihua. 15Xne li'á nia luhua nu chenu hualu Diose lu cuenda' yebee bene, masesca'la zeca bee bene eyeche cua' castiya luquela bee bene eyeche Sodoma cuna Gomorra. 16Le'ca uni Jesuse lubee bene'nu: ―¡Bi'yacuruhua! Li'á xe'la li'ihua lubee bene xi neca chenu nza bee sanchi leta bee bichiuu. Enze'e aca netsiñahua xi netsiña bee be'la nu aca lle'na arqui'hua xi neca bee paloma. 17Ubi'yahua li'ihua xne dete' cuenda bee bene li'ihua lubee usticia nu zete'che' beei li'ihua liñi bee indu. 18Nu hasta uya' beei li'ihua lubee gobernador nu lubee arre equie nú nzeli arqui'hua li'á, pero scua nu' modo ixiule'ehua stichia'a lubeei, nu lubee bene enu la neca bee bene Israel. 19Nu chenu dete' cuenda bee bene li'ihua lubee usticia, la chenu arqui'hua xi nihua urre xa nihua lubeella; xne hora nú nihua Diose liqui' bee bedichia' nú riala nihua. 20Xne laca li'ihua enu ni. Espíritu Santo' Diose Pa liñibe neca enu liqui' bedichia' nú nihua. 21’Enta bichia nú dete' cuenda bee bene bee bichilla nú ati bee nze'e, nu le'ca dete' cuenda bee paa bee endu'lla para nú ati beei. Nu le'ca enta bichia nú ri'i condra bee endu' bee uzana' beei nu hasta nú dete' cuenda beei li'ibeella nú ati beella. 22Nu chana arqui' ye bee bene li'ihua equie nú necahua bee benea. Pero bee bene enu tsuta' arqui' lunú nzeli arqui' li'á diqui tiembu nú nehuañilla, tsila'a Diose bee nze'e. 23Chenu ri'i bee bene nú nehuana zecahua lu tucu eyeche equie nú necahua bee benea, uquiahua stucu eyeche, xne li'á nia luhua nu lasca' laxu chuehua lu yebee eyeche Israel chenu riña li'á Bene enu uxe'la Diose. 24’Ni' tucu bene enu sete' la neca equielálla lu bene enu sete' li'illa, nu le'ca ni' tucu moso' la neca equielá lu patron'i. 25Bene enu sete' rqui'ña nú aca conformella nú recalla tucu nú reca ulaxcuela'lla, nu tucu moso' rqui'ña nú aca conformei nú necai tucu nú neca patron'i. Nu li'á enu rnibiya'a luhua rni bee bene nú necaa beze'lu, ¿enzaláquie' li'ihua nú necahua bee benea ti ni bee bene nú necahua? 26’Enze'e la lliquihua bee bene. Xne ni' tucu beenú a'chi' neca la ya'nane scuatsia sin nú acabiyae, riña bichia nu acache bee nucua', le'ca ni' tucu beenú a'chi neca rri'i bee bene la ya'nane scuatsia, riña bichia nú acabiya yebee nucua'. 27Lunú a'chi'tsia rnia luhua, uni'huane lu yebee bene nu lunú rnia a'chi diacahua. Juerte uni'huane. 28La lliquihua bee bene enu niarqui' uti li'ihua. Pero leca modo utilla espíritu'hua. Mejora ulliquihua Diose, xne li'inu rlu'cunu poder nú nitilunu espíritu'hua cuna cuerpo'hua ebila. 29’¿La huaxi seca bee iñi? Pero ni' tucu beeí la zana' beeí lu yuu tunu la zela Pa'ahua enu nzucu liñibe nú acane scua. 30Nu li'ihua hasta yebee ichia equiehua nebacu' Diose. 31Enze'e la lliquihua. Xne mase secahua luquela nú seca huaxi bee iñi. 32’Titse bee bene enu ni nú neca benea lu beelá bee bene, le'ca esquie li'á nia nú neca beella bee benea ante lu Diose Pa liñibe. 33Pero bee bene enu ni nú laca bee benea lu beelá bee bene, le'ca esquie li'á nia nú laca beella bee benea ante lu Diose Pa liñibe. 34’La ri'ihua elliebacu' nú tia uriña lu iliulabe para nú ri'á nú aca tucunecatse bee bene lu sa'beei, sino equie nú chili arqui' bee bene li'á liunu sa'beei. 35Bee pa liunu cuna bee endu'lla, nu bee naa liunu cuna bee xinchiu'cu nu bee llixi liunu suegra'. 36Nu bee bene liñi tucu ni'i le'catsia li'ibeella chana arqui' sa' beella. 37’Bene enu seca pa' nu na' masesca'lá luquela li'á, leca modo aca nze'e benea, le'ca esquie enu mase seca endu' urre xinchiu'cu luquela li'á, le'ca leca modo aca nze'e benea. 38Bee bene enu niarqui' ye'ta quie li'á pero la niarqui' nú nehuana zeca equie cuenda' li'á, leca modo aca bee nze'e bee benea. 39Bene enu maselá seca elunehuañi nú rlu'culla lu iliulabe quie' enta bichia nú laxu nucua'; pero bene enu ati equie cuenda' li'á, lu'culla elunehuañi lu Diose. 40’Bee bene enu ri'i caso li'ihua, rri'i caso bee nze'e li'á; nu bee bene enu rri'i caso li'á le'ca rri'i caso bee nze'e Pa liñibe enu uxe'la li'á. 41Le'ca bee bene enu rri'i caso tucu profeta equie nú neca profeta quie' enu uxe'la Diose, le'ca ati'lla premio nú ati' profeta lu Diose. Nu bene enu ri'i caso tucu bene enu rri'i nze'ca, le'ca iguale ati'lla premio nú ati' bene enu rri'i nze'ca lu Diose. 42Nu titse bee bene enu liqui' masia tucu basu inza luhua lunú necahua bee benea, li'á nia luhua nú dete' Diose premio lubee bene ze'e.

will be added

X\