San Marcos 8

1Tucu bichia uyetesa' zeca huaxi bee bene lu Jesuse nu lecaxi lu'cu beei acu beei, che ubixia Jesuse bee bene'nu nu uninu lubeella: 2―Ru'u arquia bee benequie', xne nucua'a labeei chuna bichia cuna li'á nu lecaxi lu'cu beei ca'a acu beei. 3Tunu xe'laa beei nú yue beei enza ni' beei nu la acu beei nu' modo nú chiula' beei lu inziu xne nu' beei enu nze'ta enza istu. 4Chequie ucuaqui bee bene'nu nu uni beella lunu: ―¿Cá chiu'u nú acu bee benequie' ca'a luhuare elu lecalí ti nu'? 5Che unidichia' Jesuse lubeella nú uninu: ―¿Xala pá rlu'cuhua? Nu ucuaqui beella: ―Rlucuru achine. 6Chequie unibiya' Jesuse nú cua'a bee bene ze'e lu yuu nu una'tsenu achi pá ze'e, nu udete'nu che'tsalá lu Diose equie cuenda' pá cua', nu chu udete'nue ya bee bene'nu para nú ritsi' beellae lubee bene ze'e. 7Le'ca rlu'cu bee bene'nu lle'na bee bela nu udete'nu che'tsalá lu Diose equie cuenda' bela ze'e, nu unibiya'nu nú ritsi' bee bene'nu bee bela cua' lubee bene ze'e. 8Ye bee bene ze'e udacu beei hasta nú ubela' beei nu uzucu sobrasca' achi llume bee pedaso nú uya'na udacu beei. 9Neca tucu tacu mili bee bene enu udacu ze'e nu chu uni Jesuse lubee bene ze'e nú nzanu. 10Che chu uyu'u Jesuse liñi barco cuna bee bene'nu nu nzuebeella lu iliu Dalmanuta. 11Ze'e uriña bee fariseo nu uquixie beei rnixuu beei cuna Jesuse, para nú ri'i beei preo li'inu, che unacu'beei nú ri'inu tucu milagro nú lube' nú nze'tanu lu cuenda' Diose. 12Nu hasta aquié utsii arqui' Jesuse nú uninu: ―¿Xi nú niarqui'hua nú ri'á tucu milagro? Neli nia luhua nú la ri'á ni' tucu milagro luhua. 13Chequie utsa'nanu bee bene ze'e nu uyu'u zecanu liñi barco cuna bee bene'nu nu chu nzuebeella stucu chú inzatu'. 14Uzañi' bee bene' Jesuse a uya' beella nú acu beella nuya'tsia beella tucu pá liñi barco ze'e. 15Che uni Jesuse lubeella: ―Ubi'yahua li'ihua, lu levadura' bee fariseo cuna levadura' Herodes. 16Nu uquixie beella uni beella lusa'beella: ―Uninu scua xne la lu'cua'ahua pá. 17Pero uri'i Jesuse beya' lunú rni beella, nu uninu lubeella: ―¿Xi nú rnihua nú la lu'cuhua pá? ¿Xie' lasca'lí ri'ihua beya' la? ¿Xie' ni' teme' la ri'ihua beya' la? 18Nzucu i'culuhua pero pianu la lañi'hua, nzucu diacahua pero pianu la yene'hua ¿Xie' la llucu' arqui'hua, 19chenu uritsia ayu' pá lu ayu' mili bee bene la? ¿Nu xala llume lunú uzucu sobra uquiete'sa'hua? Nu ucuaqui beella: ―Chi'chiucune. 20Che uni Jesuse lubeella: ―Chenu uritsia achi pá lu tacu mili bee bene, ¿xala llume uri'ichehua lunú uquiete'sa'hua? Nu ucuaqui beella: ―Achi llumene. 21Chequie uninu lubeella: ―¿Xie' lasca' ri'ihua beya' nee la? 22Chenu uriña beella eyeche Betsaida, uriñayu bee bene tucu niyu enu niquie'lu lu Jesuse, nu uziquie bee bene ze'e lunu nú ti'nu yanu lu niyu ze'e. 23Che una'tse Jesuse ya niyu ze'e nu unguya'nu li'i ru'u eyeche ze'e. Nu uti'nu xenenu i'cului, nu uricu'nu yanu equiei nu unidichia'nu lui tunu ri'yalai lle'na. 24Nu uquixie nú ri'ya, niyu ze'e nu uni: ―Rlañia bee bene nú sebeei. Pero rnaa beei xi rnaa aca. 25Chequie uti' zeca Jesuse yanu i'cului, nu uninu lui nú bi'yai tucutsia luhuare nu uquixie nú ulañi' nze'ca'i yeene. 26Che uni Jesuse lu niyu ze'e nú yai enza ni'i, nu unibiya'nu nú la chu'i eyeche ze'e cuna nú la ixiule'i lu ni' tucu bee bene nú xa uyeca i'cului. 27Lu lá bee nucua', nza Jesuse cuna bee bene'nu lubee eyeche lu iliu Cesarea de Filipo. Chenu nzuebeella lu inziu, unidichia' Jesuse lubee bene'nu nú uninu: ―¿Ti rni bee bene nú necaa? 28Chequie ucuaqui beella nú uni beella: ―Nu' bee bene enu rni nú necalu Juan Bautista, nu nu' bee bene enu rni nú necalu profeta Elías, nu nu' bee bene enu rni nú necalu tucu bee profeta hua'tu. 29Che uninu lubeella: ―Li'i quiehua, ¿ti rnihua nú necaa? Nu ucuaqui Pedro nú unilla: ―Li'ilu necalu Cristo enu uxe'la Diose. 30Pero unibiya' Jesuse nú la ni beella nú ti necanu lu ni' tucu bee bene 31Chequie uquixienu nú udixiule'enu lubee bene'nu nú uninu: ―Li'á Bene enu uxe'la Diose chiqui' nze'ta nú nehuana zecaa, cuna nú la yu' arqui' bee usticia' bee bene Israel li'á, ni'bee ule'ya enu rnibiya' lu beelá bee ule'ya ni'bee ulaxcuela enu reca ley' Moisés, úti bee benecua' li'á, pero bichia rriuna huañi zecaa. 32Chiqui' neli udixiule'e nze'canu lubeella lu cuenda' nucua'. Chequie unguya' Pedro li'inu tucu chu ze'e nu unilla lunu nú la nia'nu scua. 33Che ubelleta Jesuse nu ubi'yanu lubee bene'nu, nu uqui'ya' Pedro uri'inu, nú uninu lulla: ―¡Ulluna' lua beze'lu! Xne elliebacu' nú rri'ilu scua la ye'ta nucua' lu Diose, rri'i tsialu elliebacu' tucu nú neca elliebacu' bee bene iliulabe. 34Chequie ubixia Jesuse bee bene'nu cuna beelá bee bene enu nucua'a ze'e, nu uninu lubeei: ―Tunu nu' bee bene enu niarqui' nú aca benea, la ri'illa tucu nú necatsia elliebacu'lla, rqui'ña nú riqui'lla beenú nehuana zecalla che chu ye'ta quieella li'á. 35Xne bee bene enu niarqui' másela lunú nehuañi lu iliulabe quie' enta bichia nú nitilu nucua', pero bee bene enu ati equie nú neca beei benea cuna equie nú uzucu'beei nú rni Stichia' Diose, lu'cu nze'e nú huañi nze'e lu Diose. 36Lecaxi zibi' nú ri'i bee bene ana ye lunú nu' lu iliulabe, tunu unitilulla lu Diose. 37Xne leca modo, nú tsi bee bene nú huañilla liñibe. 38Tunu tu' tucu bene li'á cuna nú rni stichia'a lubee bene enu rlu'cu dula, cuna nú la chequiee beei inziu' Diose le'ca Li'á Bene enu uxe'la Diose tua bee benecua' chenu riña zecaa cuna lunú rnibiya' Pa liñibe cuna bee ángele'nu.

will be added

X\