San Marcos 6

1Chequie uchiu'u Jesuse ze'e, nu ubenchila'nu lachinu cuna bee bene'nu. 2Chenu uriña bichia nú sulachi bee bene uquixie Jesuse nú sete'nu bee bene liñi indu' bee bene Israel, che ye bee bene enu riene' nú rninu, chiqui' uyanu arqui'beei nu unibeei lu sa'beei: ―¿Cá unga nucua' huaxi nú sete' nucua' scua? ¿Nu cá uhua nucua' nú reca elliebacu' nucua' scua cuna bee milagro nú rri'i nucua'? 3¿La nu nucua' neca enu rri'i riña' ru'u bangu nu neca nucua' lliana' María, nu neca bichi nucua' Jacobo, cuna José, cuna Judas cuna Simón la? ¿Le'ca esquie nucua'a bee zana nucua' eyeche quie'? Enze'e lá chili arqui'beei li'inu. 4Che uninu lubee bene ze'e: ―Catse rlu'cu bee bene ula'na lu tucu profeta. Pero la lu'cu bee bene lachilla ula'na lulla, cuna bee bene ni'illa cuna bee sa'lla. 5Enze'e né aca a ri'inu huaxi milagro lachinu uricu'tsianu yanu equie chiucu chuna bee bene enu riti nu uri'iyecanu bee bene ze'e. 6Chiqui' uyanu arqui' Jesuse, nú né chili arqui' bee bene lachinu li'inu. Che chu uyanu bee eyeche axu ze'e nu uzete'nu bee bene ze'e. 7Chequie ubixia Jesuse chi'chiucu bee bene'nu, nu uxe'lanu chiucua chiucua beella. Nu udete'nu poder lubeella para nú aca beella hua beella bee benechiqui' arqui' bee bene. 8Che unibiya'nu nú lecaxi uya' beella para lu inziu, la uya' beella biti nu la uya' beella pá nú acu beella nu la uya' beella dimi, uya'tsia beella tucutsia xca beella. 9Cuna lucutsia beella nú niquie'e beella nu cuna xucu beella nú nutu tsia beella. 10Le'ca uni Jesuse lubeella: ―Chenu riñahua ni'i tucu bene uya'natsiahua ni'i bene ze'e hasta nú chiu'uhua eyeche ze'e. 11Tunu tucu eyeche la yucu arqui' bee bene li'ihua cuna nú la niarqui'beei yene' beei nú rnihua, uchiu'uhua eyeche ze'e nu ri'quihua yuu be'cha' nú nu' cuchiu'hua, xi neca tucu seña nú lá zucu'beei nú unihua. Ixiule'a luhua nú bichia chenu dete' bee bene cuenda lu Diose másela dete' Diose castiya lubee bene cua' lunú dete'nue lubee bene eyeche Sodoma cuna Gomorra. 12Che chu nzue bee bene'nu nu nzetixiule'e beella lubee bene nú che'e arqui' bee bene lu cuenda' stulabeei. 13Le'ca uhua beella huaxi bee benechiqui' arqui' bee bene cuna nú udu' beella aceite equie bee bene enu riti nu uri'iyeca beella bee bene ze'e. 14Chequie ubene' arre Herodes nú chiqui' rni bee bene lu cuenda' Jesuse, catse bee luhuare ze'e. Nu uni Herodes: ―Pia nú Juan Bautista uhuañi zeca nee, enze'e rlu'culla poder nú rri'illa bee milagro scua. 15Pero texcua'a bee bene rni: ―Neca nucua' profeta Elías. Nu texcua'a bee bene rni: ―Neca nucua' tucu bee profeta hua'tu. 16Chenu ubene' arre Herodes nucua' unilla: ―Juan Bautista nucua' li'á unibiya'a nú uru'u lluca equiella nu uhuañi zecalla nee. 17Uni Herodes scua xne unibiya'lla nú ulluna Juan nu uyaca'cuulla cuna cadena nu uyu'ulla ni'cu' equie cuenda' Herodías una'a Felipe bichi Herodes. Pero uyucu Herodes una'a Felipe bichilla. 18Nu unilá Juan lu Herodes: ―La neca nze'ca nú yuculu una'a bichilu. 19Chequie chiqui' uhuana arqui' Herodías Juan, nu niarqui'nchu nú útinchu li'illa pero leca modoe. 20Xne nediya' Herodes nú neca Juan tucu bene enu neli rri'i tucu nú necane cuna nú necalla tucu bene enu nehuañi nze'ca lu Diose, enze'e ulliqui Herodes Juan. Nu né zelalla nú ri'i Herodías lunú niarqui'nchu lu Juan, nu añinzuca nú chiqui' riu' arqui'lla lunú rni Juan pero la ri'illa beya' xa ri'illa. 21Pero chenu uriña bichia nú uyu'u modo nú niarqui' Herodías nú ri'inchu, unga nucua' chenu ullu'cu arre Herodes lana, chequie uri'i arre Herodes tucu eliñi'lla nu udete'lla nú udacu bee bene enu rnibiya' cuna bee bene enu rnibiya' lubee sundado, cuna beelá bee bene enu neca equie lubee bene Galilea. 22Che uyu'u xinchiu'cu Herodías elu reca eliñi ze'e nu chu uye'enchu. Chiqui' uyu' arqui' Herodes cuna bee bene enu nezene' ze'e nú xa uye'enchu nu uni arre Herodes ze'e lunchu: ―Una'cu' tatse lunú niarqui'lu lua, nu li'á liquine. 23Chequie uquie'e arre Herodes diose'lla nú dete'lla lunchu lunú nacu'nchu mase arli'ti lunú rnibiya'lla lu. 24Nu chu uchiu'unchu eli'ya' nu unidichia'nchu lu na'nchu Herodías nú uninchu: ―¿Xi nacua lu arre quie'? Che uni na'nchu Herodías: ―Una'cu' lluca equie Juan Bautista. 25Nu yexetsia uyu'u zecanchu elu nzucu arre Herodes nu uninchu lulla: ―Niarquia nú nee inza liqui'lu lu tucu pliatu lluca equie Juan Bautista. 26Che chiqui' nehuana utsu arqui' arre Herodes. Pero lu nú uquie'elalla diose'lla lu ye bee bene enu nezene' ze'e, leca' modo nú acaalla lunú unacu'nchu. 27Chequie unibiya' arre Herodes lu tucu sundado nú ye'tayui lluca equie Juan Bautista. 28Nu chu nza sundado ze'e liñi ni'cu' nu uchiecu'i lluca equie Juan uricu'i lu tucu pliatu nu unguya'i nu udete'i yanchu nu chu udete'nchue ya na'nchu Herodías. 29Chequie chenu ubene' bee bene enu uyaquie Juan nucua', uya beei uya tucu beei cuerpo' Juan nu ucachi' beei cuerpo'lla liñi tucu eluhua. 30Cheelá chenu ubenchila' chi'chiucu bee bene' Jesuse, udixiule'e beella lunu lu ye nú uri'i beella cuna nú uzete' beella bee bene. 31Nu uni Jesuse lubee bene'nu: ―Uteehua, ne cha'ahua tucu luhuare elu lecati nu' para nú tsulachia'ahua ze'e lle'na. Uninu scua xne huaxi bee bene rriña lunu nu xiu'u beei nziue beei hasta nú né llu'cha acununu bee bene'nu. 32Che uyu'u Jesuse cuna bee bene'nu liñi tucu barco nu nzuebeella tucu luhuare elu lecalí ti nu'. 33Pero ulañi' huaxi bee bene nú uchiu'u barco' beella nza nu uyu'ulu bee bene cua' li'ibeella. Che uchiu'u ye bee bene eyeche ze'e nu nzue e'ya tsia beei nu uriña rlutia'la beei elu riña Jesuse cuna bee bene'nu. 34Chenu ulaca Jesuse liñi barco ze'e ulañi'nu nú nucua'ala huaxi bee bene ze'e. Chiqui' uhua'a arqui'nu li'ibeei xne neca beei xi neca bee sanchi enu lecati ri'i ucu nu uquixienu nú uzete'nu li'ibeei huaxi bee bedichia'. 35Chenu unga uchee, uyabica bee bene' Jesuse lunu nu uni beella: ―Ucheela nee, nu leca ni'tucu ni' bee bene ca'a. 36Uni'i lubee benecua' nú yue beei lubee ranchu cuna lubee eyeche axu ca'a, para nú tsii beei lle'na nú acubeei. 37Pero uni Jesuse lubee bene'nu: ―Li'ihua de'tehua nú acu bee bene quie' Che uni bee bene'nu lunu: ―¿Pero xie' che tsia'hua chiucu ayu'u dimi denario pá, acu bee bene quie' la? 38Chequie uni Jesuse lubeella: ―¿Xala pá rlu'cuhua? Uya bi'yahua xala pá nu'. Chenu uri'i beella beya' nú xala pá nu' uni beella lunu: ―Nu' ayu' pá cuna chiucu bela. 39Che unibiya' Jesuse nú cua'a bee bene ze'e texcua'a texcua'a beei lu ixi xata niye'e ze'e. 40Chequie ucua'a tucu ayua tucu ayua beei luhuare ze'e nu ucua'a se cincuentaa se cincuentaa beei. 41Nu una'tse Jesuse ayu' pá ze'e cuna rucu bela ze'e nu ubi'yanu enza liñibe nu udete'nu che'tsala lu Diose, nu chu ule'enu ayu' pá ze'e cuna rucu bela ze'e udete'nu ya bee bene'nu para nú ritsi' beella bee pá cua' cuna bee bela lu ye bee bene ze'e. 42Udacu ye bee benecua' hasta nú ubela' beei. 43Nu urichesca' beella chi'chiucu llume bee pedaso bee pá cuna bee pedaso bee bela enu uya'na lunú udacu beei. 44Leta ye bee bene enu udacu ze'e nucua'a ayu' mili bee niyu. 45Chequie unibiya' Jesuse nú uyu'u bee bene'nu liñi barco para nú chu chue beella stucu chú inzatu' elu nchiucu' eyeche nú lee Betsaida. Pero uya'nasca'nu ze'e para nú ninu lubee bene enu nucua'a ze'e nú nzanu. 46Chenu ulaxu nú uninu lubee bene ze'e nú nzanu, che chu nzanu tucu dañi nu unacu'nu lu Diose ze'e. 47Pero chenu uyu'u rula', nzusca' Jesuse dañi ze'e. Nu nzala barco' bee bene'nu labe inzatu', 48chenu ulañi'nu nú chiqui' neriña' tsenuu bee bene'nu barco' beella xne reca bii enza lubeella. Che uchiu'unu ellicabe ze'e nu utsenu lu inzatu' ze'e, nu uri'inu tucu nú nze detenu lubeella. 49Pero chenu ulañi' bee bene'nu nú seenu nze'tanu lu inzatu' ze'e, uri'i beella elliebacu' nú necanu tucu arma' bene unguti nu urixialibeella. 50Xne ulañi' ye beella li'inu nu ulliqui beella, pero chu uninu lubeella: ―¡Utsu naaqui arqui'hua li'á nucua' la lliquihua! 51Che uyu'u Jesuse liñi barco' beella nu chu ungaxee bii. Chiqui' uyanu arqui' bee bene'nu nucua'. 52Xne ni'lá ri'i beella elliebacu' equie milagro nú uri'inu chenu uritsi'nu bee pá lubee bene lunú nacu'sca' nchiñi elliebacu' beella. 53Chequie udete beella stucu chú inzatu' ze'e nu uriña beella lu iliu Genezaret nu ullica'cuu beella barco' beella ru'u inzatu' ze'e. 54Hora chenu uchiu'u beella liñi barco' beella uyu'ulu bee bene Jesuse. 55Che uya bee bene ze'e nu udixiule'e beei lubee bene diqui bee luhuare enza ze'e, nu uquixie bee bene uyayu bee bene, bene enu riti nchiucu' lu camiya elu riene' beei nú nzu Jesuse. 56Catse elu uya Jesuse sianu necane bee eyeche lla'na urre necane bee eyeche llene urre necane bee ranchu udixiu bee bene cua' bee bene enu riti elu udete Jesuse. Chequie uziquie bee bene enu riti ze'e lunu nú zelanu nú ti'yabeei masia ru'u xucunu; nu ye bee bene enu uti'ya ru'u xucu Jesuse uyeca' bee bene ze'e.

will be added

X\