San Marcos 5

1Chenu uriña beella stucu chú inzatu' ze'e, lu yu'u bee bene eyeche Gadara. 2Hora nú uchiu'u Jesuse liñi barco ze'e uyacha'calu tucu niyu enu nchiñi benechiqui' arqui' li'inu, uchiu'u niyu quie' liñi pantiuñi. 3Xne siempre nehuañi niyuquie' leta bee eluhua' bee bene nguti. Nu lecati ri'i ana lui, mase nú ullica'cuu bee bene li'i cuna cadena. 4Huaxi bese ullica'cuu bee bene cadena yai cuna cuchiu'i, pero chu uchiecu'i cadena nu unga pedasue, nu lecati ri'i ana lui. 5Bichia si rula' enzei leta bee eluhua' bee bene nguti cuna liñi dañi, rixialii nu uchiecu'i li'i cuna quiee. 6Pero chenu ulañi'i Jesuse, nú entanu istusca' chequie xexu'i nze cha'calui li'inu, nu chu utsulliquii lunu. 7Che juerte urixialii nu uni: ―¿Xinu riu'ulu cuna li'á Jesuse lliñi Diose liñibe? Ziquia lulu nú la du'lu nú nehuana zecaa. 8Uni niyucua' scua, xne rnila Jesuse nú rninu: ―¡Benechiqui' uchiu'u arqui' niyu cua'! 9Chequie unidichia' Jesuse lu niyu ze'e nú uninu: ―¿Ti leelu? Che ucuaqui niyu ze'e: ―Li'á lea Legión xne huaxi necaru. 10Chiqui' uziquiee niyu ze'e lu Jesuse, para nú la xe'lanu bee benechiqui' ze'e enza istu luhuare ze'e. 11Axu dañi ze'e nucua'a huaxi bee cuchi enu racu bee huañi. 12Chequie uziquiee bee benechiqui' ze'e lu Jesuse nú unibeei, uzela nú chu'uru arqui' bee cuchi cua'. 13Che uzela Jesuse nú uchiu'u bee benechiqui' arqui' niyu ze'e, nu uyu'u beei arqui' bee cuchi. Neca bee cuchi quie' tucu chiucu mili beeí. Nu uyecaxu'u beeí nu utsundiqui beeí ru'u qiuee laa nu uzana' beeí hasta lu inza nu chu unguti beeí lu inza ze'e. 14Hora ze'e uyecaxu'u bee bene enu rriucu bee cuchi ze'e nzetixiule'e beei lubee bene eyeche ze'e cuna lu ye bee bene enza ze'e lunú unga. Che uyabi'ya huaxi bee bene lunú unga ze'e. 15Chenu uriña bee bene ze'e elu nzu Jesuse, ulañi' beei nú uyeca'la' niyu enu ulletse benechiqui' arqui' cuna nú nutulai xucui nzucui ze'e. Nu chiqui' ulliqui bee bene ze'e. 16Che bee bene enu ulañi' nú xa unga lu niyu enu ulletse benechiqui' arqui' cuna nú xa unga lubee cuchi, udixiule'e beei nucua' lu beelá bee bene. 17Chequie uquixie beei nú uziquiee beei lu Jesuse para nú chiu'unu lu iliu'beei. 18Chenu nze chu'u Jesuse liñi barco uyabica niyu enu ulletse benechiqui' arqui' lunu, nu uziquiei lunu para nú chenunu li'i. 19Pero né zela Jesuse nú chenunu niyu ze'e nu uninu lui: ―Uya'a ni'ilu para nú zucunulu bee bene'lu, nu ixiule'elu lubeei lu ye nú uri'i Diose cuna li'ilu, nu cuna nú uhua'a arqui'nu li'ilu. 20Chequie chu nza niyu ze'e, nu uquixiei udixiule'i lubee bene lu iliu Decápolis, lu ye nú uri'i Jesuse lui. Che ye bee bene ze'e uyanu arqui' lu cuenda' nucua'. 21Chenu uriña zeca Jesuse stucu chu inzatu' ze'e liñi barco, uyetesa' huaxi bee bene lunu ze'e. Che uya'nanu ru'u inzatu' ze'e. 22Chequie uriña tucu bene enu rnibiya' liñi indu' bee bene Israel lunu, leella Jairo. Chenu ulañi'lla Jesuse utsu lliquilla lunu. 23Nu chiqui' uziquieella lunu nú unilla lunu: ―Mero ati endua chaa nee ricu'lu yalu equie endua para nú yeca'nchu nu la atinchu. 24Che nzenu Jesuse li'illa enza ni'lla nu nzequiee huaxi bee bene li'inu hasta nú uta'cu bee bene li'inu ze'e. 25Leta bee bene ze'e nza tucu una'a enu riti, ungala chi'chiucu lana nú rlaca rene li'inchu. 26Chiqui' nehuana ulle'ca una'a quie' nu uyanchu lu huaxi bee doctor, hasta nú ula'xunchu ye bee stene'nchu ungüitinchu. Pero né aca bee doctor a ri'iyeca li'inchu, a'la mase rri'i elichia'nchu. 27Enze'e chenu ubene' una'a quie' lu cuenda' Jesuse, che uyabicanchu di'chinu leta bee bene nu uti'nchu yanchu tsu' xucunu. 28Xne uri'inchu elliebacu': “Tunu ti'yaa tsu' xucunu, scua yecaa uri'inchu elliebacu'.” 29Hora ze'e utsuxee nú rlaca rene li'inchu nu utsi'nchu nú uyeca'la'nchu. 30Che uri'i Jesuse beya' nú uriyecanu tucu bene cuna poder'nu, nu ubelletanu ubi'yanu lubee bene ze'e nu uninu: ―¿Ti uti' yaa tetsu' xucua? 31Nu uni bee bene' Jesuse lunu: ―Nediya'lu nú nucua'a huaxi bee bene ca'a rta'cu li'ilu: ¿Xinu rnidichia'lu nú tii uti' yaa tsu' xuculu? 32Pero ri'yasca' Jesuse diqui abenchila'nu para nú lañi'nu tii uti'yaa tsu' xucunu. 33Chequie chiqui' reca tse'tse una'a ze'e nú xiquinchu xne nediya'nchu lunú uri'inchu, nu uyabicanchu lu Jesuse, che chu utsu lliquinchu lunu, nu uninchu ye nú ulle'canchu lunu. 34Che uni Jesuse lunchu: ―Endua lunú uchili arqui'lu li'á enze'e uyeca'lu, uquia'a nu la lliquilu uyeca'li'lu elichia nú ulle'calu nee. 35Rnisca'la Jesuse lu una'a ze'e chenu uriña bee bene enu nucua'a ni'i Jairo nu unibeei lu Jairo: ―Unguutila endu'lu nee. La nia'lu lu maestro. 36Pero chenu ubene' Jesuse lunú uni bee bene ze'e. Che uninu lu Jairo: ―La lliquilu uchilitsia arqui' li'á. 37Pero né zela Jesuse a chaa bee bene ze'e cuna li'inu ni' Jairo. Nzenutsianu Pedro, cuna Jacobo cuna Juan bichi Jacobo. 38Chenu uriña beella ni'i Jairo, ulañi' Jesuse nú nixi bee bene nu rixiali beei cuna nú runa' beei. 39Chequie uyu'u Jesuse liñi ni'i Jairo nu uninu lubee bene ze'e: ―¿Xinu nixihua cuna nú runa'hua? Né ati endu' quie' ratse tsianchu. 40Pero ulli'chinuu bee bene ze'e li'inu, nu unibiya'nu nú chiu'u ye bee bene ze'e eli'ya', nu uyu'u nutsianu pa' endu' ze'e cuna na'nchu cuna bee bene'nu elu nchiucu'nchu. 41Che una'tse Jesuse ya endu' ze'e, nu uninu lunchu: ―Talita, cumi ―rni bedichia' quie': Endu', nia lulu nú, uzetee nee. 42Hora ze'e uzetee endu' ze'e nu utseenchu, nza endu' quie' chi'chiucu lana, che chiqui' uyanu arqui' yebee bene ze'e nucua'. 43Pero unibiya' Jesuse nú la ixiule'e beella lu ni' tucu bee bene nú ungae scua. Le'ca unibiya'nu nú dete' beella nú acu endu' cua'.

will be added

X\