San Marcos 2

1Xiucu xuna bichia lu ze'e, uyu'u zeca Jesuse eyeche Capernaum nu ungabiya' bee bene ze'e nú nzucunu tucu ni'i. 2Che yexetsia uyetesa' huaxi bee bene ru'u ni'i elu nzucunu ze'e, nu uchee liñi ni'i ze'e, ni' ru'u puerta la aca' riña beelá bee bene, nu udixiule'enu Stichia' Diose lubee bene ze'e. 3Ze'e uriñayuu tacu bene enu nuya' tucu niyu enu neati cuerpo'. 4Pero né ri'i beei ana nú a riña beei hasta lu Jesuse, xne nucua'a huaxi bee bene liñi ni'i ze'e. Enze'e uxa'la beei equie ni'i ze'e, nu cuna camilla ulaca beei niyu enu riti ze'e hasta elu nzu Jesuse. 5Chenu ulañi' Jesuse nú nzeli arqui'beei li'inu, che uninu lu niyu enu riti ze'e nu uninu: ―Niyu uri'á perdona stulalu nee. 6Pero ze'e nucua'a bee ulaxcuela enu reca ley' Moisés nu uri'i beei elliebacu' nú unibeei: 7“¿Ti neca nucua'? Nú rni nucua' tucu nú neca nucua' Diose. Xne tucutsia Diose rri'i perdona xtula bee bene.” 8Pero hora ze'e uri'i Jesuse beya' lunú rri'i beei elliebacu'. Enze'e uninu lubeei: ―¿Xinu uri'ihua ellibacu' scua? 9¿Ta nú mase neriña' nú aca nú nia lulla: “Uri'á perdona xtulalu”, urre nia lulla: “Uzetee, nu una'tse camiya'lu nu uquia'a”? 10Pero nee lubea luhua nú li'á Bene enu uxe'la Diose rlu'cua nú rnibiya'a lu iliulabe, para nú ri'á perdona stula bee bene. Uni Jesuse lu niyu enu riti ze'e: 11―Nia lulu nú uzetee nu una'tse camiya'lu nu uquia'a ni'lu nee. 12Hora ze'e uyeca' niyu ze'e nu una'tsei camilla'i nu chu uchiu'i liñi ni'i ze'e. Ulañi' ye bee bene enu nucua'a ze'e nucua' nu unibeei bedichia' nze'ca lu Diose. Nu chiqui' uyanu arqui' ye bee benecua' lunú ulañi' beei nu unibeei. ―Lasca' lañia'hua ni' tucu bese lunú ulañia'hua nee. 13Cheelá nza zeca Jesuse ru'u inzatu' Galilea. Ze'e uyetesa' huaxi bee bene lunu nu uzete'nu li'ibeei. 14Chenu udetenu ze'e, ulañi'nu Leví necai lliana' tucu bene enu lee Alfeo. Leví quie' nzucui elu rri'i cubre equie bee impuestos lubee bene nu uninu lui: ―Ute quie li'á. Nu chu utsuli Leví nu nzai cuna li'inu. 15Chenu nzucu Jesuse lu mexa liñi ni'i Leví, cuna bee bene'nu udacununu huaxi bee bene enu rri'i cubre equie bee impuestos cuna bee bene enu la nehuañi tucu nú rnibiya' ley' Moisés, xne nzequie huaxi bee bene cua' li'inu. 16Chequie nucua'a chiucu chuna ulaxcuela enu reca ley' Moisés cuna bee fariseo enu ulañi' nú racunuu Jesuse bee benecua'. Che unibeei lubee bene'nu: ―¿Xinu racunuu maestro'hua cuna bee bene enu rri'i cubre equie bee impuesto? ¿Cuna bee bene enu la nehuañi tucu nú rnibiya' ley' Moisés? 17Chenu ubene' Jesuse nucua', uninu lubee bene cua': ―Bee bene enu la aca riti, la zecala'cha' bee nze'e tucu doctor. Pero bee bene enu riti, rqui'ña bee nze'e tucu doctor. Enze'e nzela nee, para nú bixia bee bene nú che'e arqui'beei lu dula nú rlu'cu beei. Lá yela lubee bene enu rri'i elliebacu' nú la lu'cu dula. 18Tucu bichia udete' bee bene' Juan Bautista cuna bee fariseo bichia nú né acu beella equie nú rlu'cu beella ula'na lu Diose, nu uriña chiucu chuna bee bene lu Jesuse nu unibeei lunu: ―Udete' bee bene' Juan cuna bee fariseo bichia nú né acu beella equie nú rlu'cu beella ula'na lu Diose. ¿Xiquie nú la ri'i bee bene'lu scua? 19Chequie ucuaqui Jesuse lubee bene ze'e nú uninu: ―¿Xie' la acu bee bene enu nezene' lu tucu tsa'a chenu xia tucu bene chenu nzucusca' bene enu xia ze'e la? Lunú nzusca' bene enu xia ze'e. Enze'e rqui'ña nú acu bee bene ze'e. 20Pero riña bichia chenu la nzua' bene enu xia cuna bee bene. Che si dete' beella bichia nú la acu beella equie nú rlu'cu beella ula'na lu Diose. 21’Lecati quiela' tucu laquie uxu cuna tele'e laquie cuqui xne chenu uxu' laquie cuqui ri'i nú tsaa laquie uxu. 22Le'ca la chu'u biñu cuqui liñi iti uxu xne ri'i biñu cuqui cua' nú tsaa iti uxu, che nitilu biñu cua'a cuna iti uxu. Enze'e rqui'ña nú chu'u biñu cuqui liñi iti cuqui. 23Tucu bichia nú sulachi bee bene, udetenu Jesuse bee bene'nu lu yuu elu nu' trigo nu uquixie bee bene'nu unguxi beella tuu lu trigo. 24Chequie unibee fariseo lu Jesuse: ―Bi'yacuru, ¿xiquie nú rri'i bee bene'lu lunú la yala ri'i beella bichia nú sulachi bee bene? 25Pero uni Jesuse lubeei: ―¿Xie' lasca' ulahua elu rni nú xa uri'i David cuna bee bene enu nuulla tucu bese chenu ulia'na' beella la? 26Tiembu nú unga Abiatar ule'ya, enu rnibiya' lubee ule'ya uyu'u David liñi indu' Diose nu udaculla pá nú necale'ya lu Diose. Añinzuca nú ule'yatsia nu' modo nú acu pá cua'. Pero udete'lla pácua' udacu bee bene enu nuulla. 27’Ureche' Diose bichia nú sulachi bee bene, pero lá reche'enu bichia cua' para nú nehuana zeca bee bene bichia cua'. 28’Li'á Bene enu uxe'la Diose le'ca rlu'cua nú rnibiya'a lu bichia nú sulachi bee bene.

will be added

X\