San Marcos 16

1Chequie chenu udete bichia nú sulachi bee bene Israel, María Magdalena, cuna Salomé, cuna María na' Jacobo, uya tsi' beenchu perfume para nú du' beenchu perfume cua' cuerpo' Jesuse. 2Nu chenu uye'e lu yuu zila' domingo silatu' uya beenchu ru'u eluhua' Jesuse, chenu enta liñi bichia. 3Chenu nzue beenchu lu inziu uni beenchu lu sa'beenchu: ―¿Ti yucu quiee llene nú nacu' ru'u eluhua' Jesuse nee? 4Pero chenu ubi'ya beenchu ulañi' beenchu, nu la nacua' quiee llene ze'e ru'u eluhua. 5Chenu uyu'u beenchu liñi eluhua ze'e, ulañi' beenchu, nú nzucu tucu niyu e'ne' chubee ru'u eluhua ze'e, nutui tucu laquie niquichi nú stuñi, nu ulliqui beenchu. 6Che uni lubeenchu: ―La lliquihua. Nediyaa nú rla'nahua Jesuse bene eyeche Nazaret enu uquiee lu cruse. Pero uhuañi zecanu nú ungutinu. Leca'nu ca'a. Ubi'yacuruhua elu uricu cuerpo'nu. 7Nee uquia tixiule'ehua lu Pedro cuna lu beelá bee bene' Jesuse nú rlutinu nzanu Galilea, cheela riñahua ze'e; nu lañi'hua li'inu ze'e tucu nú uninu luhua. 8Chequie yexetsia uchiu'u bee una'a quie' liñi eluhua ze'e, nu reca tse'tse beenchu xiqui beenchu. Nu lecati lu udixiule'e beenchu lunú unga ze'e, equie nú xiqui beenchu. 9Domingo sila' chenu uhuañi zeca Jesuse nú ungutinu, rlutilá ulube'lunu lu María Magdalena enu uhuanu achi benechiqui' arqui'. 10Che uya tixiule'enchu lubee bene enu uyanzenu Jesuse, nu nehuana nzu arqui'beella cuna nú runa' beella equie cuenda' li'inu. 11Pero chenu ubene' beella nú nehuañi Jesuse cuna nú ulañi' María Magdalena li'inu, né chili arqui'beella nucua'. 12Lu ze'e lá ulube'lu Jesuse lu chiucu bee bene'nu enu nza enza dañi, pero urene ulube'lunu lubeella. 13Che uyatixiule'e bee bene quie' lubeelá bee bene'nu, pero ni' nú uni beella né chili arqui' beelá bee bene'nu. 14Lu ze'elá ulube'lu Jesuse lu chetu'cu bee bene'nu, chenu nucua'a beella lu mexa. Uqui'ya' beella uri'inu, xne nziti arqui'beella equie nú la chili arqui'beella lunú unibee bene enu ulañi'la' li'inu nú uhuañi zecanu nú ungutinu. 15Chequie uninu lubeella: ―Uquiahua diqui lu iliulabe nu udixiule'ehua bedichia' nze'ca' Diose lu ye bee bene. 16Nu bene enu chili arqui' bedichia' nze'ca' Diose cuna nú rinzalla tsila'a Diose li'illa, pero bene enu la chili arqui' Stichia' Diose la tsila'a Diose li'illa lu castiya'lla. 17Nu bee seña quie' lu'cu bee bene enu chili arqui' Stichia' Diose. Equie nú leea hua beella bee benechiqui' arqui' bee bene. Le'ca nibeella stucu dialu rene nú la ni beella. 18Nu tunu na'tse beella be'la cuna yaa beella; nu tunu hue' beella nú nucha veneno, lecaxi zeca beella; nu le'ca chenu ricu' beella ya beella equie bee bene enu riti yeca' bee bene ze'e. 19Chequie chenu ulaxu nú uni Jesuse lubeella, chu uquieenu liñibe nu uzucunu cue'tse Diose chubee. 20Che uchiu'u beella nú nze tixiule'e beella bedichia' nze'ca' Diose lubee bene diqui bee luhuare. Nu uri'i Jesucristo elietsa lubeella, uri'inu bee milagro para nú ri'i bee bene beya' nú neli neca Stichia' Diose nú sete' beella. Amén.

will be added

X\