San Marcos 15

1Chenu uye'e lu yuu uyetesa' bee ule'ya enu rnibiya' lubee ule'ya cuna bee usticia' bee bene Israel cuna bee ulaxcuela enu reca ley' Moisés cuna bee usticia enu mase rnibiya' ubedichia' beella nú xa ri'i beella. Che ullica'cuu beella Jesuse nu udete' cuenda beella li'inu lu Pilato. 2Che unidichia' Pilato lu Jesuse: ―¿Necalu Arre' bee bene Israel la? Nu ucuaqui Jesuse nú uninu: ―Li'á nze'e. 3Equie nú huaxi nú rricu'quiya bee ule'ya enu rnibiya' lubee ule'ya li'inu. 4Enze'e unidichia' Pilato lu Jesuse stucu bese: ―¿Xinu la cuaquilílu? Ubi'yacuru huaxi nú rni bee bene lu cuenda'lu. 5Pero lecaxi ucuaqui Jesuse, che chiqui' uyanu arqui' Pilato. 6Cada chenu reca eliñi baxcu, rla'a Pilato tucu bene enu nchiñi ni'cu', tatse enu nacu' bee bene nú la'a. 7Bee bichia ze'e nchiñi Barrabás ni'cu' cuna beelá bee bene enu neyete'i, xne unguuti beei bee bene chenu uliunu beei bee bene' gobierno. 8Chenu uyetesa' bee bene para nú nibeei lu Pilato nú ri'illa tucu nú neca costumbre'lla, 9che uni Pilato lubeei: ―¿Niarqui'hua nú la'a Arre' bee bene Israel la? 10Uni Pilato scua xne uri'illa beya' nú equie nú ria arqui' bee ule'ya enu rnibiya' lubee ule'ya, enze'e udete' cuenda beei Jesuse lulla. 11Pero bee ule'ya enu rnibiya' lubee ule'ya udu'beei arqui' bee bene ze'e para nú ni bee bene ze'e lu Pilato nú la'alla Barrabás. 12Chequie unidichia' Pilato lubeei: ―¿Xi niarqui'hua nú ri'inua enu rnihua nú neca arre' bee bene Israel? 13Nu ucuaqui beei nú urixialibeei: ―¡Uquie'e nucua'a lu cruse! 14Nu uni Pilato lubeei: ―Pero ¿ta nú necha neca uri'i nucua'? Nu masesca'lá juerte ubixialí beei: ―¡Uquie'e nucua' lu cruse! 15Chequie lunú niarqui' Pilato nú ya'na nze'calla lubeei, ula'alla Barrabás. Nu unibiya'lla nú uzete'che' bee sundado Jesuse, nu chu udete' cuendalla li'inu lubee sundado para nú quie'e beei li'inu lu cruse. 16Unguya' bee sundado ze'e Jesuse labe eli'ya' ru'u palacio, elu uyetesa' ye bee sundado. 17Che ungutu beei tucu laquie morado Jesuse, nu ureche'e beei tucu ellu'ñi' nú necache'e eche uzucu' beei equienu. 18Nu uquixie beei nú rixiali beei lunu: ―¡La laxua' nú nehuañi Arre' bee bene Israel! 19Chequie udu'beei tucu ixi' equienu, nu utsu xene beei lunu, cuna nú utsu lliqui beei lunu, xi neca nú chiqui' rlu'cu beei ula'na lunu. 20Chenu ulaxu nú xitse uri'inu beei li'inu, uhuabeei laquie morado nú nutunu nu ungutu beei nú neca xucunu li'inu, che unguya' beei li'inu para nú quieenu lu cruse. 21Chequie chenu nzeyu beei Jesuse, ulla'ca beei tucu bene eyeche Cirene enu lee Simón necalla pa' Alejandro cuna Rufo nze'talla enza dañi. Che uri'i bee sundado juerza li'illa para nú uya'lla cruse' Jesuse. 22Nu chu unguya' beei Jesuse tucu luhuare elu lee Gólgota, nu rni nucua': lluca equie bene nguti. 23Nu udete' beei biñu nú nucha inza nú nelaa nú lee mirra, para nú hue'nue pero lá hue'nue. 24Chequie uquie'e bee sundado ze'e li'inu lu cruse. Nu urita beei tucu rifa equie cuenda' xucunu bi'ya tane ri'i cada tucua beei ana. 25Rquie quie' sila' uquie'e beei Jesuse lu cruse. 26Equie cruse'nu uquie'e beei tucu letrero nú rixiule'e xi nú uquie'e beei li'inu lu cruse, cuna nú rni lu letrero ze'e nú necanu: “Arre' bee bene Israel.” 27Le'ca uquie'e beei chiucu huana' lu tucua cruse, tucu nze'e cue'tsenu chúbee nu stucu nze'e cue'tsenu chubeca. 28Scua uyalu lunú rni lu ichi' Stichia' Diose nú rni: “Ubacu' beei li'inu leta bee bene enu necha rri'i.” 29Chequie bee bene enu udete ze'e unibeei huaxi bedichia' nú necha neca lunu, cuna nú rcuñi beei equie beei xi'chinu beei li'inu nú rnibeei: ―¡Manú! Rnilu nú chilalu indu llene Jerusalén nu lu chunatsia bichia reche' zecalue, 30utsila'a li'ilu nu ulaca lu cruse cua'. 31Le'ca bee ule'ya enu rnibiya' lubee ule'ya cuna bee ulaxcuela enu reca ley Moisés, unibeei huaxi bedichia' nú necha neca lunu nu unibeei: ―Utsila'a nucua' bee bene, pero la aca nucua' tsila'a nucua' li'i nucua'. 32¡Tunu neca nucua' Cristo puese láca Cristo enu neca arre' bee bene Israel lu cruse para nú lañia'ahua, che chili arquia'ahua nucua'! Hasta bee huana' enu nequie lu cruse cuna li'inu rnibeei bedichia' nú necha neca lunu. 33Chenu unga rrebichia ucabeli diqui neca lu iliulabe hasta rquie chuna uche. 34Hora ze'e chenu unga rquie chuna uche juerte urixiali Jesuse nú uninu: ―Eloi, Eloi, ¿lama sabactani? ―rni bedichia'cua': Diosea, Diosea, ¿xinu utsana' arqui'lu li'á? 35Chenu ubene' chiucu chuna bee bene enu nucua'a ze'e nucua', che unibeei: ―Uquie'e diacahua rixialla profeta Elías. 36Che uyaxu'u tucu beei nu ucuacha nze'e tucu esponja lu inza vinagre nu uzucu'i lli'i tucu aca nu uti'i esponja cua' ru'u Jesuse para nú hue'nu inza vinagre cua' nu uni: ―Utsana'hua li'illa bi'ya se nze'ta laca Elías li'illa lu cruse. 37Pero juerte urixiali Jesuse nu ungutinu. 38Chequie laquie llene nú neru'cu nzi'qui liñi indu llene Jerusalén, utsa arli'ti'llune hasta aya nu hasta aquié. 39Che capitañi enu rnibiya' lubee sundado ulañi'i nú xa unguti Jesuse lunú nzui ze'e nu uni: ―Neli nú neca benequie' Lli'ñi Diose. 40Le'ca istu nucua'a chiucu chuna bee una'a ri'ya, leta bee una'a quie' nzu María Magdalena, cuna Salomé cuna María enu neca na' Jacobo enu ri'chia bene Jacobo enu lle'na, cuna José. 41Bee una'a quie' uyaquie Jesuse cuna nú uri'i beenchu elietsa lunu chenu nzunu Galilea. Le'ca ze'e nucua'a huaxilá bee una'a enu uyaquie li'inu hasta Jerusalén. 42Bichia nú rri'iluxu bee bene Israel ye nú qui'ña beella neca bichia xee nu sulachi beella. Bichia ze'e chenu enta chu'u rula', 43uriña José bene eyeche Arimatea. Ungalla tucu bee usticia lubee bene Israel, nu rlu'cu bee bene ula'na lulla. Le'ca nzuquiella nú lañi'lla lunú rnibiya' Diose, nu uyu'u valuru'lla unacu'lla cuerpo' Jesuse lu Pilato. 44Chequie chiqui' uyanu arqui' Pilato chenu ubene'lla nú ungutila Jesuse, nu chu ubixialla capitañi para nú ri'illa beya' tunu neli nucua'. 45Chenu uni capitañi ze'e nú neli nú ungutila Jesuse, che uzela Pilato nú unguya' José cuerpo'nu. 46Chequie uya José utsii tucu sabana fiño nu chu ulacalla cuerpo' Jesuse lu cruse nu utelalla sabana ze'e cuerpo'nu nu uya ca'chi'lla cuerpo'nu liñi tucu eluhua elu neda'ñila liñi tucu quiee nu utsacu'lla ru'u eluhua ze'e cuna tucu quiee llene. 47María Magdalena cuna María na' José ulañi' beenchu elu uhuachi' cuerpo' Jesuse.

will be added

X\