San Lucas 9

1Uquiete'sa' Jesuse chi'chiucu bee bene'nu, nu udete'nu poder lubeella para nú hua beella ye clasia' bee benechiqui' arqui' bee bene cuna nú ri'iyeca beella bee bene enu riti. 2Uxe'lanu li'ibeella para nú ixiule'e beella xa neca lunú rnibiya' Diose, cuna nú ri'iyeca beella bee bene enu riti. 3Nu uninu lubeella: ―Lecaxi uya'hua para inziu, ni' xcahua ni' biti, ni' pá nu acuhua, ni' dimi, ni' xucuhua para nú che'ehua la uya'hua. 4Tatse ni'i bee bene elu riñahua, uya'natsiahua ni'i ze'e, hasta nú chiu'uhua eyeche ze'e. 5Nu tunu nu' tucu eyeche elu la zela bene nú ya'nahua ni'lla, uchiu'uhua eyeche ze'e nu ri'quihua yuu be'cha' nú nu' cuchiu'hua xi neca tucu seña nú lá yucu arqui'beei Stichia' Diose. 6Chequie uchiu'u beella nu nzuebeella cada tucua eyeche udixiule'e beella bedichia' nze'ca' Diose lubee bene, nu uri'iyeca beella bee bene enu riti. 7Chenu ubene' arre Herodes ye bee milagro nú rri'i Jesuse, la ri'illa beya' ti necanu. Xne nu' bee bene enu rni nú uhuañi zeca Juan Bautista. 8Nu nu' bee bene rni nú profeta Elías ulube'lu. Nu nu' bee bene rni nú necanu tucu bee profeta hua'tu enu uhuañi zeca. 9Pero uni Herodes: ―Li'á unibiya'a nú uru'u lluca equie Juan Bautista. ¿Ti benecua' nú rienea nú rri'illa huaxi bee milagro scua? Nu chiqui' niarqui' Herodes nú lañi'lla Jesuse. 10Chenu ubenchila' bee apóstol' Jesuse, udixiule'e beella lunu beenú uri'i beella. Che unguya'nu beella tucu luhuare elu la nucua'a bee bene axu eyeche Betsaida. 11Pero chenu uri'i bee bene beya', chu nzequie beei li'inu. Nu uya cha'calu Jesuse li'ibeei nu udixiule'enu lubeei xa neca nú rnibiya' Diose, nu uri'iyecanu bee bene enu riti. 12Chenu nze cheela, uyabica chi'chiucu bee bene' Jesuse lunu nu uni beella lunu: ―Uni' lubee benequie' nú yue beei para nú chetsulachi beei nu chéla'na beei nú acu beei lubee eyeche axu ca'a, xne elu nellua'ahua ca'a lecalí xinu'. 13Pero uni Jesuse lubeella: ―Li'ihua ude'tehua nú acubeei. Nu ucuaqui beella lunu: ―Rlu'cutsiaru ayu' pá cuna chiucu bela. Mejora chatsia'ahua nú acu ye bee benequie'. 14Neca tucu ayu' mili bee niyu ze'e. Pero uni Jesuse lubee bene'nu: ―Uni'hua lubeei nú cua'a cincuentaa cincuentaa beei cada tucu luhuare. 15Scua uri'i beella, nu chu ucua'a ye bee bene ze'e. 16Chequie una'tse Jesuse ayu' pá ze'e cuna chiucu bela ze'e, nu ubi'yanu enza liñibe nu udete'nu che'tsa lu Diose, nu ule'enu bee pá ze'e cuna bee bela ze'e nu udete'nu nucua' lubee bene'nu para nú ritsi' beellae lubee bene ze'e. 17Ye bee bene ze'e udacu beei hasta nú ubela' beei. Chenu ulaxu nú udacu beei, uquietesa'sca' beella chi'chiucu llume bee pedaso bee pá le'e cuna bee bela lunú uya'na udacu beella. 18Tucu bichia chenu unacu' li'itsia Jesuse lu Diose nzununu bee bene'nu ze'e. Che unidichia'nu lubeella: ―¿Ti rni bee bene nú necaa? 19Nu ucuaqui beella lunu: ―Nu' bee bene rni nú necalu Juan Bautista. Nu le'ca nu' bee bene rni nú necalu profeta Elías, nu le'ca nu' bee bene rni nú necalu tucu bee profeta hua'tu enu uhuañi zeca. 20Che uninu lubeella: ―¿Nu li'iquieehua ti rnihua nú necaa? Nu ucuaqui Pedro lunu: ―Li'ilu necalu Cristo enu uxe'la Diose. 21Pero uni Jesuse lubeella nú la ixiule'e beella nucua' lu ni' tucu bee bene. 22Nu uninu lubeella: ―Li'á Bene enu uxe'la Diose chiqui' nehuana zecaa, nu lee bee usticia' bee bene Israel lua, cuna bee ule'ya enu rnibiya' lubee ule'ya, cuna bee ulaxcuela enu reca ley' Moisés, uti beei li'á, pero bichia rriuna huañi zecaa stucu bese. 23Che uninu lu ye bee bene: ―Tunu nu' bee bene enu niarqui' nú aca benea, la yala nú ri'itsialla tucu nú necatsia elliebacu'lla. Nu ye bichia riqui'lla lubee nú xi zecalla equie nú necalla benea, nu chu ye'ta quieella li'á. 24Xne bee bene enu másela niarqui' huañi lu iliulabe quie' enta bichia nú laxu nucua'. Pero bene enu ati equie nú necalla benea, lu'culla elunehuañi lu Diose. 25Lecaxi zibi' nú ri'i bene ana ye beenú nu' lu iliulabe, tunu le'ca li'itsialla nze nitilulla li'illa. 26Tunu nu' bene enu tu' li'á cuna stichia'a, le'ca li'á Bene enu uxe'la Diose tua li'illa chenu nzela nú necaa arre cuna lunú rnibiya' paa cuna lunú rnibiya' bee ángele'nu. 27Ixiule'a luhua nu nu' bee bene enu nucua'a ca'a lá atisca', hasta nú lañi' beei xa neca lunú rnibiya' Diose. 28Chenu udete xi neca tucu xmana nú uni Jesuse bee bedichia' cua', uyanu equie tucu dañi unacu'nu lu Diose, nu unguya'nu Pedro, cuna Jacobo, cuna Juan. 29Pero diqui nú rnacu' Jesuse lu Diose uche'e xa rnaa lunu, nu chiqui' unga niquichiu xucunu nu tu'na rulu siqui'i. 30Nu ulube'lu chiucu niyu enu rdichia'nu li'inu ze'e. Bee bene ze'e neca Moisés cuna Elías. 31Nu chiqui' rulu siqui' beella nu rdichia'nu beella Jesuse equie nú atinu nu nehuana zecanu eyeche Jerusalén. 32Añinzuca nú chiqui' riu'u cala' lu Pedro cuna lubee sa'lla, pero né a'tse beella, nu ulañi' beella nú rulu siqui' Jesuse cuna rucu bene enu nzununu ze'e. 33Chenu leca' rucu benecua' elu nzu Jesuse, uni Pedro lunu: ―Maestro, ¡neca nze'ca nú nellua'ahua ca'a para nú reche'ru chuna ranchu, tucue para li'ilu nu stucue para Moisés, nu stucue para Elías! Pero la ri'i Pedro beya' xinu rnilla scua. 34Diqui nú rnilla scua, ulaca tucu xcabe nú utsacu' equie beella, nu ulliqui beella chenu nchiñi beella liñi xcabe ze'e. 35Nu liñi xcabe ze'e uyene tucu chii enu uni: ―Benequie' neca Lli'ñia enu chiqui' se'ca, uzu'cu'hua stichia'nu. 36Chenu ulaxu nú ubene' beella chi enu uni ze'e, ulañi' beella nú stucu li'i Jesuse nzunu ze'e nu né nilí beella. Bee bichia ze'e ni' tucu leca tilu udixiule'e beella lunú ulañi' beella. 37Chenu uye'e lu yuu stucu bichia, nú ulaca beella equie dañi ze'e, huaxi bee bene uchiu'u uya cha'calu Jesuse. 38Chequie tucu bene enu nze'ta leta bee bene ze'e urixialii nú uni: ―Maestro, ubi'yacuru endua, tucutsia li'i necai endua. 39Nu nchiñi benechiqui' arqui'i nu rri'i nze'e nú rixialii, nu secai ichia ziña nu xiu'u lliña ru'i, rti'qui benechiqui' cua' li'i nu la tsana' nucua' li'i. 40Uzequieelá lubee bene'lu nú hua beella benechiqui' cua' arqui' endua, pero lá aca beella. 41Nu ucuaqui Jesuse nú uninu: ―¡Cue'hua bee bene enu rlu'cu dula nú la chili arqui'hua li'á! ¿Se xala tiembu rqui'ña nú tsunua li'ihua nu xa riquilá li'ihua? Uteyuu endu'lu ca'a. 42Pero chenu nzebica endu' ze'e lu Jesuse, utsi'qui benechiqui' li'i lu yuu nu ulle'ca zecai ichia ziña stucu bese, pero unibiya' Jesuse lu benechiqui' nú chiu'i arqui' endu' ze'e nu uri'iyecanu li'i, che udete' cuendanu li'i lu pa'i. 43Ye bee bene enu nucua'a ze'e chiqui' uyanu arqui'beei chenu ulañi' beei lunú llene neca nú reca Diose. Diqui nú nzenu arqui'beei lunú rri'i Jesuse, uninu lubee bene'nu: 44―Uquie'e nze'ca diacahua lunú nia luhua nu la zañi'hua nucua'. Li'á Bene enu uxe'la Diose dete' cuenda bee bene li'á lubee bene enu rnibiya'. 45Pero lá ri'i bee bene'nu beya' lunú rninu, xne lasca' dete'nu nú rri'i beella beya', nu le'ca xiqui beella nedichia' beella lu Jesuse xi rni lunú uninu. 46Chequie uquixie bee bene'nu nú rni beella lusa'beella nú tá beella neca enu máse neca equie. 47Pero uri'i Jesuse beya' lunú xa rri'i beella elliebacu' nu una'tsenu tucu endu' utsunu elu nzunu, 48nu uninu lubeella: ―Tatse bene enu ri'i elietsa lu endu' quie' equie cuenda' li'á, neca xi neca nú rri'i nze'e elietsa lua, nu tatse bee bene enu rri'i caso li'á, le'ca rri'i caso nze'e bene enu uxe'la li'á. Enze'e enu máse lecati neca letahua, neca nze'e enu máse neca equie. 49Chequie uni Juan lunu: ―Maestro, ulañi'ru tucu bene enu rlua benechiqui' arqui' bee bene equie nú leelu, pero uniru lulla nu la ria'lla scua xne la acalla bene leta'ahua. 50Pero uni Jesuse lubeella: ―La cáhua nucua', xne enu la ri'i condra lia'ahua nzu nze'e chu'ahua. 51Chenu nze'ta riña bichia nú nzia Jesuse liñibe, che utsu naaqui arqui'nu nu nzanu Jerusalén. 52Uxe'lanu bee bene enu uriculu para nú chue beei tucu eyeche nú nchiucu' lu iliu Samaria para nú cua'na beei elu ya'na beella ze'e. 53Pero lá zela bee bene eyeche ze'e aya'nanu eyeche ze'e, xne uri'i beei beya' nú nzanu Jerusalén. 54Chenu ulañi' Juan cuna Jacobo nucua', che uni beella lunu: ―Detá Jesuse, ¿niarqui'lu nú nibiya'ahua nú laca quii enza liñibe para nú la'xue bee bene cua' tucu nú uri'i profeta Elías la? 55Chequie ubi'ya Jesuse lubeella, nu uqui'ya' beella uri'inu nú uninu lubeella: ―¿Xie' la ri'ihua beya' nú lu beze'lu nze'ta nú rnihua scua la? 56Xne li'á Bene enu uxe'la Diose, lá yela para nú ri'á nú ati bee bene, nzela para nú tsila'a li'ibeei lu dula. Che chu nzuebeella stucu eyeche. 57Diqui nu nzuebeella inziu, uni tucu niyu lu Jesuse: ―Niarquia nu nzela quiea li'ilu catse elu nzalu. 58Che ucuaqui Jesuse lui: ―Bee betsa rlu'cuí bee iliu'u nú neca ni'í nu bee iñi rlu'cuí exlia'tse'í, pero li'á Bene enu uxe'la Diose ni' elu quiee nchiña' equiea la lucua. 59Nu uni Jesuse lu stucu bene: ―Utequiee li'á. Pero ucuaquii lunu: ―Uzela nú bi'ya paa hasta nú atinu nu che chu nzela quiea li'ilu. 60Che uni Jesuse lui: ―Utsa'na pa'lu cuna bee bene enu neca xi neca bene enu unguti, pero li'ilu uquia tixiule'e xa neca elurnibiya' Diose. 61Nu uni stucu bene lu Jesuse: ―Niarquia nú nzelanala li'ilu, pero rluti uzela nú nze tixiule'exua lubee benea. 62Pero uni Jesuse lui: ―Bene enu nzene ya acaratu nu belletalla enza di'chilla, leca modo nú cha neli excu'lla. Le'ca esquie bee bene enu niarqui' nú ye'ta quiee li'á, tunu la che'e arqui'beella lunú xa nehuañi beella, leca modo nú aca beella bee bene' Diose.

will be added

X\