San Lucas 7

1Chenu ulaxu nú uni Jesuse lubee bene, chú nzanu eyeche Capernaum. 2Ze'e uhuañi tucu capitán romano, nu ulu'culla tucu moso'lla enu chiqui' secalla, nu riti moso' quie', nu steme'tsia rri'i nú atii. 3Chenu ubene' capitán ze'e lu cuenda' Jesuse, uxe'lalla chiucu chuna bene uxu enu neca equie lubee bene Israel, para nú chábeella nu ziquiee beella lu Jesuse nú chanu ri'iyecanu moso' capitán ze'e. 4Uya bee benequie' elu nzu Jesuse nu chiqui' uziquiee beella lunu nú uni beella lunu: ―Riala nú ri'ilu elietsa lu Capitán quie'. 5Xne secalla bee bene Israel, nu le'ca uri'illa elietsa nú ungache' indua'ahua. 6Chequie nza Jesuse cuna li'ibeella, pero chenu nze riña beella axu ni'i capitán ze'e, uxe'lalla chiucu chuna bene enu rquiete'lla para nú ni beella lu Jesuse: ―Detá, Jesuse mase la riñalu hasta ru'u nia xne la neca equiea para nú chu'ulu nia. 7Enze'e lá niarquia nú achela'na li'ilu, pero unibiya'tsia hasta elu nzulu para nú yeca' mosoa. 8Xne le'ca sucua stichia' bee bene enu rnibiya' lua, nu le'ca sucu' bee sondadua stichia'a. Chenu nia lu tucui nú chai chu nzai, nu chenu nia lu stucui nú ye'tai chu nzetai, nu chenu nia lu mosoa nú xi ri'illa chu rri'illa lunú nia lulla. 9Chenu ubene' Jesuse nucua', chiqui' uyanu arqui'nu stichia' capitán ze'e, nu ubi'yanu lubee bene enu nzequie li'inu nu uninu lubeei: ―Nia luhua nú ni' eyeche Israel lasca' llelá tucu bene enu nzeli arqui' tucu nú nzeli arqui' benequie'. 10Chequie chenu ubenchila' bee bene enu uxe'la capitán ze'e ni'illa, ulañi' beella nú uyeca'la' moso'lla. 11Cheela chu nza Jesuse cuna bee bene'nu cuna huaxilá bee bene tucu eyeche nú lee Naín. 12Chenu uriñanu axu ru'u eyeche ze'e, ulañi'nu nú nze cachi' bee bene tucu bene nguti. Neca bene nguti quie' lliana' tucu una'a enu unguti niyu', nu tucu li'itsialla necalla lliana' una'a ze'e. Nu huaxi bee bene eyeche ze'e nzenulla nze cachi' beella lliana'lla. 13Chenu ulañi' Jesuse una'a cua', uhua'a arqui'nu li'illa nu uninu lulla: ―La una'lu. 14Chequie uyabica Jesuse, nu uti'nu yanu tsu' camiya' bene nguti ze'e nu chu ucua'axe bee bene enu nuya' li'illa. Nu uni Jesuse lu bene nguti ze'e: ―Niyu e'ne', li'á nia lulu: ¡Uzetee! 15Nu chu uzuculí bene nguti ze'e nu uquixiei nú rdichia'i. Nu chu udete' cuenda Jesuse li'i lu na'i. 16Chenu ulañi' bee bene ze'e nucua', ye beei ulliqui beei nu uquixie beei unibeei bedichia' nze'ca lu Diose, nú unibeei: ―Tucu profeta enu chiqui' reca uriña lua'ahua. Le'ca unibeei: ―Uriñala Diose para nú ri'inu elietsa lubee bene'nu. 17Diqui lu iliu Judea, cuna ye bee eyeche enza ze'e ungabiya' bee bene lunú uri'i Jesuse. 18Ungabiya' Juan ye beenú unga scua, xne udixiule'e bee bene enu nzequie li'illa nucua' lulla. Chequie ubixia Juan chiucu bee bene'lla, 19nu uxe'lalla li'ibeei nú nedichia' beei lu Jesuse tunu li'inu necanu Cristo enu nzu nú nze'ta, urre rqui'ña nú nzuquiee beella stucu enu rene. 20Chequie bee bene enu uxe'la Juan uya beei elu nzu Jesuse nu unibeei lunu: ―Uxe'la Juan Bautista li'iru para nú nidichia'ru lulu tunu li'ilu necalu Cristo enu nzu nú nze'ta, urre nellua'aquieeru stucu enu rene. 21Hora ze'e uri'iyeca Jesuse huaxi bee bene enu riti, nu uhuanu benechiqui' arqui' bee bene, le'ca uri'iyecanu i'culu huaxi bee bene enu niquie'lu. 22Che uni Jesuse lubeei: ―Uquiahua nu udixiule'ehua lu Juan lunú ulañi'hua cuna lunú ubene'hua. Uni'hua lulla nú ri'yala bee bene enu niquie'lu, nu seela bee bene enu necuxu, nu le'ca uyeca'la' bee bene enu seca elichia nú lee lepra, nu riene'la bee bene enu nenguata', nu bee bene nguti uhuañi zeca, nu bee bene elitsi riene'la' beei bedichia' nze'ca' Diose para nú tsila'a beei. 23¡Nu ñia nza lu cuenda' bee bene enu la tsana' arqui' nú nzeli arqui' li'á! 24Chenu nzia bee bene enu uxe'la Juan, chu uquixie Jesuse nú uninu lubee bene equie cuenda' Juan, nu uninu lubeei: ―¿Ti rri'ihua beya' nú neca bene enu uyabi'yahua lu dañi achi elu la nucua'a bee bene? ¿Nzelí arqui'hua nú necalla xi neca tucu etaa nú rcuñi bi la? 25Urre, ¿xa rnaa bene enu uyabi'yahua? ¿Necalla tucu bene enu nutu laquie fiñu la? Nediya'hua nú bee bene enu rutu laquie fiñu nehuañi nze'ca beella nu liñi bee ni'i nze'ca nucua'a beella. 26Enze'e, ¿Ti uyabi'yahua che? ¿Tucu profeta la? Pero nia luhua, nú li'ihua uyabi'yahua tucu bene enu másela neca equie lunú neca tucu profeta. 27Juan Bautista quie' neca enu rni lu ichi' Stichia' Diose elu rni: Xe'la tucu bene enu cha rluti lulu, para nú tsúche'lla inziu nú riñalu. 28Nia luhua nú lu ye bee bene iliulabe, lá chiu'u ni' tucu bene enu máse neca equie tucu nú neca equie Juan Bautista, pero añinzuca nú necane scua, bene enu lle'natsia neca equie elurnibiya' Diose, li'illa másela neca equiella luquela Juan. 29Ye bee bene cuna bee enu rri'i cubre equie bee impuesto chenu ubene'beei lunú uni Juan, urinzalla li'ibeei, xne uri'ibeei beya' nú rri'i Diose tucu nú rialane, 30pero bee fariseo cuna bee ulaxcuela enu reca ley' Moises, né zela beella nú arinza Juan li'ibeella, nu scua uhuachu beei lunú niarqui' Diose ri'inu li'ibeei. 31Che unilá Jesuse lubeei: ―¿Xa nia luhua nú xa neca bee bene enu nehuañi lu iliulabe quie' nee? ¿Ti neca tucu nú neca beei? 32Nia luhua: Nú li'ibeei neca beei xi neca bee endu' enu rita ru'u i'ya nu rixiali beei lu sa'beei nú rnibeei: “Chenu ungularu chii para nú ye'ehua né ye'ehua. Nu chenu ungularu canción nú nehuana se né una'hua.” 33Scua necahua, xne ube'ta Juan Bautista nu li'illa la aculla pá, nú la hua'lla biñu, nu rnihua nú nchiñi benechiqui' arqui'lla. 34Nee quie uriña li'á Bene enu uxe'la Diose, nú racua pá nu rue'a biñu, nu rnihua nú racu xeta'a nu riu' arquia rua'a biñu nu rquietea bee bene enu rri'i dula cuna bee bene enu rri'i cubre equie bee impuesto. 35Pero ye bee enu rri'i beya', li'ibeella nediya' beella nú neca nze'ca lunú rri'i Diose. 36Tucu bee fariseo uzene' Jesuse nú chanu para nú acununu li'illa ni'lla, che uya Jesuse ni'lla nu uzucunu lu mexa, 37chequie tucu una'a huexe enu nzucu eyeche ze'e, chenu ubene'nchu nú nze tacuxe Jesuse ni'i fariseo ze'e, che unguya'nchu tucu frasco perfume nú chiqui' huaxi seca. 38Nu runa'nchu uzucunchu lu Jesuse, nu uquienchu cuchiu'nu cuna inza nú runa'nchu. Nu ucui'chinchu cuchiu'nu cuna ichia equienchu, nu chu utsuluru'nchu cuchiu'nu nu udu'nchu perfumee. 39Chenu ulañi' fariseo ze'e nucua', uri'i elliebacu': “Tunu neli nú neca benequie' tucu profeta, ri'illa beya' ti neca una'a enu rti'ya li'illa nu xa nehuañinchu, xne necanchu tucu una'a enu rri'i dula.” 40Che uni Jesuse lu fariseo ze'e: ―Simón, nia tucu nú nia lulu. Nu ucuaqui fariseo ze'e: ―Uni'i Maestro. 41Nu uni Jesuse lulla: ―Tucu bene utsana' dimi lu chiucu bene, tucu lu nze'e utsana'lla quiniento denario, nu lu stuculla utsana'lla cincuenta denario. 42Pero rucu bee benequie' né ri'i beei ana aixiu beei dimi cua' lulla, che unilla lubeei nú la ixiua' beei dimi cua' lulla. Neequie uni'i, ¿Ta lu rucu bee benecua' máse seca li'illa? 43Nu ucuaqui Simón: ―Pianu bene enu huaxilá nezi'qui lulla. Nu uni Jesuse lulla: ―Scua necane. 44Che ubi'ya Jesuse lu una'a ze'e, nu uninu lu Simón: ―Bi'yacuru una'a quie' chenu uriña ni'ilu né liqui'lu inza para nú quia cuchiu'a, pero una'a quie' uquie cuchiu'a cuna inza nú unguna'nchu nu ucui'chinchue cuna ichia equienchu. 45Né tsuluru'ulu li'á, pero li'inchu desde nú uyu'a ca'a la tsuxenchu nú suluru'unchu cuchiu'a. 46Né du'lu perfume equiea, pero li'inchu udu'nchu perfume cuchiu'a. 47Enze'e nia lulu, equie nú chiqui' seca una'a quie' li'á, neca perdonala ye stulanchu. Pero bene enu si' nú la lu'cu huaxi dula, bene ze'e lle'natsia secalla li'á. 48Nu chu uninu lu una'a ze'e: ―Uri'ilá perdona bee stulalu nee. 49Chequie bee bene enu nucua'a cuna li'inu ze'e, uquixie beei nú unidichia' beei lu sa'beei: ―¿Ti neca benequie', nú hasta bee dula rri'illa perdona? 50Pero uni Jesuse lu una'a ze'e: ―Neca perdona bee stulalu, xne uchili arqui'lu li'á, uquia nze'ca nee.

will be added

X\