San Lucas 6

1Tucu bichia nú sulachi bee bene Israel udetenu Jesuse bee bene'nu lu yuu elu nu' trigo nu uquixie bee bene'nu unguxi beella túu lu trigo, nu uzu'cu beella ebichi'i liñi ya beella nu udacu beellae. 2Chequie unidichia' chiucu chuna bee fariseo lubeella: ―¿Xinu rri'ihua lunú la yala ri'ihua bichia nú sulachi bee bene? 3Nu ucuaqui Jesuse: ―¿Xie' lasca' ulahua elu rni nú xa uri'i David cuna bee bene enu nuulla tucu bese chenu ulia'na beella la? 4Uyu'u David liñi indu' Diose nu udete' ule'ya pá nú necale'ya yalla, nu udacullae nu le'ca udete'lla pá cua' udacu bee bene enu nuulla, añinzuca nú bee ule'yatsia nu' modo acu bee pá cua'. 5Le'ca uni Jesuse lubeella: ―Nu li'á Bene enu uxe'la Diose, le'ca rlu'cua nú rnibiya'a lu bichia nú sulachi bee bene. 6Stucu bichia nú sulachi bee bene uyu'u Jesuse liñi tucu indu' bee bene Israel, nu uquixienu uzete'nu bee bene. Ze'e nzucu tucu niyu enu ubichi cu' ya chubee. 7Chequie bee ulaxcuela enu reca ley' Moisés cuna bee fariseo, nucua'a tsi'ña beella tunu ri'iyeca Jesuse bene ze'e bichia nú sulachi beella, para nú scua lu'cu beella xa ricu' quiya beella li'inu. 8Pero li'inu nediya'la'nu xi elliebacu' rri'i beella, che uninu lu bene enu ubichicu' ya: ―Utsuli nu utsu labe quie'. Nu chu utsuli bene cua' nu uya tsulla ze'e. 9Chequie uni Jesuse lubeella: ―Nidichia'a tucu luhua: ¿Xi riala ri'i bee bene bichia nú sulachi bee bene? ¿Nú neca nze'ca la urre nú necha neca la? ¿Tsila'a bene nú la ati tucu bene la urre tsana' arqui' bene nú ati tucu bene la? 10Nú chu ubi'ya Jesuse lu ye bee bene enu nucua'a ze'e nu uninu lu niyu ze'e: ―Ulí yalu. Che uri'i niyu ze'e scua nu uyeca' yaalla. 11Pero nu' bee bene enu nucua'a ze'e, chiqui' ulee beei nu uquixie beei unibeei lu sa' beei nú xa ri'i condra beei Jesuse. 12Bee bichia ze'e uya Jesuse dañi nu unacu'nu lu Diose, nu diquillu rula' unacu'nu lu Diose ze'e. 13Chenu uye'e lu yuu ubixianu ye bee bene'nu nu ucañinu chi'chiucu beella, nu uhua leenu li'ibeella apóstoles. 14Bee benequie' neca enu ucañinu: Simón enu le'ca uhualeenu Pedro, Andrés bichi Simón, Jacobo, Juan, Felipe, Bartolomé, 15Mateo, Tomás, Jacobo lliana' bene enu lee Alfeo; Simón enu ullutse leta tucu partido nu lee cananista; 16Judas bichi Jacobo; nu cuna Judas Iscariote, enu udete' cuenda Jesuse. 17Chequie ulaca Jesuse dañi ze'e cuna bee apóstol'nu nu ucua'axe beella lu tucu lichi cuna huaxi bee bene enu nzequie li'inu; cuna huaxilá bee bene enu nze'ta diqui bee luhuare lu iliu Judea, cuna bee bene Jerusalén cuna bee bene enu nze'ta ru'u inzatu' eyeche Tiro cuna Sidón. Ube'ta bee benequie' para nú ubene' beei lunú rni Jesuse cuna nú uri'iyecanu li'ibeei lubee elichia nú seca beei. 18Le'ca uri'iyecanu bee bene enu nchiñi bee benechiqui' arqui'. 19Ye bee bene ze'e niarqui' beei ti'ya beei Jesuse, xne rri'iyecanu ye beei cuna poder nú rlu'cunu. 20Che ubi'ya Jesuse lubee bene'nu nu uninu lubeella: ―Ñia nza lu cuenda'hua li'ihua enu neca bene elitsi, xne rialahua elurnibiya' Diose. 21’Ñia nza lu cuenda'hua li'ihua enu rlia'na' nee, xne riña bichia nú aca neela'hua, nu ñia nza lu cuenda'hua li'ihua enu runa' nee, xne riña bichia nú llila' arqui'hua. 22’Ñia nza lu cuenda'hua chenu rana arqui' bee bene li'ihua, cuna chenu rtiliaca' bee bene li'ihua cuna chenu rquiexuu bee bene li'ihua, cuna chenu rluachú bee bene li'ihua xi neca beenú lecaxi zibi' equie nú nzeli arqui'hua li'á Bene enu uxe'la Diose. 23Chiqui' ñia utsu arqui'hua chenu rri'inu bee bene li'ihua scua, xne li'ihua lu'cuhua tucu premio nú llene neca liñibe, xne le'ca scua uri'inú bee bene' bee benecua' bee profeta' Diose. 24’Pero cue'hua bee bene xene, xne ulu'culahua nú ñia utsu arqui'hua. 25’Cue'hua bee bene enu neela' nee, xne enta nú lia'na'hua. Cue'hua bee enu xi'chi nee, xne enta nú una'hua nu nehuana tsu arqui'hua. 26’Nu cue'hua bee bene enu riu' arqui' nú sucu' aya bee bene li'ihua, xne le'ca scua uzucu' aya bee bene'ahua hua'tu bee profeta enu né ni tucu nú neli neca. 27’Pero li'ihua enu riene' lunú rnia, nia luhua: Uzecahua bee bene enu rlee luhua, nu uri'i nze'cahua lubee bene enu rana arqui' li'ihua, 28uni'hua nú cha nze'ca lu cuenda' bee bene enu ri'ña nú zecahua, nu una'cuhua lu Diose equie cuenda' bee bene enu rquiexuu li'ihua. 29Tunu nu' enu du' tucue lulu, ude'te' stucu chú lulu du'lla stucue, nu tunu nu' enu raxi chamarra'lu le'ca utsana' nú uya'lla cuna lliaca'lu. 30Titse enu rnacu' xi rnacu' lulu ude'te' nucua' lulla, nu enu raxi stene'lu la nacu' quiyalue. 31Uri'ihua lubee bene tucu nú niarqui'hua nú ri'i beei luhua. 32’Tunu secatsiahua bee bene enu seca li'ihua, lecaxi sibi' nucua', xne hasta bee bene enu necha neca rri'i scua. 33Nu tunu rri'i nze'catsiahua lubee bene enu rri'i nze'ca luhua, lecaxi sibi' nucua' xne hasta bee bene enu necha neca rri'i scua. 34Tunu sana'tsiahua dimi lubee bene enu nzu arqui'hua nú ixiuca dimi'hua lecaxi zibi' nucua'. Xne hasta bee bene enu necha neca sana' beei dimi lubee bene enu nzu arqui'beei nú ixiuca dimi' beei. 35Pero li'ihua rqui'ña nú zecahua bee bene enu rlee luhua, nu ri'i nze'cahua lubeei. Tsana'hua nú rnacu' beei nu la tsuquiehua nú liqui' beei xi liqui' beei luhua equie bee nucua'. Scua máse huaxi eluxene nú ati'hua liñibe nu le'ca scua acahua lli'ñi Diose liñibe, xne li'inu le'ca rri'i nze'canu lubee bene enu ni' lle'na la dete' che'tsa lunu, cuna lubee bene enu necha neca. 36Uhua'a arqui'hua bee bene tucu nú rua'a arqui' Diose Pa liñibe li'ihua. 37’La ze'tahua nu la ta'quiyahua bee bene eluquichia' para nú la ri'inu bee bene li'ihua scua. Uri'ihua perdona bee bene para nú le'ca ri'i Diose perdona li'ihua. 38Ude'te'hua lubee bene lunú secala'cha' beei, nu Diose liqui'nu luhua lunú secala'cha'hua. Li'inu másela liqui'nu luhua lunú dete'hua. Xne li'inu liqui'nu luhua tucu nú dete'hua lubee bene. 39Le'ca uni Jesuse lubeella: ―Li'ihua nediya'hua nú tucu bene enu niquie'lu leca modo nú chenala stucu bene enu le'ca niquie'lu, xne rucu beella nu' modo nú zana' beella tucu ichiu. 40Ni' tucu enu sete' la acalla másela tucu nú reca ulaxcuela'lla, tunu riqui'lla la'xulla lunú sete'lla, che acalla tucu nú reca ulaxcuela'lla. 41’La ze'talu bee bene bee falta nú lle'natsia nú rri'i beei, mejora uyanutsia arqui' bee falta llene nú rri'ilu. 42Nu tunu llenelá neca bee falta nú rri'ilu, ¿xa modo nilu lu bene nú la neca nze'ca nú rri'ibeei? ¡Bene enu niquichia'! Rluti uri'i lunú riala nú ri'ilu, che nu' modo nilu lu bene nú la neca nze'ca nú rri'ibeei. 43’Leca aca nze'ca nú ayu ndixi nú la zibi' lu, le'ca leca aca nú la zibi' nú ayu ndixi nze'ca lu. 44Cada aca nu'lu bee bene ndixi nú rayu lue. La ayu higo lu aca eche, le'ca la ayu uva lubee huañi dañi. 45Bene nze'ca rni bee bedichia' nze'ca, xne nucua' neca nú nu' arqui'lla, nu bene enu necha neca rnilla bee bedichia' nú necha neca. Xne nucua' neca nú nu' arqui'lla. Xne hasta liñi arqui' bene xiu'u nú rnilla. 46’¿Xinu rnihua lua, “Detá, Detá” nu la ri'ihua tucu nú rnia? 47Nia luhua xa neca bene enu nze'ta lua, nú riene'lla lunú rnia, nu sucu'lla stichia'a: 48Li'illa necalla xi neca tucu bene enu ureche'e tucu ni'i. Rluti uda'ñilla aquié lu yuu hasta nú uriñalla elu nu' quiee, che uquixiella uricu'lla simiendu lu quiee ze'e. Chenu ulaca huaxi inza mase uyu'e tsu' ni'i ze'e, pero ni' teme' lá cuñi ni'i ze'e, xne nchiucu' simiendu'e lu quiee. 49Pero bene enu riene' lunú rnia nu la zucu'lla stichia'a, li'illa necalla xi neca tucu bene enu rreche' tucu ni'i nu la reche'lla simiendu'e. Chequie chenu ulaca huaxi inza nu uyu'e tsu' ni'i ze'e, hora ze'e uluquiee nu leca' modo nú acache' zecae.

will be added

X\