San Lucas 24

1Domingo sila' stucu bichia, uya bee una'a ze'e ru'u eluhua' Jesuse, nu unguya' beella perfume nú ureche' beella, nu le'ca uyanu beella xiucu xuna bee una'a. 2Chenu uriña beella ze'e, ulañi' beella nú uducu'la quiee llene nú uyacu' ru'u eluhua ze'e. 3Nu uyu'u beella liñi eluhua ze'e, pero né lle'la' beella cuerpo' Jesuse. 4Hora ze'e chenu xiqui beella nu la ri'i beella beya' xa ri'i beella, ulañi' beella chiucu niyu enu nzulí axu lubeella, nutu bee nze'e laquie nú rulu siqui'. 5Nu lunú chiqui' ulliqui beella uzi'qui ndiqui beella hasta lu yuu, nu uni bee niyu ze'e lubeella: ―¿Xinu rla'nahua tucu bene enu nehuañi leta bee bene nguti? 6Leca'nu ca'a, xne uhuañi zecanu. Ullu'cu arqui'hua lunú uninu luhua chenu nzusca'nu Galilea. 7Uninu luhua nú li'inu Bene enu uxe'la Diose, rqui'ña nú dete cuendanu lubee bene enu rri'i dula para nú quie'e beei li'inu lu cruse, nu acatsia bichia rriuna huañi zecanu. 8Che ullu'cu' arqui'beella bedichia' nú uni Jesuse lubeella, 9nu chenu nzia beella nú uchiu'u beella ru'u eluhua ze'e udixiule'e beella ye nú ulañi' beella lu se chetu'cu bee bene'nu cuna lu beelá bee bene. 10María Magdalena, cuna Juana, cuna María na' Jacobo, cuna beela bee una'a, neca beella enu uyayu resuna cua' lubee apóstol'nu. 11Pero né chili arqui'beella lunú uni bee una'a cua', xne seca beella nú lia rnitsia beella nucua'. 12Pero xexu'u Pedro uyabi'ya ru'u eluhua ze'e, nu chenu ubi'yalla liñii, ulañi'tsialla sabana nú ubelanu nchiucu' ze'e, nu ubenchila'lla nu chiqui' nzenu arqui'lla lunú ulañi'lla nu unga scua. 13Le'ca bichia ze'e, chiucu bene' Jesuse nzuebeella lu eyeche nú lee Emaús, eyeche cua' neca tucu chetu'cu kilómetro para Jerusalén. 14Chenu nzuebeella lu inziu rdichia' beella lu ye nú unga. 15Diqui nú rdichia' beella, uyabica Jesuse lubeella nu uquixienu nú nzenunu li'ibeella. 16Añinzuca nú ri'ya beella lunu, pero la zela Diose nú luego chulu beella li'inu. 17Nu unidichia' Jesuse lubeella: ―¿Xi equie rdichia'hua diqui nú nze'tahua inziu? Nu xinu nehuana nzu arqui'hua. 18Tucu beella enu lee Cleofas, ucuaqui: ―Ye bee bene nediya' lunú unga eyeche Jerusalén bee bichiaquie'. ¿Xie' li'itsialu enu uzucu Jerusalén lá ri'ilu beya' lunú unga ze'e la? 19Nu unidichia'nu lubeella: ―¿Xi unga che? Nu uni beella lunu: ―Lunú uri'inu bee bene Jesuse enu neca bene eyeche Nazaret, li'inu unganu tucu profeta enu chiqui' reca lunú uri'inu cuna bee bedichia' nú uninu lu Diose, cuna lubee bene. 20Nu bee ule'ya enu rnibiya' lubee ule'ya cuna bee usticia'ru, udete' cuenda beella li'inu para nú atinu nu uquie'e beella li'inu lu cruse. 21Li'iru nzu arqui'ru nú li'inu a tsila'anu bee bene Israel. Pero nee necala bichia rriuna nú unga ye bee nucua'. 22Añinzuca nú texcua'a bee una'a enu nucua'a cuna li'iru uchiiqui beella li'iru, xne nee zila' quie' uya beella ru'u eluhua'nu, 23nu lunú néllela' beella cuerpo'nu, ubenchila' beella nu uni beella nú ulube'lu bee ángele lubeella, uni bee ángele cua' lu beella nú nehuañi Jesuse. 24Che uya chiucu chuna bee sa'ru uyabi'ya ru'u eluhua ze'e, nu ulañi' beella tucu nú uni bee una'a ze'e, pero né lañi' beella Jesuse. 25Nu uni Jesuse lubeella: ―¡Chiqui' lle'natsia rri'ihua beya', nu rle'e nzeli arqui'hua ye bee nú uni bee profeta hasta hua'tu! 26¿Xie' la qui'ña nú nehuana zeca Jesucristo ye bee nucua' nu cheelá zucunu liñibe la? 27Che uquixienu udixiule'enu xi rni ye nú niquie lu ichi' Stichia' Diose lu cuenda'nu. Uquixienu cuna bee libro nú uquie'e Moisés, nu chu uquixia'lanu cuna ye bee libro nú uquie'e bee profeta. 28Chenu uriña beella eyeche nú nza beella, uri'i Jesuse tucu nú nzalanu enza lu ze'e. 29Pero uri'i beella juerza li'inu nú ya'nanu cuna li'ibeella, nu uni beella lunu: ―Uya'na cuna li'iru, xne ucheela nu enta chu'ula rula'. Che uyu'u Jesuse nu uya'nanunu li'i beella. 30Nu chenu nzucunu lu mexa cuna li'ibeella una'tsenu pá, nu chenu ulaxu nú udete'nu che'tsa lu Diose, che ule'enu pá ze'e nu udete'nue udacubeellae. 31Hora ze'e ulle'ca beella xi neca nú uya'la i'culu beella nu uyulu beella li'inu, pero tu'natsia unitinu lubeella. 32Nu uni beella lu sa'beella: ―Enze'eca nú chenu nzelayua'a li'inu lu inziu ñia utsi'a chenu uninu nú xa rni lunú rni lu ichi' Stichia' Diose. 33Chequie le'ca hora ze'e, chu uyu'unziu beella nu ubenchila' beella eyeche Jerusalén, elu neyete' sa' sechetu'cu bee bene'nu cuna beelá bee sa' beella. 34Nu uni bee bene enu nucua'a ze'e lu rucu beella: ―Neli nú uhuañi zeca Jesuse, xne ulube'lulanu lu Simón. 35Nu chu udixiule'e rucu bene ze'e lubeella lunú unga chenu nzuebeella lu inziu, cuna nú xa uyu'lu beella Jesuse chenu ule'enu pá. 36Rdichia'sca' beella lunú unga, chenu ulube'lu Jesuse lubeella, nu uninu lubeella: ―La lliquihua ñia utsu arqui'hua. 37Chiqui' ulliqui beella nu le'ca uyanu arqui'beella, xne uri'i beella elliebacu' nú ulañi' beella tucu espíritu' bene enu unguti. 38Pero uni Jesuse lubeella: ―¿Xinu xiquihua? nu ¿xinu sa' arqui'hua? 39Ubi'yacuruhua bee yaa cuna bee cuchiu'a. Li'á ninguie', una'tsehua li'á nu ubi'yahua lua xne tucu espíritu la acane arta cuna be'la tucu nú rlañi'hua li'á nee. 40Chenu uninu scua, che ulube'nu bee yanu cuna bee cuchiu'nu lubeella. 41Pero lá chilisca' arqui'beella nu li'inu lunú ñia nzu arqui' beella cuna nú nzenu arqui'beella, che uninu lubeella: ―¿Rlu'cuhua lle'na nú acua la? 42Nu chu udete' beella tele'e bela enu uyi'i cuna tele'e lliñia, 43che una'tsenu bela ze'e cuna lliñia ze'e nu udacunue ante lubeella. 44Nu uninu lubeella: ―Lunú ulle'ca ye bee nucua' unia luhua chenu nzusca'a cuna li'ihua. Nu rqui'ña nú yalu ye beenú niquie lu ichi' Stichia' Diose equie cuendaa nú nequie lu libro' Moisés, cuna lu libro' bee profeta, cuna lu libro salmos. 45Nu uxa'lanu elliebacu' beella para nú uri'i beella beya' lunú rni Stichia' Diose. 46Che uninu lubeella: ―Lu ichi' Stichia' Diose rni nú chiqui' nehuana zeca Cristo, nu acatsia bichia rriuna huañi zecanu leta bee bene nguti. 47Nu desde Jerusalén quixie bee bene ixiule'e stichia'a cuna diqui lu iliulabe, nú rqui'ña nú tsana' arqui' bee bene stula beei, nu chili arqui'beei li'á para nú ri'i Diose perdona li'ibeei. 48Li'ihua ulañi'hua ye bee nucua', nu ixiule'ehua lubee bene bee nucua'. 49Nu li'á xe'la luhua lunú ucuaqui u'na paa. Pero uya'nasca'hua ca'a eyeche Jerusalén hasta nú yucuhua lunú rnibiya' Diose nú nze'ta liñibe. 50Che uchiu'u Jesuse cuna li'ibeella eyeche Jerusalén, nu unguya'nu li'ibeella axu Betania, nu uletsanu yanu nu uri'i le'yanu li'ibeella. 51Diqui nú rri'ile'yanu li'ibeella, uyatsanu nu uquienu liñibe. 52Chequie chenu ulaxu nú udete' beella ula'na lunu, chiqui' ñia nzu arqui'beella ubenchila' beella eyeche Jerusalén. 53Nu ye bichia nucua'a beella liñi Indu llene Jerusalén nu rni beella bedichia' nze'ca lu Diose, nu rdete' beella che'tsa lunu. Amén.

will be added

X\