San Lucas 21

1Chenu ulañi' Jesuse nú rdu' bee bene xene u'na liñi alcancia liñi Indu llene Jerusalén, 2le'ca esquie ulañi'nu tucu una'a enu unguti niyu' nu secalla elitsi, nu udu'lla chiucu melu nú me' liñi alcancia ze'e. 3Che uni Jesuse lubee bene'nu: ―Li'á nia luhua nú máse sibi' u'na nú udu'u una'a zaqui elitsi quie' lunú sibi' u'na nú udu'u beelá bee bene. 4Xne ye bee bene rdu'tsia beei lunú sucu sobra equie dimi' beei, pero una'a quie' añinzuca nú secalla elitsi udu'lla ye dimi'lla liñi alcancia añinzuca nú nucua'tsia rlu'culla. 5Chiucu chuna bee bene rdichia' beei equie cuenda' bee quiee nú ñia rnaa necache' Indu llene Jerusalén, cuna equie cuenda' beenu huaxi seca nú lia rdete' bee bene para nú suche'e. Nu uni Jesuse lubeei: 6―Riña bichia nú ye nú rlañi'hua nee, pero ni' stucu quiee la ya'na'e equie sa'e, yeene rilae. 7Nu unidichia' bee bene lunu: ―Maestro, ¿xunga aca bee nucua'? Nu ¿xi seña lube' nú nzula nú aca bee nucua'? 8Chequie uni Jesuse lubeei: ―Ubi'yahua li'ihua para nú lecati zequienu li'ihua. Xne nze'ta huaxi bee bene enu ni luhua nú nze'ta beei equie cuenda' li'á, nu ni beei: “Li'á neca Cristo”; urre “Nze'ta axula bichia nú riñanu.” Pero la chili arqui'hua lunú nibeei. 9Nu chenu yene'hua nú reca xuu nu rliu bee bene, la lliquihua xne rluti bee nucua' acaxu ante nú laxu iliulabe, pero la neca lu cuenda' nucua' nú ulaxu iliulabe. 10Nu unilá Jesuse lubeei: ―Tucu nación liunu cuna stucu nación, nu bee gobierno liunu cuna stucu gobierno. 11Nu aca bee xú nu juerte, nu aca biña, nu aca bee elichia diqui lu iliulabe, nu lañi' bee bene beenú nelliqui rnaa liñibe. 12’Pero ante nú aca ye bee nucua', na'tse bee bene li'ihua, nu xitse ri'inu beei li'ihua nu ri'ibeei nú nehuana zecahua, uya' beei li'ihua liñi bee indu para nú chiu'ulue lu cuenda'hua. Du' beei li'ihua ni'cu' nu cheyubeei li'ihua lubee arre cuna lubee gobierno para nú chiu'ulue lu cuenda'hua equie nú nzeli arqui'hua li'á. 13Pero scua nu' modo nú nihua stichia'a lubeei. 14La qui'ña nú chenu arqui'hua, nu la qui'ña ri'ihua elliebacu' xa cuaquihua lubee bene ze'e, 15xne li'á liquia elliebacu' luhua cuna bee bedichia' nú nihua. Ni' tucu bee enu rlee luhua la riqui' beei nú yene' beei bedichia' cua', nu le'ca leca modo ni condra beei li'ihua. 16Pero li'ihua riña bichia nú hasta bee pa'hua cuna bee na'hua cuna bee bichihua cuna bee famili'hua cuna bee bene enu rquiete'hua dete' cuenda beei li'ihua, nu nu'hua enu uti bee bene. 17Nu ye bee bene iliulabe chana arqui'beei li'ihua, equie nú necahua bee benea. 18Pero ni' tucu ichia equiehua la nitihua equie bee nucua'. 19Utsuta' arqui'hua lu stichia'a para nú chu'uhua liñibe elu huañilíhua. 20’Chenu lañi'hua nú nucua'a bee sundado diqui abenchila' eyeche Jerusalén, uri'ihua beya' nú nzula nú laxu eyeche ze'e. 21Chequie bee bene enu nucua'a bee eyeche Judea, rqui'ña nú yecaxu'u beei enza dañi, nu bee bene enu nucua'a eyeche Jerusalén, rqui'ña nú chiu'u beei eyeche cua', nu bee bene enu rri'i riña' enza ru'u eyeche la benchila' beei eyeche ze'e. 22Xne bee bichia ze'e dete' Diose castiya bee bene para nú yalu ye tucu nú niquie lu ichi' Stichia' Diose. 23¡Pero cue' bee una'a enu nu' endu' xla'cu cuna bee una'a enu nuu bee endu enu rachi bichia ze'e! Xne chiqui' nehuana zeca bee bene, nu yala bee bene eyeche ze'e tucu castiya nú juerte. 24Texcua'a beei ati lu xuu, nu texcua'a beei uya' bee bene preso diqui lu iliulabe, nu bee bene rene nibiya' Jerusalén, hasta nú yalu bichia nú tsana' Diose nú nibiya' beei ze'e. 25’Chequie lañi' bee bene seña lu bichia cuna lu uu cuna lubee belaa, nu lu iliulabe la ria' bee bene beya' xi ri'i beei, nu lliqui beei xne chiqui' juerte llichi inzatu' lunú cuñine. 26Hasta nú chiula' bee bene equie nú lliqui beei chenu ri'i beei elliebacu' lunú aca lu iliulabe quie', nu hasta beenú nu' liñibe cuñi. 27Chequie lañi' bee bene iliulabe Bene enu uxe'la Diose, nú tu'na rulu siqui'nu nze'tanu liñi xcabe cuna ye nú rlu'unu. 28Chenu quixie nú aca bee nucua', udu'hua ana arqui'hua nu uletsahua luhua, xne axula uriña bichia nú tsila'ahua lunú nehuana zecahua. 29Le'ca uni Jesuse lubeei ejemplu quie': ―Ubi'yacuruhua aca higo, urre tatse stucu bee aca. 30Chenu lañi'hua nú riye' leca e'ne' lubee aca, li'ihua rri'ihua beya' nú nze'ta axula nú aca nelee. 31Le'ca esquie, chenu lañi'hua nú uquixiela nú aca bee nucua', ri'ihua beya' nú nze'ta axula lunú rnibiya' Diose. 32’Li'á nialuhua nú ye bee nucua' aca ante nú ati ye bee bene enu nehuañi tiembu quie'. 33Liñibe cuna iliulabe laxu, pero stichia'a la dete nú yalue. 34’Ubi'yahua li'ihua para nú la ri'i bee bicio ana luhua nu la ri'i úniqui ana luhua nu la acu xe'tahua nu la ri'ihua nú chenu arqui'hua nú xa huañihua para nú chenu benchila' zecaa, la aca bichia ze'e nu tu'natsia llunahua. 35Xne scua aca bichia ze'e para lu ye bee bene iliulabe. 36Ucua'a tsiñahua, nu ye bichia una'cu'hua lu Diose para nú nu' modo tsila'ahua lu ye beenú aca lu iliulabe, nu para nú scua nu' modo riñahua lu Bene enu uxe'la Diose. 37Bichia uzete' Jesuse bee bene liñi indu llene Jerusalén, nu rula' nzanu ria'nanu dañi nú lee Olivos. 38Nu ye bee bene se sila' liñi Indu Jerusalén cua' para nú riene' beei lunú rninu.

will be added

X\