San Lucas 19

1Uyu'u Jesuse eyeche Jericó, nu chu udetenu eyeche ze'e. 2Ze'e nzucu tucu bene xene enu lee Zaqueo nu rnibiya'lla lubee bene enu rri'i cubre impuesto. 3Niarqui' Zaqueo quie' nú chululla Jesuse, pero leca modo nú lañi'lla li'inu xne nze'tanala huaxi bee bene li'inu, nu nerungulla. 4Enze'e uyecaxu'ulla nu uricululla, para nú lañi'lla Jesuse, chequie uquiella lu tucu aca nú lee sicómoro axu elu detenu. 5Chenu udete Jesuse ze'e, ubi'yanu enzeya nu uninu lulla: ―Zaqueo yexetsia ulaca, xne nee ria'na ni'lu. 6Che yexetsia ulaca Zaqueo, nu ñia nzu arqui'lla nú uriña Jesuse ni'lla. 7Chenu ulañi' bee bene nú uriñanu ni'i Zaqueo, ye beei uquixie beei nú se'ta beei Jesuse nu rnibeei xinú nzanu ya'nanu ni' bene enu rlu'cu dula. 8Nu utsuli Zaqueo nu necachi unilla lu Jesuse: ―Ubi'yacuru, ritsia arli'ti' lunú rlucua lubee bene enu seca elitsi. Nu tunu nu' bene enu uri'á cubre de mase lu, nee detea lulla tacu bese mase lunú ucachia lulla. 9Che uni Jesuse lulla: ―Bichia quie' uriña nú tsila'a bee bene enu nucua'a ni' Zaqueo, xne uchili arqui'lla Diose, li'illa necalla enu mero nze'ta lu famili' tuxie Abraham. 10Nu li'á Bene enu uxe'la Diose, nzela para nú la'na bee bene enu nza inziu nú necha neca, nu tsila'a li'ibeei lu dula. 11Bee bene enu riene' lunú rni Jesuse, uninu tucu ejemplu lubeei, xne axula nzunu Jerusalén, nu li'ibeei rri'i beei elliebacu' nu hora ze'e nze riñala lunú rnibiya' Diose. 12Nu uninu lubeei: ―Uhuañi tucu niyu enu nze'ta lu tucu famili enu chiqui' neca equie, nu nzalla istu stucu nación para nú yuculla nú nibiya'lla, nú acalla arre nu chu benchila' zecalla para nú nibiya'lla lachilla. 13Ante nú chiu'ulla, ubixialla chi'i bee moso'lla nu udete'lla lu cada tucua beei tucu dimi nú huaxi seca, nu unilla lubeei: “Uri'ihua berexe cuna dimi cua' hasta chenu benchila' zecaa.” 14Pero bee bene lachilla, chiqui' rana arqui'beei li'illa, nu uxe'la beei texcua'a bee bene nzequie li'illa nu uya ni' beei lubee bene elu nzalla nú la niarqui'beei nú aca bene cua' arre lubeei. 15Pero uya'nalla nú ungalla arre, nu ubenchila' zecalla lachilla. Chenu uriñalla ubixialla bee moso'lla enu udete'lla dimi'lla ya para nú ri'illa beya' calu uri'i cada tucua beei ana. 16Moso' enu rluti uya uni lulla: “Detá, dimi nú uliqui'lu lua, uri'i ana chi'i bese mase lunú necane.” 17Nu uni arre ze'e lulla: “Uri'i nze'calu, tucu nú rialane. Nu lunú uri'ilu tucu nú rialane cuna lu lle'na nú utsa'na lulu, nee liquia lulu nú nibiya'lu lu chi'i eyeche.” 18Chenu uya moso' rrucu unilla lu arre ze'e: “Detá, dimi nú uliqui'lu ya uri'i ana ayu' bese mase lunú necane.” 19Le'ca esquie uni arre ze'e lu benecua': “Li'ilu nibiya'lu lu ayu' eyeche.” 20Nu uya stucu moso' lulla nu uni nze'e lulla: “Detá, nguie dimi'lu. Uduche'ne liñi tucu panitu, 21xne ulliquia li'ilu nú la hua'a arqui'lu bee bene, nu riuculu lunú né tsa'nalu, nu riuculu ula'cu elu la du'lu nii.” 22Chequie uni arre ze'e lui: “Moso' enu necha neca, equie nú unilu scua enze'e rialálu castiya'lu. Tunu nediya'lu nú la hua'a arquia bee bene nu riucu'a lunú né tsa'na nu riucu'a ula'cu elu la ri'á riña', 23bueno che, ¿xiquie nú né du'lu dimia banco para nú chenu ubenchila' zecaa ayucu'ne cuna lli'ñine?” 24Nu chu uni arre ze'e lubee bene enu nucua'a ze'e: “Axihua melu cua' yai, nu udete'huane ya bene enu nzene chi'i.” 25Che necachi uni bee benecua' lu arre ze'e: “Pero li'illa rlu'culalla chi'i melu.” 26Nu ucuaqui arre ze'e: “Li'á nia luhua nu bene enu rlu'culane, rqui'ña nú yuculá nze'ene; pero bene enu rlu'cu lle'natsiae, hasta lu lle'na nú rlu'culla ducu' enze'e yalla. 27Nu bee bene enu rlee lua nu la niarqui' beei nu aca arre, uteyuhua bee nze'e ca'a, nu útihua beei lua.” 28Chenu ulaxu nú uni Jesuse ejemplu cua', uri'inu seidu nú nzanu enza Jerusalén. 29Nu chenu uriñanu axu eyeche Betfagé cuna Betania axu dañi nú lee Olivos, che uxe'lanu chiucu bee bene'nu, 30nu uninu lubeella: ―Uquiahua eyeche nú nchiucu' enza lucua'. Nu chenu riñahua ze'e llela'hua tucu burro enu niquietu enu lasca'lí ricu bene. Uxe'chehuaií nu ye'tayuhuaií. 31Tunu nu' enu nedichia' luhua xinu xe'chehuaií, uni'hua lu bene ze'e nú Detá, Jesuse enu rnibiya' luru uni nú uya'ruií. 32Che uyaa bee bene'nu nu uri'i beella tucu nú uninu lubeella. 33Nu chenu xe'che beella burro ze'e, bee lluaana'í unidichia' lubeella: ―¿Xinu xe'chehua burro cua'? 34Nu ucuaqui beella: ―Xne Detá, Jesuse rni nú uya'ruií. 35Che unguya' beella burro ze'e elu nzu Jesuse, nu uricu' beella xucu beella equieií nu uricu Jesuse equieií. 36Nu ucua'a bee bene xucu beei labe inziu elu udetenu. 37Nu chenu uquixie nú nze laca beella equie dañi nú lee Olivos, ye bee bene enu nzequie Jesuse uquixie beei nú urixialibeei xne chiqui' ñia nzu arqui'beei, nu unibeei bedichia' nze'ca lu Diose, equie ye bee milagro nú ulañi' beei nú uri'inu. 38Nu unibeei: ―¡Ñia nze'ta arre, li'inu enu nze'ta lu cuenda' Pa'ahua Diose! ¡Nu' nú nzuxe liñibe che'tsa Diose enu nzucu liñibe! 39Chequie bee fariseo enu nze'ta leta bee bene enu nzequie li'inu unibeei lunu: ―Maestro, uqui'ya' bee bene enu nze'taquie li'ilu nú la bixialí beei scua. 40Pero ucuaqui Jesuse lubeei: ―Nia luhua tunu zaca beei, bee quie neca nú bixialí scua. 41Chequie chenu uriña Jesuse axu eyeche Jerusalén, chenu ulañi'nu eyeche cua' unguna'nu equie cuenda' eyeche cua', 42nu uninu: ―¡Bee bene eyeche Jerusalén, ala' masia bichiaquie' uri'ihua beya' ti liqui' nú nzuxe arqui'hua! Pero a'chi neca nucua' luhua nee, nu la lañi'huane. 43Riña bichia nú reche'e bee bene enu rlee luhua muro diqui abenchila' lachihua, nu diqui bee luhuare ri'i condra bee bene li'ihua, 44nu úti beei li'ihua. Che nitilu beei lachihua, nu la tsa'na beei ni' stucu quiee equie sa'e, xne né ri'ihua caso Diose chenu ube'ta bi'yanu li'ihua. 45Lulá bee nucua', uriña Jesuse labe eli'ya' Indu llene Jerusalén, nu uquixienu uluanu bee bene enu ruti cuna bee bene enu sii ze'e, 46nu uninu lubeei: ―Lu ichi' Stichia' Diose rni: “Nia neca para nú nacu' bee bene lu Diose”, pero li'ihua rri'ihuane xi neca yube' elu rcua'a bee huana'. 47Ye bichia uzete' Jesuse bee bene liñi indu llene Jerusalén, pero bee ule'ya cuna bee ulaxcuela enu reca ley' Moisés cuna bee usticia eyeche ze'e, rla'na beei xa modo úti beei li'inu. 48Pero la llela' beei xa modo úti beei li'inu, xne ye bee bene chiqui' sucu' diaca lunú sete'nu.

will be added

X\