San Lucas 16

1Le'ca uni Jesuse lubee bene'nu: ―Uhuañi tucu bene xene, nu ulu'culla tucu moso'lla enu uya'nanu ye bee stene'lla, cheela uyatixiule'e bee bene lulla nú lia rla'xu moso' ze'e ye bee stene'lla. 2Nu chu ubixialla moso' ze'e nu unilla lui: “¿Xa neca lunú rni bee bene lu cuenda'lu scua? Uli'qui' cuenda beenú rri'ilu, xne la liquia'a riña' ri'ilu.” 3Chequie uquixie moso' ze'e nú rri'i elliebacu': “¿Xa ri'á nee nu la liquia' patrón'a riña' ri'á? Leca juerzaa para nú ri'á riña' dañi, nu rtua nú nacua caridad. 4Nediyala xa ri'á para nú nu' ti yucu li'á ni'i chenu la lu'cua'a riña'.” 5Che ubixiai tucua tucua bene enu nezi'qui lu patrón'i, nu uni lu enu uriña rluti: “¿Calu nezi'quilu lu patron'a?” 6Nu ucuaqui bene ze'e nú unilla: “Li'á nezi'quia tucu ayu'u barrili aceite de olivo.” Che uni moso' ze'e lulla: “Nguie ichi' nú udu'lu firma uzucu nu yexetsia uche'e lunú nezi'quilu, nu uzu'cu' ichitsia nú nezi'quilu cincuenta barrili aceite.” 7Nu unedichia'i lu stucu bene ze'e: “¿Calu nezi'quilu lu patrón'a?” Nu uni bene ze'e lui: “Tucu ayu'u medida trigo.” Che uni lu bene ze'e: “Nguie ichi' nú udu'lu firma. Uche'e lunú nezi'quilu nu uzu'cu' ichitsia nú nezi'quilu ochenta medidae.” 8Chequie chiqui' uyanu arqui' patrón ze'e nú netsiña moso' enu necha neca esquie lunú uri'i. Neli nú mase netsiña bee bene enu la chequie inziu' Diose cuna bee sa'beei, luquelá bee bene enu nzequie inziu' Diose. 9’Enze'e nia luhua: “Nú uqui'ñahua bee eluxene nú rlu'cuhua lu iliulabe quie' para nú ri'ihua elietsa lubee bene, nu scua nu' enu yucu li'ihua elu huañilíhua chenu laxu bee stene'hua.” 10’Bene enu rri'i tucu nú rialane cuna lu lle'natsia nú ria'nanulla, le'ca rri'illa tucu nú rialane cuna lu huaxi nú ria'nanulla, nu bene enu la ri'i tucu nú rialane cuna lu lle'na tsia nú ria'nanulla, le'ca la ri'illa tucu nú rialane cuna lu huaxi nú ria'nanulla. 11Nee le'ca scua tunu la ri'ihua tucu nú rialane cuna lubee eluxene nú nu' lu iliulabe quie', ¿ti lu'cu confianza luhua cuna bee eluxene nú nu' liñibe che? 12Nu tunu la ri'ihua tucu nú rialane cuna lunú la neca bee stene'hua, ¿ti liqui' luhua lunú rialahua che? 13’Ni' tucu moso' leca modo ri'i riña' lu chiucu patrón, xne leei lu tuculla, nu stuculla zecai, urre ri'i nze'cai lu tuculla, nu lu stuculla la ri'i nze'cai. Enze'e leca modo nú zibi'hua lu Diose nu tsu arqui'hua lu dimi. 14Nu lunú máse rle' bee fariseo dimi, chequie chenu ubene' beei nú uni Jesuse scua uquixie beei nú uze'ta beei li'inu. 15Nu uni Jesuse lubeei: ―Li'ihua rri'ihua nú necahua xi neca bene nze'ca lubee bene. Pero Diose nu'lu xa nchiñi arqui'hua. Mase rri'ihua ana nú nzeli arqui' bee bene nú necahua enu neca equie, pero lu Diose lecati necahua. 16’Hasta chenu ube'ta Juan Bautista. Nu'la ley' Moisés cuna bee bedichia' nú uquie'e bee profeta, pero hasta che uquixie nú udixiule'e bee bene nú xa neca lunú rnibiya' Diose, nu huaxi bee bene rri'i juerza nú chu'u elu rnibiya'nu. 17’Másela fácil nú nitilu liñibe nu lu yuu, pero la dete nú yalu ni' tucu bedichia' nú nze'ta lu ley' Diose. 18’Tunu tucu niyu le'i una'i nu yucui stucu una'a, ri'i dula, nu le'ca tunu yucu tucu bene una'a enu ule'e niyu', le'ca ri'i nze'e dula che. 19’Uhuañi tucu bene xene nu chiqui' utsuche'ella cuna bee laquie fiñu nú ñia rnaa nu ye bichia rri'illa nú neca xi neca tucu eliñi ni'illa, equie nú chiqui' necalla bene xene nu racu nze'calla. 20Le'ca uhuañi tucu bene elitsi enu lee Lázaro, nu diqui be'la'lla nchiucu' bechu' nú ruchulu nu suculla ru'u ni' bene xene ze'e. 21Niarqui' Lázaro cua' nú aculla masia bee ube nú sana' liñi mexa' bene xene ze'e, nu hasta bee nicu rriña rñie'e lu beechu' nú nchiucu' li'illa. 22Chenu uriña bichia nú unguti Lázaro, nu unguya' bee ángele' Diose li'illa liñibe elu nzucu Abraham. Nu le'ca unguti bene xene ze'e, nu ucachi' bee bene li'illa. 23Diqui nú nehuana seca bene xene ze'e nchiñi ebila, uletsai lui nu istu ulañi'i Lázaro nzu cuna Abraham. 24Nu urixialii nú uni: “¡Paa Abraham, uhua'a arqui' li'á! Uxe'la Lázaro nú cuachai lli'i cuene yai para nú ye'tai nu ri'i nú a'la' lu'chia, xne chiqui' nehuana se'ca nchiñia lu quii quie'.” 25Pero ucuaqui Abraham lu bene xene nú unilla: “Lli'ñia ullu'cu arqui' nú chiqui' ñia uhuañilu lu iliulabe, nu Lázaro nehuana uhuañii. Pero nee rialai elu ñia tsu arqui'i, nu li'ilu rialalu elu nehuana zecalu.” 26Nu le'ca nia lulu: “Nú arli'ti' nu' tucu errubee llene. Enze'e ni' tucu bee enu nucua'a ca'a leca modo nú dete elu nzulu, nu ni' tucu bee enu nucua'a elu nzulu leca modo nú ye'ta ca'a.” 27Chequie uni bene xene ze'e: “Ziquia lulu paa Abraham, uxe'la Lázaro ni' paa, 28xne rlucua ayu' bichia, para nú ixiule'ella lubeei nú la ye'ta beei ca'a elu chiqui' nehuana seca bene.” 29Che uni Abraham lui: “Li'ibeei rlu'cu beei bee ichi' nú uquie'e Moisés cuna beenú uquie'e bee profeta, mejora nú ri'i beei caso lunú niquie lubee ichi' cua'.” 30Nu ucuaqui bene xene ze'e: “Leca modoe paa Abraham, pero tunu huañi zeca tucu bene enu unguti, nu lube'lu nze'e lubeei, che si tsana' arqui'beei stula beei.” 31Pero uni Abraham lui: “Tunu la ri'i beei caso stichia' Moisés cuna stichia' bee profeta, le'ca la chili arqui'beei mase nú huañi tucu bene enu unguti.”

will be added

X\