San Lucas 15

1Ye bee bene enu rri'i cubre equie bee impuesto cuna bee bene enu rlu'cu dula, uyabica beei lu Jesuse para nú yene' beei lunú rninu. 2Chequie bee fariseo cuna bee ulaxcuela enu reca ley' Moisés, uquixie beei nú se'ta beei Jesuse nú unibeei: ―Benequie' rquiete' bee bene enu rri'i dula nu racunulla bee benecua'. 3Che uni Jesuse ejemplu quie' lubeei: 4―Tunu nu' tátucuhua rlu'cu tucu ayu'u sanchi nu nitihua tucui, ¿xie' la tsa'nasca'lla noventa y nueve bee sanchi ze'e dañi nu che cua'nalla sanchi enu uniiti hasta nú llela'llaí la? 5Nu chenu ullela'llaí, ñia nzu arqui'lla uricu'llaí añilla. 6Chequie chenu riñalla ni'lla quiete'sa'lla bee bene enu rquiete'lla cuna bee besiñu'lla, nu nilla lubee bene ze'e: “Ñia utsu arqui'hua cuna li'á, xne ullelalá sanchia enu uniti.” 7Nee nia luhua, nú le'ca scua nu' nú ñia nzu arqui' li'i beenu enu nucua'a liñibe chenu tsana' arqui' tucu bene stulalla luquela se noventa y nueve bee bene enu neli neca enu la qui'ña nú che'e arqui' lu stula. 8’Le'ca esquie tunu tucu una'a enu rlu'cu chi'i melu plata nu nitilla tucue, ¿xie' la quie'ella quii nu lucu'lla liñi ni'lla nu cua'nalla dimi'lla xuxuu hasta nú llela'llae la? 9Nu chenu llela'lla dimi'lla, quiete'sa'lla bee una'a enu rquiete'lla cuna bee besiñu'lla, nu nilla lubee nze'e: “Ñia utsu arqui'hua cuna li'á xne ullelalá dimia nú unitia.” 10Nee nia luhua, le'ca scua ñia nzu arqui' bee ángele' Diose liñibe chenu tsana' arqui' tucu bene stulalla. 11Le'ca uni Jesuse stucu ejemplu lubeei: ―Tucu bene ulu'cu chiucu lliana', 12chequie uni lliana'lla enu lle'nalá lulla: “Paa uli'qui' rencia nú rialaa.” Nu chu uritsi' pa' beei bee rencia'lla lu rucu beei. 13Xiucu xuna bichia lu ze'e lliana'lla enu lle'nalá ungüiti ye bee rencia nú uyucui. Che unguya'i dimi cua' nzai enza istu elu ula'xui yeene, xne uri'i ye nú niarqui'i. 14Pero chenu ulaxu dimi'i unga biñia elu nzucui, nu uquixie nú uri'i falta nú acui. 15Nu chu uya na'cui riña' ri'i ni' tucu bene enza ze'e, nu uxe'la bene ze'e li'i nú ri'i ucui bee cuchi enza dañi. 16Nu equie nú chiqui' rlia'na'i ala' nú raculai beenú racu bee cuchi nú secai, pero lecati udete' nú udacui. 17Chequie uri'i elliebacu' nú uni: “¡Ni' paa nucua'a huaxi bee moso' nu hasta nú sucu sobra nú racu beei, nu li'á nzucua'a ca'a ya mero atia nú rlia'naa! 18Nee benchila' zecaa ni' paa nu nia lunu: Paa, uri'ila dula lu Diose nu uri'ila dula lulu, 19la yala' nú nilu lua nú neca lliana'lu. Uri'itsia lua xi neca tucu moso'lu.” 20Chequie uyu'u nziui nu ubenchila' zecai ni' pa'i. ’Pero chenu nze'tasca'i istu ulañi' pa'i li'i, nu uhua'a arqui'lla li'i. Che uyaxu'ulla ucha'calulla li'i, nu uchi'chilla li'i nu udaculla bichiu' xecai. 21Nu chu uni lu pa'i: “Paa uri'ila dula lu Diose, nu uri'ila dula lulu, la yala' nú nilu lua nú neca lliana'lu.” 22Pero chu uni pa'i lubee moso'lla: “Yexetsia uquia chiya'hua laquie nú máse rnaa nze'ca utu'hua lliana'a, nu udu'hua tucu bi'i cuenei nu quie'ehua subatu cuchiu'i. 23Nu uteyuhua tucu becerro enu máse neru'cu nu útihuaí para nú da'cua'ahuaí, nu ri'ahua tucu eliñi. 24Xne para li'á ungutila lliana'a ninguie', nu uhuañi zecai. Uniiti, pero ullela zecai.” Nu uquiexie beella nú rri'i beella eliñi'i. 25’Diqui nú nucua'a beella esquie, lliana' rlu'lla nzusca'i dañi. Chequie chenu ubenchila'i nú nze'ta riñai axu ni'beella, chenu ubene'i nú rula bee musica nu rie'e beella, 26Chequie ubixiai tucu moso' ni'beella nu unidichia'i lu nze'e nú xi reca ni' beella. 27Nu uni moso' ze'e lui: “Nú ubenchila' zeca bichilu nu unibiya' pa'lu nú unguti becerro enu máse neru'cu xne uriña nze'cai nu uriña naaquii.” 28Pero chiqui' ulee lliana' rlu'lla nze'e nu la zelai chu'i ni'i, che chu uchiu'u pa'i uya ziquie lui para nú chu'i. 29Che uni lu pa'i: “Li'ilu nediya'lu xala lana rri'á riña' cuna li'ilu, nu leca xunga unga nzitia lulu, nu leca xunga ubiqui'lu masia tucu chipa lla'na para nú ri'á tucu eliñi cuna bee enu rquietea. 30Pero nee nú uriña lliana'lu ninguie', enu uya la'xu dimi'lu cuna bee una'a huexe. Para li'i sí unibiya'lu nú unguti becerro enu máse neru'cu.” 31Che uni pa'i lui: “Lliana'a li'ilu nzuculu cuna li'á ye bichia, nu ye nú rlucua neca stene'lu. 32Pero nee rqui'ña nú aca tucu eliñi cuna nú ñia tsu arquia'ahua, xne para li'á neca xi neca nú unguti bichilu nu nee uhuañi zecai, unitii, nu ullela' zeca'ahuai.”

will be added

X\