San Lucas 14

1Tucu bichia nú sulachi bee bene Israel, uya Jesuse udacucheca ni'i tucu fariseo enu rnibiya', nu texcua'a beei nucua'a tsi'ña li'inu. 2Chequie lunu ze'e, nzu tucu niyu enu nu' quii diqui be'la'. 3Nu unidichia' Jesuse lubee ulaxcuela enu reca ley Moisés cuna lubee fariseo nu uninu: ―¿Nu' modo ri'iyeca tucu bene enu riti bichia nú sulachi bee bene la? urre ¿leca modue la? 4Pero lecalí xi ucuaqui beella, chequie uricu'nu yanu equie niyu enu riti ze'e, nu uri'iyecanu li'i nu uninu lui nu yai. 5Chequie uninu lubee fariseo: ―Tunu zana' tucu burro'hua urre tucu u'na'hua liñi tucu i'chiu bichia nú sulachi bee bene, ¿xie' la chehuahuaí hora ze'e la? 6Pero lecaxi ullela arqui'beella acuaqui beella lunu. 7Chenu ulañi' Jesuse nú rla'na bee bene enu nezene' lu tsa'a ze'e elu neca equie cua'a beei. Che uninu lubeei: 8―Chenu sene' bene li'ilu chalu lu tsa'a chia, la zuculu luhuare elu mase neca equie, xne tunu riña stucu bene enu nezene' enu masela neca equie lulu, 9che bene enu uzene' rucuhua, nze'talla nu nilla lulu: “Ude'te' elu nzuculu zucu benequie'.” Chequie ya'na netúlu tsulílu luhuare ze'e, nu zuculu hasta último xleta. 10Enze'e chenu sene' tucu bene li'ilu lu tsa'a zucu lu xleta nú nzu hasta último, para nú chenu nze'ta bene enu uzene' li'ilu nu nilla lulu: “Amigo, utee ca'a zuculu elu máse neca equie.” Nu scua zucu' aya beei li'ilu lubee bene enu nucua'a lu mexa cuna li'ilu. 11Xne enu sucu' aya le'catsia li'i, aca lle'na nze'e, nu enu reca lle'na zucu' aya bee bene li'illa. 12Chequie uni Jesuse lu bene enu uzene' li'inu: ―Chenu sene'lu bee bene nú acucheca beei urre nú acuxee beei, la zene'lu bee bene enu rquiete'lu, ni' bee bichilu, ni' bee famili'lu, ni' bee besiñu'lu enu neca xene. Xne le'ca tucu bichia zene' beella li'ilu ni' beella, nu scua ixiu beella lunú udacu beella ni'lu. 13Mejora chenu rri'ilu tucu eliñi, zene'lu bee bene enu seca elitsi, cuna bee bene enu neca mangu, cuna bee bene enu necuxu, cuna bee bene enu niquie'lu. 14Che ñia nza lu cuenda'lu, xne añinzuca nu la gusea' beei nucua' lulu. Pero Diose neca enu guse'e nucua' lulu bichia nú huañi zeca bee bene enu neli uri'i tucu nú necane lu Diose. 15Chenu ubene' tucu bene enu nzucu lu mexa cuna Jesuse nucua', unilla lunu: ―Ñia nza lu cuenda' bene enu riala acu pá elurnibiya' Diose. 16Che uni Jesuse lui: ―Tucu niyu uri'illa elliebacu' nú dete'lla tucu exee llene para nú acu xee bee bene, nu uzene'lla huaxi bee bene. 17Chequie chenu uriña hora' exee, uxe'la bene ze'e moso'lla nze ni lubee bene enu uzene'lla para nú ye'ta beei xne necalula exee. 18Pero ye bee bene ze'e uquixie beei nú unacu' beei disculpa lulla nu uni tucui: “Uni'i lu benecua' nú ri'illa disculpa li'á, xne apenatsia utsia tucu yuu nu rqui'ña nú nzebi'yane.” 19Stucui uni: “Apenatsia utsia ayu' inza u'na', nu rqui'ña nú nze ri'á preo beeí bi'ya xa rri'i beei riña'. Uni' lu benecua' nú ri'illa disculpa li'á.” 20Stucui uni: “Li'á apenatsia uchiaa. Enze'e leca modo nú tsea nee.” 21Chenu ubenchila' moso' ze'e udixiule'ella lu patrón'lla ye lunú unga. Chequie ulee patrón ze'e, nú unilla lu moso'lla: “Uquia yexetsia lu eyeche cua' lubee inziu llene cuna lubee inziu lla'na, uteyuu bee bene enu seca elitsi, cuna bee bene enu neca mangu, cuna bee bene enu necuxu, cuna bee bene enu niquie'lu.” 22Chenu ulaxu nú uri'i moso' ze'e scua, necachi unilla lu patrón'lla: “Uri'ilá tucu nú unibiya'lu nú ri'á, pero nu'sca' luhuare elu cua'a bee bene.” 23Che uni patrón ze'e lu moso'lla: “Uquia lubee calle cuna lubee inziu. Uri'i Juerza bee bene enu lla'calu ze'e, nú ye'ta beei nia para nú cheene. 24Xne nia lulu nú ni' tucu bee bene enu rluti uzenea la acu exee nú uri'ilua.” 25Huaxi bee bene uyaquie Jesuse, nu ubelletanu nú uninu lubeei: 26―Tunu nu' enu niarqui' nú ye'ta quie li'á, rqui'ña nú másela zecalla li'á lunú secalla pa'lla, na'lla, una'alla, endu'lla, bichilla, zanalla, nu rqui'ña nú másela zecalla li'á lunú secalla lunú nehuañilla. Tunu la ri'illa scua leca modo nú acalla benea. 27Nu bene enu entaquie li'á nu la niarqui'lla nú nehuana zecalla equie cuenda' li'á, leca modo nú acalla benea. 28Tunu tucuhua niarqui' nú reche'e tucu ni'i nze'ca, ¿xie' la zuculla nu rluti ri'illa elliebacu' calu yalu gasto nú acache' ni'i ze'e nu tunu riqui' dimi'lla la'xulla reche'ellae la? 29Xne tunu reche'tsialla puro simiendu' ni'i nu la la'xulla reche'ella diquine, che ye bee bene enu lañi' nucua' tsequichia' li'illa, 30nu ni bee bene: “Benequie' uquixie rreche' ni'i pero lá la'xulla a reche'ellae xne la riqui' dimi'lla.” 31Nu tunu tucu arre niarqui' ri'i xuu cuna stucu arre, ¿xie' la zuculla rluti ri'illa elliebacu' tunu riqui' chi'i mili bee sundado'lla ri'i xuu cuna ala mili bee sundado' stucu arre la? 32Pero tunu ri'illa beya' nú la ri'illa ana lu arre ze'e, chequie ante nú riña arre ze'e lulla, xe'lalla chiucu chuna bee bene'lla para nú ni bee nze'e lu arre ze'e nú tsuxee xuu para nú scua huañi beei sin xuu. 33Le'ca esquie tatse bene enu la tsa'na ye bee stene'lla nú rlu'culla, leca modo nú acalla benea. 34’Zete neca nze'cae. Pero tunu niti nú neri'i, ¿xa sibi' zecae stucu bese che? 35La zibi'i ni' nú ri'chiane leta yuu nu ni' nú acane abono, ti'chiatsia bee benene. Enu niarqui' nú yene', quie'e diaca nze'e.

will be added

X\