San Lucas 10

1Lulá bee nucua', ucañi Jesuse setenta bee bene'nu, nu uxe'lanu chiucua chiucua beella nú riculu beella lunu, nú chue beella lubee eyeche cuna lubee ranchu elu chanu. 2Nu uninu lubeella: ―Neli nú nucua'a huaxi bee bene enu niarqui' yene' Stichia' Diose, pero leca huaxi bee bene enu zete' li'ibeei. Enze'e una'cu'hua lu Diose para nú xe'lalánu bee bene enu zete' li'ibeei. 3Uquiahua, li'á xe'la li'ihua xi neca chenu nza bee sanchi leta bee bichiu. 4La uya'hua biti, nú nu' stene'hua ni' dimi, ni' steinza lucuhua nu la cua'a xehua lubee bene lu inziu. 5Chenu riñahua ni'i tucu bene, rluti uri'ihua saludar bene ze'e nú nihua lulla: “Diose liqui' nú nzuxe arqui'hua.” 6Nu tunu ni'i ze'e nucua'a bee bene enu riala nú nzuxe arqui' ria'na nú nzuxecua' cuna bee bene ze'e che, pero tunu la yala bee bene ni'i ze'e nucua', benchila' zeca nucua' cuna li'ihua. 7Uya'natsiahua ni'i ze'e, nu la ya'nahua ni'i por ni'i bee bene, udacuhua nu hue'hua lunú liqui' beella luhua, xne bee bene enu rri'i riña' rqui'ña nú aculla. 8Chenu riñahua tucu eyeche elu zela bee bene nú ria'nahua, udacuhua nú liqui' beei luhua, 9uriyecahua bee bene enu riti nucua'a ze'e, nu uni'hua lubeei: “Nze'ta riñala lunú rnibiya' Diose luhua.” 10Pero tunu riñahua tucu eyeche elu la zela bee bene nú ria'nahua, uchiu'hua lu inziu nu nihua lubeei: 11“¡Hasta yuu be'cha lachihua nú uquie cuchiu'ru uri'quiru xi neca tucu seña nú né yucu arqui'hua Stichia' Diose! Pero uri'ihua beya' nú nze'ta axula lunú rnibiya' Diose luhua.” 12Nia luhua nú bichia nú laxu iliulabe, bee eyeche elu lá zela bee bene, nú aya'nahua, zeca beei castiya nú mase juerte, lunú zeca bee bene enu ucua'a eyeche Sodoma. 13’¡Cue'hua bee bene eyeche Corazín! ¡Nu cue'hua bee bene eyeche Betsaida! Xne tunu eyeche Tiro cuna eyeche Sidón aca bee milagro nú unga lachihua, xi tiembu achili arqui' bee bene ze'e Stichia' Diose, nu le'ca autu beei laquie natsa para nú lube' nú nehuana nzu arqui'beei nu aricu' beei tí equie beei xi neca seña nú uche'e arqui'beei lu stula beei. 14Pero bichia chenu laxu iliulabe, másela juerte castiya nú zecahua lunú zeca bee bene eyeche Tiro cuna eyeche Sidón. 15Le'ca esquie li'ihua bee bene Capernaum, la ri'ihua elliebacu' nú riala chu'uhua liñibe xne li'ihua rialahua hasta elu mase aquié rqui' ebila. 16’Nu chu ubi'yanu lubee bene'nu nu uninu: ―Bene enu rri'i caso lunú rnihua, rri'i bee nze'e caso li'á, nu bene enu rluachu li'ihua li'á rluachu nze'e, nu bene enu rluachu li'á rluachu nze'e Diose enu uxe'la li'á. 17Chenu ubenchila' zeca setenta bee bene' Jesuse enu uxe'lanu lubee eyeche, chiqui' ñia nzu arqui'beella nu necachi uni beella lunu: ―¡Detá, hasta bee benechiqui' sucu' stichia'ru chenu rniru lunú leelu! 18Nu uni Jesuse lubeella: ―Nelí'hua nucua', li'á ulañia nú xi neca chenu ria'la lee esquie uniti lunú rnibiya' beze'lu. 19Li'á uliquia lunú rnibiya'a luhua, para nú mase nú ta'hua equie bee be'la cuna equie bee nañi lliqui, nu le'ca para nú ri'ihua ana lunú rnibiya' beze'lu, nu lecaxi zecahua. 20Pero la llila' arqui'hua nú sucu' bee benechiqui' stichia'hua, mejora ullila'hua nú nzucu ichila nú leehua lu ichi' liñibe. 21Hora ze'e chiqui' ñia utsu arqui' Jesuse equie cuenda' Espíritu Santo, nu uninu: ―Paa li'ilu enu rnibiya' liñibe cuna lu iliulabe, zucu ayáa li'ilu xne uzete'lu bee bene enu lecaxi reca lunú ucachi'lu lubee bene enu reca cuna lubee bene enu rri'i beya'. Paa scua ungae, xne scua riu' arqui'lu nú acane. 22’Uliqui'la Diose Pa liñibe ye nú nibiya'a lu ye beenú nu'. Lecati nediya' ti neca Jesucristo Lli'ñi Diose, Diose tsia nediya' nucua', le'ca tucutsia Jesucristo cuna bee bene enu nzeli arqui' li'inu nu'lu Diose. 23Chequie ubi'yanu lubee bene'nu, nu uninu lu li'itsia beella: ―Ñia nza lu cuenda' bee bene enu rlañi' lunú rlañi'hua, 24xne nia luhua nú huaxi bee profeta cuna bee arre uniarqui' beella nú lañi' beella lunú rlañi'hua, pero né lañi' beella nucua'. Nu uniarqui' beella nú yene' beella nú riene'hua pero né yene' beella nucua'. 25Che utsuli tucu ulaxcuela enu reca ley' Moisés nu unilla lu Jesuse para nú ri'illa preo li'inu: ―Maestro, xi riala ri'á para nú lucua elunehuañi nú leca xunga laxu liñibe. 26Nu ucuaqui Jesuse lulla: ―¿Xi rni ley' Moisés? ¿Nu xa rri'ilu beya' nú rnii? 27Chequie uni ulaxcuela ze'e, rni ley: ―“Uzeca li'inu enu neca Diose'lu diquinu' arqui'lu, cuna diquinu' lunú necalu, cuna diquinu' juerzalu, cuna diquinu' elliebacu'lu, nu uzeca bee bene tucu nú secalu li'ilu.” 28Che uni Jesuse lulla: ―Ucuaqui nze'calu, tunu ri'ilu scua, lu'culu eluhuañilílu liñibe. 29Pero ulaxcuela ze'e niarqui'lla nú ya'na nze'calla lunú unidichia'lla lu Jesuse, che unilla lunu: ―¿Ta bene zecaa tucu nú se'ca li'á che? 30Chequie uni Jesuse tucu ejemplu lulla: ―Tucu bene Israel uchiu'ulla eyeche Jerusalén nu nzalla eyeche Jericó, che una'tse bee huana' li'illa inziu nu udiñi beei li'illa, nu ucachi' beei ye bee stene'lla hasta xuculla. Nu utsa'na beei li'illa xi neca tucu bene enu unguti. 31Che udete tucu ule'ya inziu ze'e, pero chenu ulañi' ule'ya ze'e nú nuxu bene ze'e, udete chechulla nu chu nzalla. 32Le'ca enza ze'e udete tucu levita enu rri'i elietsa lubee ule'ya, nu chenu ulañi' levita cua' nú nuxu bene ze'e, udete chechulla nu chu nzalla. 33Chequie udete tucu bene Samaria inziu ze'e, chenu ulañi'lla bene enu nuxu lu inziu ze'e, uhua'a arqui'lla bene ze'e. 34Nu chu uyabicalla elu nuxu bene ze'e nu uri'illa remedio elu nedi'qui bene ze'e cuna aceite cuna biñu, nu ullica'cuulla elu nedi'qui bene ze'e cuna laquie. Nu chu uricu'lla bene ze'e equie burru'lla nu unguya'lla bene ze'e elu neca posada, ze'e ubi'yalla bene ze'e. 35Chenu uye'e lu yuu stucu bichia nú rquiene bene Samaria nú nzialla, che udixiulla lu bene enu neca stene posada lunú seca chiucu bichia riña' bene nu unilla lu bene ze'e: “Ubi'ya benequie', tunu ri'ilu huaxilá gasto lu cuenda'lla, li'á ixiua nucua' chenu benchila' zecaa.” 36Che uni Jesuse lu ulaxcuela enu reca ley' Moisés: ¿Taa lu chuna bee bene enu udete lu inziu ze'e uzeca bene enu udiñi bee huana'? 37Nu ucuaqui ulaxcuela ze'e nú unilla: ―Bene enu uhua'a arqui' bene ze'e. Che uni Jesuse lulla: ―Uquia nu scua uri'i lu stucu bee bene. 38Diqui nú nze ri'i Jesuse seidu inziu'nu uriñanu tucu eyeche, ze'e uyanu ni'i tucu una'a enu lee Marta. 39Marta quie' rlu'cunchu tucu belanchu enu lee María, nu uzucu María lu Jesuse para nú yene'nchu lunú rninu. 40Pero Marta chiqui' rliala'nchu rri'inchu beenú rri'inchu, nu uyabicanchu lu Jesuse nu uninchu lunu: ―Detá, ¿Xie' la chenu arqui'lu nú tucutsia li'á utsa'na belaa ye bee riña' nú ri'á la? Ala' uni'i lunchu nú ri'inchu elietsaa. 41Nu ucuaqui Jesuse lunchu nú uninu: ―Marta, Marta, chiqui' nzenu arqui'lu lu huaxi bee riña'lu, 42pero nu' tucu nú máse neca equie. Maria ucañi nú máse neca equie, nu lecati caa nucua' lunchu.

will be added

X\