San~Juan 8

1Nu nza Jesuse enza dañi Olivos, 2nu chenu uye'e lu yuu stucu bichia, ubenchila' zecanu liñi indu llene Jerusalén, che uyetesa' huaxi bee bene lunu ze'e, nu chu uzucunu nu uquixienu uzete'nu li'ibeei. 3Che bee ulaxcuela enu reca ley' Moisés cuna bee fariseo, unguya'beei tucu una'a enu ullunanuu tucu niyu, nu utsu beei li'inchu arli'ti' bee bene enu nucua'a ze'e. 4Nu unibeei lu Jesuse: ―Maestro, una'aquie' ullunanunchu tucu niyu mero chenu nucua'anu sa'beei. 5Lu ley nú utsa'na Moisés lua'ahua rni: ―Nú sa' bee una'aquie', rqui'ña nú atinchu cuna quiee, nu li'iquielu, ¿xa nilu nee? 6Li'ibeei unidichia' beei lunu scua para nú bi'ya xi ninu, nu scua lu'cu beei xi ricu'quiya beei li'inu, pero chu uzi'quindiqui Jesuse, nu uquixienu rquie'enu cuna cuene yaanu lu yuu. 7Pero lunú chu rnidichia'sca'lá beei lunu, che uzucu nelínu nu uninu lubeei: ―Tatsehua enu la lu'cu dula, rlutilá nze'e du'quiee una'a quie'. 8Che uzi'quindiqui zecanu núchu rquie'elánu lu yuu. 9Bee bene enu uyayu una'a ze'e lu Jesuse, chenu ubene' beei nú uni Jesuse scua, che uquixie nú tucua tucua beei nziue beei, desde enu unguxu nu hasta bee enu nere'nelá, nziue ye beei nu utsa'natsia beei una'a ze'e cuna Jesuse lu ye bee bene enu nucua'a ze'e cuna li'inu. 10Chequie uzucu neli Jesuse nu uninu lu una'a ze'e: ―Una'a, ¿ma bee bene enu ube'tayu li'ilu ca'a? ¿Xie' ni'tucu beei lecaxi uri'inu li'ilu la? 11Nu ucuaquinchu: ―Ni'tucu beei detá. Che uni Jesuse lunchu: ―Ni'li'á lecaxi ri'inua li'ilu, uquia nee nu la ria'lu dula. 12Chequie uni zeca Jesuse lubee bene enu nucua'a ze'e: ―Li'á neca ellie'e lubee bene iliulabe. Bee bene enu zucu' stichia'a, chu'u ellie'e elliebacu' beella, nú xa lu'cu beella elunehuañi ante Diose, nu leca xunga tsunecabe elliebacu' beella. 13Nu uni bee fariseo lunu: ―Li'ilu rnilu le'ca lu cuenda' li'itsialu, nu lunú rnilu la zibi'i. 14Nu ucuaqui Jesuse nú uninu lubeei: ―Stichia'a si zibi'i, añinzuca nú rnia lu cuenda' li'á. Xne li'á nediyaa cá enza nzela nu cá enza nza'a, pero li'ihua la ri'ihua beya' cá enza nzela nu cá enza nza'a. 15Li'ihua rnihua lu cuenda' bee bene tucu nú rri'itsiahua elliebacu'. Pero li'á la nia lu cuenda' ni' tucu bee bene. 16Nu li'á rnia lu cuenda' bee bene, lunú neli neca. Xne la nia tucu nú necatsia elliebacua, sino que Paa enu uxe'la li'á nediya'nu nú neli neca lunú rnia. 17Lu ley'hua rni nú chenu nu' chiucu bene enu tucu nchiucu'tse stichia' neli lunú rnibeei. 18Nee le'ca li'á neca tucu enu rni lu cuenda' li'á, nu Paa enu uxe'la li'á neca stuculla. 19Chequie unidichia' beei lunu: ―¿Ca nzucu pa'lu che? Nu ucuaqui Jesuse lubeei: ―Li'ihua la chuluhua li'á, nu le'ca la chuluhua Paa xne tunu uyu'luhua li'á, le'ca nu'luhua Paa. 20Scua uni Jesuse diqui nú sete'nu bee bene liñi Indu llene Jerusalén elu nchiucu' bee alcancía elu riu'u bee u'na. Pero ni'tucu lecati una'tse li'inu, xne lasca' riña hora nú llunanu. 21Nu le'ca uninu lubeei: ―Chenu nza'a li'ihua la'nahua li'á, pero li'ihua atihua cuna stulahua, xne elu nza'a leca modo chuehua ze'e. 22Nu uni bee bene Israel ze'e: ―¿Xie' le'ca li'itsialla útilla li'illa, enze'e rnilla nú leca modo cha'ahua elu nzalla la? 23Chequie uni Jesuse lubeei: ―Li'ihua necahua bene lu yuu quie' pero li'á nzela enza liñibe, li'ihua necahua bee bene iliulabe, pero li'á la neca bene iliulabe. 24Enze'e unia luhua nú atihua cuna stulahua. Xne tunu la chili arqui'hua nú li'á neca enu necaa, che atinuhua stulahua. 25Nu unidichia' beei lunu: ―¿Ti necalu che? Nu ucuaquinu lubeei: ―¿Desde chenu uquixiea nú rnia luhua, unilá luhua nú ti necaa? 26Huaxi nú rqui'ña zetea li'ihua nu nia equie cuenda'hua. Pero nee lunú rnia lubee bene iliulabe, necane nú rienea rni enu uxe'la li'á, nu lunú rninu neli necane. 27Pero li'ibeei né ri'i beei beya' nú equie cuenda' Diose neca nú rninu. 28Enze'e uninu lubeei: ―Chenu uri'ilahua lunú niarqui'hua cuna li'á Bene enu uxe'la Diose che ri'ihua beya' nú li'á neca enu neca, nu la ri'itsia lunú necatsia elliebacua. Sino que rnitsia lunú uzete'la Diose li'á. 29Xne li'inu enu uxe'la li'á nzunu cuna li'á nu leca' bichia nu tsana' arqui'nu li'á, xne rri'á puro lunú riu'u arqui'nu. 30Chenu ulaxu nú uni Jesuse scua, huaxi bee bene uyalí arqui' li'inu. 31Che uni Jesuse lubee bene Israel enu uyalí arqui' li'inu: ―Tunu nzezucu'láhua stichia'a. Che si neli necahua bee benea. 32Nu chuluhua nú neli neca, nu equie cuenda' nú neli neca cua', la'ahua. 33Che ucuaqui beei: ―Li'iru nzelaru lu familia' tuxie Abraham, nu leca xunga unga neiquiru. ¿Xiquie nú rnilu nú aca nela'aru che? 34Nu uni Jesuse lubeei: ―Neli nia luhua nú ye bee bene enu rri'i dula, neca beei xi neca esclavo lu dula. 35Nu tucu esclavo la ya'nalí nze'e ni' bene enu utsi li'i, pero lliana' bene enu utsi esclavo ze'e sii nu' modo ria'nalii ni' pa'i. 36Enze'e tunu Lli'ñinu tsila'a li'ihua, che si neli nela'ahua ché. 37Nediyaa nú nze'tahua lu familia' tuxie Abraham. Pero li'ihua niarqui'hua nú útihua li'á, xne la yu' arqui'hua stichia'a. 38Li'á rnia lunú uzete'la Paa li'á, pero li'ihua rri'ihua lunú rni pa'hua luhua. 39Chequie ucuaqui beei: ―¡Pa'ru neca tuxie Abraham! Nu uni Jesuse lubeei: ―Tunu li'ihua neli necahua lliana' tuxie Abraham li'ihua, ri'ihua tucu nú uri'illa. 40Pero li'ihua añinzuca nu unilá nú neli neca luhua, tucu nú uzete'la Diose li'á, nu li'ihua niarqui'hua nú útihua li'á. ¡Nu tuxie Abraham lá ri'illa scua! 41Pero li'ihua rri'ihua tucu nú rri'i pa'hua. Nu unibeei lunu: ―Li'iru lecati lli'ñilá necaru, tucutsia Diose neca pa'ru. 42Che ucuaqui Jesuse lubeei: ―Tunu neli nú neca Diose pa'hua secahua li'á, xne equie cuenda' li'inu nzela lu iliulabe, lá yela lu cuenda' li'itsia sino que li'inu necanu enu uxe'la li'á. 43La ri'ihua beya' lunú rnia luhua, xne la niarqui'hua nú zucu' diacahua stichia'a. 44Enu neca pa'hua neca beze'lu, nu rri'ihua tucu nú niarqui' beze'lu nú ri'ihua. Desde chenu uquixie iliulabe riu' arqui' beze'lu nú úti bee bene sa' bee bene. Leca xunga uyu'u bichia nú nzenalai lunú neli neca, xne la ni lunú neli neca chenu rni eluquichia', nu scua rlube' nuxa necai, xne necai enu niquichia', nu li'i necai pa' eluquichia'. 45Pero li'á lunú rnia lunú neli neca, la chili arqui'hua lunú rnia. 46¿Tahua nu' beya' ni nú rlu'cua dula che? Nu tunu neli neca lunú rnia luhua, ¿xiquie nu la chili arqui'hua li'á che? 47Bee bene enu neca bee bene' Diose sucu' diaca beella Stichia' Diose, pero li'ihua la acahua bene' Diose, enze'e la zucu' diacahua stichia'nu. 48Chequie uni bee bene Israel ze'e lunu: ―Neli lunú rniru nú benechiqui' nchiñi arqui'lu, nu bene Samaria necalu. 49Che ucuaqui Jesuse lubeei: ―Ni' tucu benechiqui' leca arquia, sino que li'á sucua stichia' Paa, pero li'ihua puro bedichia' nú necha se rri'chiahua li'á. 50Li'á la la'na nú zucu' aya bee bene li'á, pero nu' enu niarqui' nú zucu' aya bee bene li'á, nu li'inu necanu enu rri'i elu usticia. 51Neli rnia luhua nú titse bene enu zucu' stichia'a, leca' xunga ati nze'e. 52Nu uni bee bene Israel ze'e lunu: ―Nee si' neli'ru nú rniru nú nchiñi benechiqui' arqui'lu. Abraham cuna ye bee profeta unguti beella, nu li'ilu rnilu: “Titse bene enu zucu' stichia'a leca' xunga ati nze'e.” 53¿Xie' másela neca equielu luquelá tuxie Abraham bene'ru enu udetela la? Li'illa ungutilla nu le'ca unguti bee profeta. Nu li'ilu. ¿Ti si'lu nú necalu? 54Che ucuaqui Jesuse: ―Tunu le'catsia li'á sucu ayaa li'á, lecaxi sibi' lunú rnia lu cuenda' li'á che. Pero enu sucu' aya li'á neca Paa, li'inu enu rnihua nú neca Diose'hua. 55Li'ihua la chu'luhua li'inu. Pero li'isi'a nu'lua li'inu. Nu tunu nia luhua nú la chulua li'inu, che neca tucu bene enu niquichia' tucu nú necahua. Pero li'á nu'lua li'inu nu sucua stichia'nu. 56Tuxie Abraham bene'hua enu udetela ñia utsu arqui'lla nú lañi'lla bichia nú nzela lu iliulabe. Nu chenu ulañi'lla bichia cua' másela ñia utsu arqui'lla. 57Nu uni bee bene Israel ze'e lunu: ―Pero ni' cincuenta lana lasca' lu'culu nu rnilu nú ulañi'la'lu Abraham. 58Chequie uni Jesuse lubeei: ―Neli nialuhua nú nzulá ante nú ala Abraham. 59Che una'tse beei quiee nzetu' beei li'inu, pero chu uyu'unu leta bee bene, nu udetenu labe beei uchiu'unu liñi indu ze'e nu chu nzanu.

will be added

X\