San~Juan 7

1Lulá bee nucua', uya Jesuse lu iliu Galilea. Lá niarqui'nu achaanu lu iliu Judea, xne bee bene cua' rla'na beei li'inu para nú úti beei li'inu. 2Pero lunú nze'ta axula eliñi' bee bene Israel, chenu rcua'a beella liñi bee ranchu. 3Che uni bee bichi Jesuse lunu: ―La ya'nalu ca'a, uquia lu iliu Judea, para nú le'ca lañi' bee bene'lu enu nucua'a ze'e bee milagro nú rri'ilu. 4Xne chenu niarqui' bene nú ri'i bee bene beya' lunú rri'illa, la yala nú ri'illa nucua' a'chi'. Nee lunú rri'ilu bee milagro cua', uri'i nucua' ante lu ye bee bene iliulabe. 5Uni bee bichi Jesuse scua xne ni' li'ibeei la chili arqui'beei li'inu. 6Chequie uni Jesuse lubeei: ―Lasca' riña horaa, pero para li'ihua xitse hora neca nze'ca. 7Leca modo chana arqui' bee bene iliulabe li'ihua, pero li'isia rana arqui'beei, xne rixiule'a lubeei nú necha neca lunú rri'i beei. 8Uquiahua lu eliñi cua', xne la cha'sca'a, xne lasca' riña hora nú cha'a. 9Chenu ulaxu nú uninu scua lubeei, uya'nanu Galilea. 10Lulá nú nzue bee bichi Jesuse lu eliñi ze'e, cheelá nzanu para nú lecati ri'i beya' nú le'ca nunu nzanu lu eliñi ze'e. 11Nu bee bene Israel rla'na li'inu lu eliñi ze'e, nu unibeei: ―¿Cáche nzu bene ze'e? 12Leta huaxi bee bene enu uya lu eliñi ze'e, yelu nú rnibeei lu cuenda'nu. Nu' beei enu rni: “Ñia nze'canu”; nu nu' beei enu rni: “La ri'i nze'canu, sino que sequienunu bee bene.” 13Pero ni' tucu beei né ni beei lu cuenda'nu ante luye bee bene, xne xiqui beei bee usticia Israel. 14Chenu unga arula'la nú reca eliñi ze'e, uyu'u Jesuse liñi indu llene Jerusalén, nu uquixienu nú uzete'nu bee bene. 15Che bee bene Israel chiqui' nzenu arqui'beei nú unibeei: ―¿Xa reca nucua' huaxi beenú reca nucua' nu lecati uzete' li'i nucua'? 16Chequie uni Jesuse lubeei: ―La zetea li'ihua lunú necatsia elliebacua, sino que nze'ta nucua' lu Diose enu uxe'la li'á. 17Tunu nu' enu niarqui' nú ri'i tucu nú niarqui' Diose, li'illa ri'illa beya' tunu nú setea li'ihua nze'tae lu Diose, urre necane nú necatsia elliebacua. 18Enu sete' lunú necatsia elliebacu', li'illa rri'illa scua para nú zucu' aya bee bene li'illa. Pero bene enu rla'na nú zucu' aya bee bene Diose enu uxe'la li'inu, rnilla lunú neli neca, nu la zequienulla bee bene. 19’Añinzuca nú utsa'na Moisés ley luhua, pero ni' tucuhua, la zucu' nú rnibiya' ley. ¿Nu xinu niarqui'hua nú útihua li'á? 20Chequie ucuaqui bee bene ze'e lunu nú unibeei: ―¡Benechiqui' nu' arqui'lu! ¿Ti niarqui' úti li'ilu? 21Nu uni Jesuse lubeei: ―Equie tucu milagro nú uri'á bichia nú sulachi bee bene, yehua chiqui' nzenu arqui'hua. 22Pero li'ihua mase nú neca bichia nú sulachi bee bene rquie'ehua seña bee endu' me'hua para nú ri'ihua tucu nú unibiya' Moisés nú ri'ihua, añinzuca nú la neca equie cuenda' Moisés nú rquie seña bee endu' me'hua sino que bee bene'hua enu udetela rri'ila scua huatu. 23Neequie, para nú la i'chiahua lunú rni ley' Moisés rquie'ehua seña bee endu' niyu masia nú necane bichia nú sulachi bee bene. Nu, ¿xiquie nú rlehua lua nú uriyeca tucu niyu bichia nú sulachi bee bene? 24La nihua lu cuenda' bee bene lunú rlañi'tsiahua rri'i bee bene sino que rlutixu uri'inze'cahua beya' xi rri'illa che nihua. 25Chequie chiucu chuna bee bene Jerusalén unibeei lu sa'beei: ―¿Xie' lanu benequie' neca enu rla'na bee bene para nú úti beei la? 26Nu nee lu' nzulla rnilla ante lu ye bee bene, nu lecati ri'chialla. ¿Xie' uyalílaquie arqui' bee usticia nú necalla Cristo la? 27Pero lia'ahua nediya' nze'ca'ahua cá enza nze'talla, nu chenu nze'ta Cristo, lecati ri'ibeya' cá enza nze'tanu. 28Chenu ubene' Jesuse lunú rnibeei, diqui nú sete'nu bee bene liñi Indu llene Jerusalén, che juerte uninu lubeei: ―Li'ihua rnihua nú nu'luhua li'á, nu le'ca nediya'hua cá enza nzela, pero li'á lá yelá equie cuenda' li'itsia. Li'á uriña equie cuenda' li'inu enu rni nú neli neca, nu li'ihua la chuluhua li'inu. 29Pero li'á nu'lua li'inu, xne nzela enza lunu nu li'inu uxe'lanu li'á. 30Chenu ubene'beei nucua' uniarqui'beei nú na'tse beei Jesuse, pero lecati una'tse li'inu xne lasca' riña hora nú xi ri'inu beei li'inu. 31Nulu huaxi añi bee bene enu nucua'a ze'e, huaxi beei uchili arqui' li'inu nu unibeei: ―Chenu ye'ta Cristo, ¿xie' ri'ilanu huaxilá bee milagro luquelá nú rri'i benequie' la? 32Ubene' bee fariseo lunú rni bee bene equie cuenda' Jesuse. Che li'ibeei cuna bee ule'ya enu rnibiya', uxe'la beei bee sundadu enu rri'i ucu Indu llene Jerusalén para nú na'tse beei Jesuse cha ni'cu'. 33Nu uni Jesuse lubeei: ―Lacaxea' nzula cuna li'ihua nu chu benchila' zeca elu nzucu enu uxe'la li'á. 34Li'ihua la'nahua li'á pero la llela'hua li'á, xne leca modo riñahua elu nza'a. 35Che bee bene Israel ze'e unibeei lu sa'beei: ―¿Cá nza nucua' nú la llela'ahualla che? ¿Xie' nzalla lubee bene Israel enu uri'chialetse leta bee bene enu la neca bee bene Israel para nú zete'lla hasta bee bene enu laca bee bene Israel la? 36¿Xa neca nú uni nucua': “Nú la'nahua li'á pero la llela'hua li'á, xne leca modo riñahua elu nza'a”? 37Ultimo bichia eliñi ze'e, neca bichia nú másela llene neca nu utsuli Jesuse nu juerte uninu: ―Tunu nu' enu rebichi' ye'ta nze'e lua para nú hue' nze'e inza. 38Xne bee bene enu chili arqui' li'á, tucu nú rni lu ichi' Stichia' Diose, liñi arqui' nze'e liñi inza nú rliqui' elunehuañi. 39Chenu uni Jesuse scua. Nu nú uninu rni, nú yebee bene enu chili arqui' li'inu huañi Espíritu Santo cuna bee nze'e, xne bee bichia ze'e lá riñasca' Espíritu Santo equie nú lecasca' Jesuse elu rnibiya'nu. 40Chenu ubene' bee bene ze'e nú uni Jesuse, nu'beei enu uni: ―Neli nú benequie' neca profeta enu nzu nú nze'ta. 41Nu nu'lá beei enu uni: ―Benequie' neca Cristo. Pero texcua'a beei uni: ―Laca li'illa Cristo xne necalla bene Galilea. 42Lu ichi' Stichia' Diose rni nú lubee familia' arre David nze'ta Cristo, nu eyeche Belén alanu elu le'ca unga lachi arre David. 43Nu scua ule'esa' bee bene equie cuenda' Jesuse. 44Nu nu'beei uniarqui' nú chanu ni'cu', pero lecati ulaca arqui' ana'tse li'inu. 45Chequie bee sundado enu rriucu Indu llene Jerusalén ze'e, ubenchila' zeca beei elu nucua'a bee fariseo cuna bee ule'ya enu rnibiya', nu uni bee bene cua' lubeei: ―¿Xinu lá ye'tayuhualla? 46Nu ucuaqui bee sundado ze'e nú unibeei: ―Leca xunga, uyu'u tucu bene enu rni tucu nú rni benecua'. 47Che uni bee fariseo ze'e lubeei: ―¿Xie' le'ca nuhua uzelahua nú uzequienu nucua' li'ihua la? 48¿Xie' nu'tátucu bee usticia'ahua urre nu' tátucua'ahua bee fariseo enu uchilila arqui' li'illa la? 49¿Xie' la ri'ihua beya' nú huaxi bee benequie' nenitilula beei ante Diose, equie nú la aca beei ley la? 50Che fariseo enu lee Nicodemo enu uyabi'ya Jesuse tucu reché, li'illa unilla: 51―Ley'ahua rni nú leca modo nia'ahua nú xi castiya riala tucu bene ante nú yene'ahua stichia'lla para nú ria'ahua beya' xi uri'illa. 52Chequie ucuaqui beei lulla nú unibeei: ―¿Xie' le'ca nuulu nzulu chu' bee bene Galilea la? Uze'te' nze'ca lu ichi' Stichia' Diose, para nú ri'ilu beya' nú ni' tucu bene Galilea lá aca profeta. 53Che chu nziue beei enza ni'beei.

will be added

X\