San~Juan 3

1Uhuañi tucu fariseo enu lee Nicodemo, li'illa ungalla usticia lubee bene Israel. 2Nu uyabi'yalla Jesuse tucu rula', nu unilla lunu: ―Maestro, li'iru nediya'ru nú Diose uxe'la li'ilu para nú zete'lu li'iru, xne lecati aca ri'i sa' bee milagro nú rri'ilu tunu la nzu Diose cuna li'illa. 3Nu uni Jesuse lulla: ―Li'á rixiule'e nze'ca lulu, nú enu la ala zeca stucu bese leca modo chu'u nze'e elurnibiya' Diose. 4Che uni Nicodemo lunu: ―Pero ¿xa modo nú ala zeca tucu bene enu unguxula? ¿Xie' nu' modo nú chu'u zeca tucu bene xla'cu na'lla nu ala zecalla la? 5Nu ucuaqui Jesuse lulla: ―Li'á rixiule'e nze'ca lulu, nú enu la rinza nu la nzu Espíritu Santo cuna li'i leca modo chu'u nze'e liñibe elurnibiya' Diose. 6Ye bee bene chenu ralalla, necatsialla bene lu iliulabe quie'. Pero bee bene enu nehuañi cuna Espíritu Santo, equie cuenda' Espíritu Santo rlu'cula beella stucu elunehuañi. 7La zeca lullie'lu equie nú unia lulu chenu unia lulu: “Rqui'ña nú ala zeca bee bene.” 8Xne tucu nú reca bii catse bee luhuare, nu mase riene'lu chenu reca bii, pero ni'la ri'ilu beya' cá enza nze'tae, urre cá enza nzae. Scua neca Espíritu Santo luye bee bene enu nzu cuna Espíritu Santo. 9Che uni Nicodemo lunu: ―¿Xa modo nú acahua' scua? 10Nu ucuaqui Jesuse: ―¿Li'ilu, nú necalu ulaxcuela lubee bene Israel, nu la ri'ilu beya' bee nucua' la? 11Li'á rnia lulu, nú li'iru rniru lunú nediya'ru nu lunú ulañi'la'ru. Pero li'ihua la chili arqui'hua lunú rniru. 12Tunu la chili arqui'hua chenu rnia luhua equie cuenda' beenú nu' lu iliulabe quie'. ¿Xa chili arqui'hua chenu rnia luhua equie cuenda' beenú nu' liñibe? 13’Lecali ti uya liñibe tucutsia enu nze'ta enza liñibe, nu li'inu necanu Bene enu uxe'la Diose. 14Nu tucu nú uquie'e Moisés tucu be'la enu necache' icu' lu tucu aca lu dañi achi, le'ca esquie Bene enu uxe'la Diose quie'e bee bene li'inu lu cruse, 15para nú ye bee bene enu chili arqui' li'inu, la nitilu beella, nu lu'cu beella elunehuañi nú leca xunga laxu lunu. 16’Equie nú chiqui' seca Diose bee bene iliulabe, uxe'lanu Lli'ñi e'cunu lu iliulabe para nú ye bee bene enu chili arqui' li'inu la nitilubeei, sino que lu'cu beei elunehuañi nú leca xunga laxu lunu. 17Xne né xe'la Diose Lli'ñinu lu iliulabe para nú dete'nu castiya bee bene, sino que ube'tanu para nú tsila'anu bee bene. 18’Bene enu chili arqui' Lli'ñi Diose, la zeca' nze'e castiya' Diose. Pero enu la chilí arqui' li'inu, zeca nze'e castiya xne la chili arqui' nze'e Lli'ñi e'cu Diose. 19Bee bene enu la chili arqui' li'inu zeca bee nze'e castiya, xne nee nú uriñanu lu iliulabe li'inu enu neca ellie' Diose, li'ibeei máse riu' arqui'beei inziu nú necha neca, xne rri'i beei puro lunú necha neca. 20Xne ye bee enu rri'i nú necha neca, la yu'lí arqui'beei ellie'e cua', nu la chebica beei lue para nú la ya'lalu lunú necha neca rri'ibeei. 21pero bee bene enu nehuañi tucu nú rialane lu Diose, li'ibeella nzequie beella ellie'nu para nú acachee nú rri'i beella lunú niarqui' Diose. 22Chenu udete nú unga bee nucua', uya Jesuse cuna bee bene'nu lu iliu Judea, ze'e ucua'a beella chiucu chuna bichia nu urinza bee bene'nu bee bene. 23Le'ca tucu eyeche nú lee Enón, axu eyeche nú lee Salim, ze'e uri'nza Juan bee bene xne nu' huaxi inza ze'e, nu nza bee bene para nú rinza beei ze'e. 24Nucua' unga chenu lasca' chu'u Juan ni'cu'. 25Chequie chiucu chuna bee bene' Juan cuna texcua'a bee bene Israel, uquixie beei nú rni xuu beei lu sa'beei equie cuenda' nú xa rnaa nze'ca beei lu Diose. 26Nu uya ni' bee bene' Juan lulla: ―Maestro, bene enu nzunuulu stucu chú re'cu Jordán, li'illa enu unilu luru, rrinzalla bee bene nu ye beei nzequie beei li'illa. 27Che uni Juan lubeei: ―Lecati aca lu'cu elurnibiya' nú ri'illa scua tunu la dete' Diose nucua' lulla. 28Li'ihua ubenela'hua nú unila luhua nú la neca Cristo, necatsia enu uriña rluti para nú ixiule'a lu cuenda'nu. 29Lu tsa'a chia nzu niyu enu xia cuna una'a enu xialla, nu bene enu rquiete' niyu enu xiacua' enu nzu cuna li'illa, chiqui' ñia nzu arqui'lla chenu riene'lla nú uquixie nú rni niyu enu xia. Nee le'ca scua chiqui' ñia nzu arquia equie cuenda' li'inu. 30Li'inu chu nzeaca neca equielánu, nu li'á chu nzelacalá lunú neca equia luquela li'inu. 31’Enu nze'ta enza liñibe li'inu necanu enu rnibiya' lu yeene. Pero bee bene iliulabe necatsialla bee bene iliulabe, nu rnitsialla beenú nu' lu iliulabe, pero li'inu enu nze'ta enza liñibe li'inu necanu enu rnibiya' lu yeene. 32Nu li'inu rninu lunú ulañi'la'nu cuna lunú ubene'la'nu. Pero lecati nzeli arqui' lunú rninu. 33Tunu nu' enu nzeli arqui' stichia'nu, scua rlube'lla nú neli neca Stichia' Diose. 34Enu nze'ta lu cuenda' Diose, li'inu rninu Stichia' Diose xne chiqui' udete' Diose Espíritu Santo lunú. 35Diose secanu Lli'ñinu, nu udete' cuendanu yeene lu Lli'ñinu para nú nibiya'nu lu yeene. 36Nu tatse enu chili arqui' Lli'ñinu, li'illa rlu'culla elunehuañi nú leca xunga laxu, pero enu la niarqui' chili arqui' Lli'ñinu la lu'culla elunehuañi cua' sino que rialalla castiya' Diose.

will be added

X\