San~Juan 21

1Lu ze'e lá, ulube'lu zeca'la Jesuse lubee bene'nu ru'u inzatu' Tiberias, nu singuie ulube'lunu lubeella: 2Chenu neyete'sa' beella, nzu Simón Pedro, cuna Tomás enu rri'chia bee bene cuachi, nu Natanael enu neca bene Caná tucu eyeche lu iliu Galilea cuna bee lliana' Zebedeo nu cuna xiucu bee bene'nu. 3Che uni Simón Pedro lubeella: ―Nza'a nze ucua'a bee bela. Che unibeella: ―Le'ca nuuru tseru cuna li'ilu. Che nzuebeella nu uquie beella equie tucu barco, pero rula' ze'e né uculí beella bee bela. 4Chenu enta ye'ela lu yuu, uriña Jesuse ru'u inzatu' ze'e, pero né chulu bee bene'nu li'inu. 5Nu uni Jesuse lubeella: ―Bee endu', ¿lá ucuhua ni' tucu bela la? Nu ucuaqui beella nú uni beella: ―Ni' tucuí. 6Che uninu lubeella: ―Utsi'quihua ixiu nú rucuhua bee bela enza cue'tse barco chubee para nú ucuhua bee bela. Nu scua uri'i beella, nu la riqui'a beella lua beella ixiu lu inza, xne huaxi bela nu' liñii. 7Chequie bene'nu enu chiqui' secanu uni lu Pedro: ―¡Detá Jesusenu! Chenu ubene' Simón Pedro nú necanu Detá Jesuse che chu ungutulla xuculla nú ulualla, nu chu utetsalla lu inza. 8Che beelá bee bene'nu uriñayuu beella barco ze'e nú nzexa' ixiu nú achee nú bela hasta ru'u inzatu', xne rri'i casi tucu ayu'u metro para nú riña beella ru'u inzatu'. 9Chenu ulaca beella equie barco ze'e ulañi' beella nú nucua'a quii nu nchiucu' tucu bela lue, nu cuna pá. 10Che uni Jesuse lubeella: ―Uteyuhua chiucu chuna bee bela enu ulaxu inza uducuhua. 11Che uquie zeca Simón Pedro equie barco ze'e nu uxa'lla ixiu nú achee nu' bee bela llene hasta ru'u inzatu', nu neca tucu ayu'u arula' nu' chuna beeí, añinzuca nú huaxi beeí né tsa ixiu ze'e. 12Che uni Jesuse lubeella: ―Utehua ne acusila'hua. Nu ni'tucu bee bene'nu lá laca arqui' beella anedichia' beella nú tinu, xne nediya'la' beella nú Jesusenu. 13Che chu uyabica Jesuse, nu una'tsenu pá nu udete'nue udacu beellae, nu le'ca scua uri'inu cuna bela. 14Ninguie' neca bese rriuna nú ulube'lu Jesuse lubee bene'nu chenu uhuañi zecanu lu eluti. 15Chenu ulaxu nú udacusila' beella, uni Jesuse lu Simón Pedro: ―Simón, lliana' Jonás, ¿másela secalu li'á luquela beelá beella la? Nu ucuaqui Pedro lunu: ―Ahua', Detá, li'ilu nediya'lu nú se'calu. Che uni Jesuse lulla: ―Ubi'ya bee benea che. 16Che unedichia'lanu bese rrucu lulla: ―Simón, lliana' Jonás, ¿secacálu li'á la? Nu ucuaqui Pedro lunu: ―Ahua, Detá, li'ilu nediya'lu nú se'calu. Che uni Jesuse lulla: ―Ubi'ya bee benea che. 17Nu bese rriuna unedichia'lanu lulla: ―Simón lliana' Jonás, ¿secalu li'á la? Che nehuana utsu arqui' Pedro xne unedichia'nu chuna bese lulla tunu secacalla li'inu, nu ucuaquilla nú unilla: ―Detá, li'ilu nediya'lu yeene. Li'ilu nediya'lu nú se'calu. Che uni Jesuse lulla: ―Ubi'ya bee benea che. 18Li'á rnia lulu nú chenu nere'ne'lálu, rutulu xuculu nu nzalu elu niarqui'lu, pero chenu uxulu lílu yalu nu stucu bene utu xuculu li'ilu nu uya' nze'e li'ilu elu la niarqui'lu chálu. 19Chenu uni Jesuse scua, rixiule'enu equie cuenda' nú xa ati Pedro, nu equie nú atilla zucu' ayalla Diose. Chequie uninu lulla: ―Utenala li'á. 20Chenu ubelleta Pedro ulañi'lla nú nze'tanala bene' Jesuse enu chiqui' secanu li'ibeella, enu uzucu cue'tsenu chenu udacuxee beella enu unedichia' lunu: “Nu ti dete' cuenda li'inu.” 21Chenu ulañi' Pedro li'illa unedichia'lla lu Jesuse nú unilla: ―Detá, li'iquiella ¿xa zecalla? 22Ucuaqui Jesuse lulla nú uninu: ―Tunu niarquia nú nehuañilla hasta chenu riña zecaa lu iliulabe, cuenda nucua'. Li'ilu utenalatsia li'á. 23Che urichialetse bee bedichia' cua' leta beelá bee bene'nu, nú bene'nu nucua' la atilla. Pero lá ni Jesuse nú la atilla. Lunú uninu neca: “Tunu niarquia nú nehuañilla hasta chenu riña zecaa lu iliulabe, cuenda nucua'.” 24Nu le'ca bene'nu ninguie' rni bee nucua' nu uquie'ellae. Nu nediya'ahua nú neli rnilla. 25Nu huaxilá beenú uri'i Jesuse nu tunu quiee tucua tucua bee se'ca nú la yala lu iliulabe chu'u bee libro quie'. Amén.

will be added

X\