San~Juan 20

1Domingo sila'tu', chenu necabesca' uyaa María Magdalena ru'u eluhua' Jesuse, nu ulañi'lla nú uducu'la quiee nú nacu' ru'u eluhua ze'e, 2che xexu'ulla uyatixiule'ella lu Simón Pedro nu lu stucu bene' Jesuse enu chiqui' secanu, nu unilla lubeella: ―¡Unguya' bene cuerpo' Detá Jesuse nu la ria'ahua beya' cá uri'i beei li'inu leca'nu liñi eluhua! 3Chequie uchiu'u Pedro cuna stucu bene'nu, nzuebeella ru'u eluhua ze'e. 4Rucu beella xuxu'u beella nzuella pero stuculla másela xexu'u nza che rlutilálla uriñalla ru'u eluhua ze'e luquela Pedro. 5Chequie uzi'quilulla ri'yalla liñi eluhua ze'e, nu ulañi'lla laquie nú ubela Jesuse nchiucu' ze'e pero né chu'ulla. 6Che chu uriña Simón Pedro nu uyu'ulla liñi eluhua ze'e nu le'ca ulañi'lla laquie ze'e nú nchiucu'e ze'e, 7nu le'ca ulañi'lla laquie nú ubela equienu nu la nchiucu'e cuna laquie nú ubela cuerpo'nu sino que neyu'chine nchiucu' renene. 8Che le'ca uyu'u stucu bene'nu enu uriña rlutilá liñi eluhua ze'e nu ulañi'lla nú unga, che uchili arqui'lla. 9Pero lasca' ri'ibeella beya' lunú rni lu ichi' Stichia' Diose nú huañi Jesuse lu eluti. 10Che chu nzia bee bene'nu nze'e ni'beella. 11Pero María uya'nalá ru'u eluhua runa'. Nu diquila nú runa'lla uzi'quilulla ubi'yalla liñi eluhua ze'e, 12nu ulañi'lla chiucu bee ángele enu nutu laquie niquichi nzucu liñi eluhua ze'e. Tucunu nzucu elu unguta equienu nu stucunu nzucu elu unguta e'yanu. 13Che unidichia' bee ángele cua' lu María nú uni beenu: ―Una'a, ¿xiquie nú runa'lu? Che unilla lubeenu: ―Xne unguya' bene cuerpo' Detá Jesuse, nu la ri'á beya' cá uri'i bene li'inu. 14Ulaxutsia unilla scua, ubelletalla nu ulañi'lla nú nzu Jesuse ze'e, pero lá chululla li'inu. 15Che uninu lulla: ―Una'a, ¿xiquie nú runa'lu? ¿Ti rcua'nalu? Ulle'ca María nú bene enu rriucu bee aca ndixi ze'e necanu, nu unilla lunu: ―Detá, tunu li'ilu unguya'lu cuerpo' Jesuse, udixiule'e lua cá uri'ilunu para nú nzetucua'anu. 16Nu uni Jesuse lulla: ―¡María! Che ubelletalla nu unilla lunu bedichia' hebreo: ―¡Rabuni! ―nu ni bedichia' cua': Maestro. 17Che uni Jesuse lulla: ―Utsana' li'á, xne lasca' cha'a elu nzucu Paa, pero uquia nu uni' lubee benea nú nzia'a elu nzucu Paa, enu le'ca neca Pa'hua nu neca Diosea, nu le'ca necanu Diose'hua. 18Chequie uyatixiule'e María Magdalena lubee bene'nu nú ulañi'lla Jesuse nu le'ca udixiule'ella lubeella yebeenú uninu lulla. 19Nu chenu uyu'u rula' domingo ze'e neyete'sa' bee bene'nu nu nacu' ru'u puerta nucua'a beella xne xiquibeella bee usticia Israel, che tu'natsia uyu'u Jesuse elu nucua'a beella nu uninu lubeella: ―¡La lliquihua! 20Chenu ulaxu uninu scua, ulube'nu yanu nu cue'tsenu lubeella. Nu chiqui' ñia utsu arqui'beella nú ulañi' beella li'inu. 21Che stucua'la bese uni Jesuse lubeella: ―¡La lliquihua utsu naqui arqui'hua! Nu tucunú uxe'la Paa li'á, le'ca scua xe'la li'ihua lubee bene iliulabe para nú ixiule'ehua stichia'nu lubeella. 22Chequie ulaanu equie beella nu uninu lubeella: ―Uyucuhua Espíritu Santo. 23Chenu nihua nú xa aca perdona stula bee bene, che enu ri'i caso nú nihua neca perdona stula nze'e, nu enu la ri'i caso nú nihua la aca perdona stula nze'e. 24Pero Tomás, enu neca lu chi'chiucu bee bene'nu, enu rri'chia bee bene cuachi lecalla chenu ulube'lu Jesuse lubeelá bee bene'nu. 25Chequie chenu uni beella lu Tomás: ―Ulañi'ru Detá Jesuse. Che ucuaqui Tomás lubeella: ―Tunu la lañia yanu elu uzucu clau, nu tunu la dua'a cuene yaa ze'e nu tunu la du'a yaa cue'tsenu elu udi'qui, la chili arquia. 26Xunu bichia luze'elá, uyetesa' zeca bee bene'nu nu le'ca nzu Tomás leta beella nu nacu' puerta nucua'a beella, che ulube'lu Jesuse lubeella nu uninu lubeella: ―¡Tsuxe arqui'hua! 27Che uninu lu Tomás: ―Udu' cuene yaalu ca'a nu ubi'yacuru yaa, nu uli'qui yalu nu una'tse cue'tsea la za' arqui'lu. ¡Uchili arqui' li'á! 28Chequie uni Tomás lunu: ―¡Li'ilu necalu Paa nu Diosea! 29Nu uni Jesuse: ―¿Nzelí arqui'lu li'á xne ulañi'la'lu li'á? ¡Ñia neca lu cuenda' bee bene enu nzeli arqui' li'á añinzuca nú lá lañi' beei li'á! 30Huaxilá bee milagro nú uri'i Jesuse lubee bene'nu nu lá quiee lu libro quie'. 31Pero uquiee bee nucua' para nú chili arqui'hua nú Jesuse neca Cristo lli'ñi Diose, nu lunú chili arqui'hua li'inu lu'cuhua elunehuañi lu Diose liñibe.

will be added

X\