San~Juan 19

1Che unibiya' Pilato nú uzete'che' bee sundado Jesuse. 2Nu bee sundado cua' ureche' beei tucu ellu'ñi' eche uzucu'beei equienu, nu ungutubeei li'inu tucu laquie morado. 3Che uyabica beei lunu rnibeei: ―¡Nehuañi arre Israel! Nu udichiu beei ya beei lunu. 4Chequie uchiu'u zeca'la Pilato nu unilla lubee bene Israel ze'e: ―Ubi'yacuruhua, hualla ca'a para nú ri'ihua beya' nú lá llela ni' tucu equiya nú xi uri'illa. 5Nu uchiu'u Jesuse nzucu ellu'ñi' eche equienu nu nutunu laquie morado nú ungutubeei li'inu. Che uni Pilato lubee bene ze'e: ―¡Nzuquie'lla! 6Che bee ule'ya enu rnibiya' cuna bee bene enu rriucu Indu llene Jerusalén chenu ulañi' beei li'inu uquixie beei rixiali beei rnibeei: ―¡Uquie'ella lu cruse! ¡Uquie'ella lu cruse! Che uni Pilato lubeei: ―Li'ihua uya'hualla nu uquie'ehualla lu cruse, xne li'á la llela ni'tucu equiya nú xi uri'illa. 7Pero bee bene Israel ze'e ucuaqui beella nú unibeella: ―Li'iru rlu'curu tucu ley, nu lunú rnibiya' ley riala nú atilla xne rnilla nú necalla lli'ñi Diose. 8Chenu ubene' Pilato nucua' chiqui' ulliquilla. 9Che uyu'u zeca'lalla liñi palacio nu unedichia'lla lu Jesuse: ―¿Cá benelu? Pero lecaxi ucuaqui Jesuse lulla. 10Che uni Pilato lunu: ―¿Xie' la cuaquilu nú rnia la? ¿Xie' la ri'ilu beya' nú rlu'cua elurnibiya' nú nibiya'a nú quielu lu cruse, nu le'ca para nú la'a li'ilu la? 11Chequie ucuaqui Jesuse lulla: ―Lecaxi elurnibiya' rlu'culu lua, tunu lá liqui' Diosee lulu, enze'e bene enu udete' cuenda li'á lulu nze'e rlu'cu masela equiya luquela li'ilu. 12Nu desde hora ze'e, uquixie rla'na Pilato nú xneca modo la'alla Jesuse, pero bee bene Israel ze'e ubixialíbeei nú unibeei: ―¡Tunu la'alulla lacalu amigo' arre César! ¡Xne titse bene enu rni nú neca arre, rri'i condra nze'e arre César! 13Chenu ubene' Pilato nucua' uhua zecalla Jesuse ele'ya' ante lubee bene ze'e nu chu uzuculla lu xleta elu rlualullae, tucu luhuare elu lee bedichia' hebreo Gabata, nu rni nucua' labe ele'ya' nú necache' cuna quiee. 14Nu bichia ze'e neca bichia xee eliñi baxcu, nu tucu rebibichia, uni Pilato lubee bene Israel cua': ―¡Nzuquie' arre'hua! 15Pero ubixialíbeei nú unibeei: ―¡Utilla! ¡Utilla! ¡Quie'ella lu cruse! Che uni Pilato lubeei: ―¿Xie' quie'a arre'hua lu cruse la? Nu ucuaqui bee ule'ya enu rnibiya': ―Lecati stucu neca arre'ru, tucutsia arre César neca arre'ru. 16Chequie udete' cuenda pilato li'inu lubee sundado para nú chequie'e beei li'inu lu cruse. 17Nu uchiu'unu beei Jesuse nu nuya'nu cruse, nzenubeei li'inu “tucu luguare elu lee calavera”, nu bedichia' hebreo lee Gólgota. 18Ze'e uquie'ebeei li'inu lu cruse, nu cuna xiucu bene tucua beei cada tucu chú cue'tsenu nu li'inu labe. 19Nu unibiya' Pilato nú uquiee bee bedichia' equie cruse'nu nú rni: “Jesuse bene Nazaret, Arre' bee bene Israel.” 20Huaxi bee bene Israel ungula bee bedichia' ze'e xne luhuare elu uquie'e bee bene li'inu lu cruse axue Jerusalén, nu bee bedichia' ze'e nequiene cuna bedichia' hebreo, cuna bedichia' griego nu bedichia' latín. 21Enze'e bee ule'ya Israel enu máse rnibiya' uni beella lu Pilato: ―Xinu uquie'elu: “Arre' bee bene Israel”, mejora uquie'e: “Enu rni nú neca Arre' bee bene Israel.” 22Nu ucuaqui Pilato lubeella: ―Lunú uquie'a, uquie'elane. 23Chenu ulaxu nú uquie'e bee sundado Jesuse lu cruse, una'tsebeei xucunu nu utsabeei tacu pedaso xucunu nu uritsi'beei xucunu lu dacubeei. Nu stucu xucunu nú lee túnica nu lunú tucunecatsene nu la nedicune, 24enze'e uni bee sundado lusa'beei: ―La tsa'ahuane, mejora te ita'ahua tucu rifa para nú bi'ya'ahua ta'ahua ri'i anae. Scua uyalu tucu nú niquie lu ichi' Stichia' Diose elu rni: “Uditsi'beei xucua lusa'beei, nu urita beei rifa equie túnicaa.” Scua neca nú uri'i bee sundado ze'e. 25Axu elu uquie Jesuse lu cruse nzu na'nu cuna belalla, cuna María, una'a Cleofas, nu María Magdalena. 26Chenu ulañi' Jesuse na'nu nzu cue'tse bene'nu enu chiqui' secanu, uninu lu na'nu: ―Naa nzucua' endu'lu: 27Nu uninu lu bene'nu: ―Nzucua' na'lu. Desde hora ze'e uyucu cuenda bene'nu nucua' na'nu ni'lla. 28Chenu ulaxu nú uni Jesuse scua lunú nediya'la'nu nú uyalula yeene tucu nú riala nú acane. Nu para nú yalu tucu nú nequie lu ichi' Stichia' Diose, che uninu: ―Rebichia. 29Nu ze'e nzu tucu jarra nú achechicu nu' vinagre, che ucuacha beei tucu esponja lu vinagre ze'e nu uzucu' beeii lli'i tucu aca nú lee hisopo, nu uti'beeii ru'unu. 30Chenu ungüe' Jesuse vinagre ze'e, uninu: ―Uyalula yeene nee. Che chu uzi'quindiquinu nu ungutinu. 31Nu bichia ze'e neca bichia xee eliñi baxcu chenu rri'ilu bee bene ye nú xi qui'ñiabeei, nu la niarqui'beei nú ya'na cuerpo' bee bene ze'e lu cruse bichia nú sulachi beei, xne bichia ze'e neca bichia nú máse necachi neca para li'ibeei, enze'e unacu'beei lu Pilato nú nibiya'lla nú acha cuchiu' bee bene enu nequie lu cruse enu nehuañisca' para nú atibeei nu laca beei lu cruse. 32Che uyaa bee sundado nu rluti udi'chia beei cuchiu' tucu bene ze'e nu che udi'chia beei cuchiu' stuculla. 33Pero chenu uyabica beei lu Jesuse ulañi'beei nú ungutilanu. Enze'e ne i'chia'beei cuchiu'nu. 34Pero tucu bee sundado ze'e utse'e lanza cue'tsenu, nu uchiu'u rene cuna inza cue'tsenu. 35Nu bene enu rquie'e nucua' ulañilu'lla nú ungae scua, nu neli neca nú rnilla, nu li'illa nediya'lla nú neli neca nú rnilla para nú chili arqui'hua. 36Ungae scua para nú uyalu tucu nú nequie lu ichi' Stichia' Diose elu rni: “Ni' tucu arta'nu lá i'chia beei.” 37Nu le'ca stucu luhuare lu ichi' Stichia' Diose elu rni: “Lañi' bee bene li'inu enu utsee lanza.” 38Chenu ulaxu nú unga ye bee nucua' che José bene eyeche Arimatea uyana'cu'lla cuerpo' Jesuse lu Pilato para nú uya'llanu. José quie' neca bene' Jesuse pero a'chi' xne xiquilla bee usticia Israel. Nu chenu uzela Pilato, che uyalla nu unguya'lla cuerpo'nu. 39Nu le'ca Nicodemo enu uyabedichia'nu Jesuse tucu rula', uriñayulla tucu ala llichi'i kilo mirra nú nucha cuna áloe nú ñia rlia. 40Che una'tse beella cuerpo'nu utelabeella venda nú nu' perfume, tucu nú neca costumbre' bee bene Israel chenu rcachi' beella tucu benenguti. 41Axu luhuare elu uquiee Jesuse lu cruse nu' bee aca ndixí, nu ze'e nzucu tucu eluhua elu lasca'lí achi' nitucu bene, 42ze'e ucachi' beella cuerpo' Jesuse xne axue, nu enta quixiela eliñi baxcu nú rri'i bee bene Israel.

will be added

X\