San~Juan 16

1’Rnia bee bedichia' quie' luhua para nú la tsu chiucu arqui'hua. 2Xne nze'ta bichia nú la zela'beei nú chu'uhua liñi indu, nu hasta riña bichia nú bene enu úti li'ihua zeca nze'e nú rri'i nze'e lunú riu' arqui' Diose. 3Rri'i beei scua xne lasca' chulu beei Pa Diose nu ni' li'á lá chulu beei. 4Rnia bee nucua' luhua para nú chenu acane ellu'cu arqui'hua nú unilane luhua. Né nia nucua' luhua desde nú uquixiea setea li'ihua, xne li'á nzua cuna li'ihua. 5’Pero nee nzia'a lu enu uxe'la li'á nu ni'tucuhua la nedichia' lua cá nza'a, 6a'la chiqui' nehuana nzu arqui'hua nú unia scua luhua. 7Pero li'á rnia luhua: nú neca nze'calá para li'ihua nú nzia'a. Xne tunu la ya'a la ye'ta Espíritu Santo luhua pero tunu nzia'a li'á xe'la Espíritu Santo luhua. 8Nu chenu riñanu che lube' nze'canu lubee bene ta enu rlu'cu dula, nu ta enu la lu'cu dula, nu ta enu riala castiya. 9Nu li'ibeei ri'ibeei beya' nú rlu'cu beei dula xne la chili arqui'beei li'á. 10Nu ri'ibeei beya' nú li'á la lu'cua dula xne nzia'a lu Pa Diose, nu la lañia'hua li'á, 11nu le'ca ri'ibeei beya' nú enu riala castiya neca beze'lu enu rnibiya' lu iliulabe quie'. 12’Huaxisca'lá nú rlucua nia luhua, pero nee li'ihua la ri'ihua beya' xi rni bee nucua'. 13Pero chenu riña Espíritu Santo li'inu lube'nu luhua ye nú neli neca xne la ninu lu cuenda' li'inu, li'inu ninu ye nú riene'nu nu equie cuenda'nu ri'ihua beya' beenú aca. 14Nu li'inu zucu' ayanu li'á, xne ye nú nediya'nu lu cuendaa lube'nue luhua. 15Ye nú rlu'cu Pa Diose, le'ca necane stenea enze'e unia luhua nú ye nú nediya' Espíritu Santo lu cuendaa lube'nue luhua. 16’Lle'natsia la lañia'hua li'á, pero cheelá lle'natsia chu lañi' zeca'hua li'á, xne nzia'a lu Pa Diose. 17Chequie nu' bee bene'nu unedichia' beella lu sa'beella: ―¿Xi rninu nú lle'natsia la lañia'ahuanu nu cheelá lle'natsia lañi' zeca'ahuanu xne nzianu elu nzucu Pa Diose? 18¿Xi rni bedichia' nú rninu “lle'natsia”? La ria'ahua beya' xi rninu. 19Nu uri'i Jesuse beya' nú niarqui' beella nedichia' beella lunu bedichia' nú uninu lubeella: ―¿Rnedichia'hua lu sa'hua lunú unia, lle'natsia la lañia'hua li'á nu cheelá lle'natsia lañi' zeca'hua li'á la? 20Neli rnia luhua nú una'hua nu nehuana tsu arqui'hua, diquila nú ñia nzu arqui' beelá bee bene. Pero lecaxi ri'i nú nehuana tsu arqui'hua, cheela che'e nú ñia'la tsu arqui'hua. 21Tucu nú seca tucu una'a enu enta nú ala endu' rlachi xla'culla pero chenu ungulala endu'lla, ni' la llucua' arqui'lla nú nehuana utsi'lla equie nú ñia nzu arqui'lla nú ungula endu'lla lu iliulabe. 22Le'ca scua li'ihua nehuana nzu arqui'hua nee, pero chenu nzelabi'ya zeca li'ihua chiqui' ñia tsu arqui'hua nu lecati axi nú ñia nzu arqui'hua. 23’Bichia ze'e leca' xi nedichia'hua lua. Nu neli nia luhua nú ye nú nacu'hua lu Pa Diose, li'inu liqui'nue luhua equie cuenda' li'á. 24Hasta nee lecaxi nacu'hua lunú equie cuendaa, una'cuhua nu yucuhuane para nú za' nú ñia tsu arqui'hua. 25’Ye beenú unia luhua la ri'ihua beya'e xne unine luhua puro bee ejemplu pero nze'ta hora nú la nia'a scua luhua, sino que achee nia luhua equie cuenda' Pa Diose. 26Bichia ze'e equie cuendaa nu' modo nacu'hua lu Pa Diose nu la qui'ñia' nú nacua lunu equie cuenda'hua, 27xne le'ca li'i Pa Diose seca li'ihua, secanu li'ihua xne secahua li'á nu nzeli arqui'hua nú li'inu uxe'lanu li'á. 28Lunú uriña lu iliulabe quie', nu nee tsa'na iliulabe quie' para nú benchila' zeca lunu. 29Chequie uni bee bene'nu lunu: ―Nee si' achee rixiule'elu luru, la nia'lu bee ejemplu luru tucu nú unilu nú la ri'iru beya'. 30Nee rri'iru beya' nú nediya'lu yeene nu la qui'ñialu nú ti nedichia' lulu, enze'e nzeli arqui'ru nú nze'talu enza lu Diose. 31Nu ucuaqui Jesuse lubeella: ―¿Nee si' nzeli arqui'hua li'á la? 32Xne nee nze'ta riñala hora, nu nee necalane, nú li'ihua ri'chialetsehua tucua tucuahua na'tsehua inziu'hua, nu tsa'nahua stuculi'a. Pero la ya'na stuculi'a xne Pa Diose nzu cuna li'á 33Rnia ye bee nucua' luhua para nú equie cuenda'e ñia tsu arqui'hua. Li'ihua nehuana zecahua lu iliulabe, pero la lliquihua xne li'á uri'ila ana luye nú nu' lu iliulabe.

will be added

X\