San~Juan 15

1’Le'ca uni Jesuse lubeella: ―Li'á neca xi neca luchi lube' nu Pa Diose neca xi neca enu rquienii. 2Nu bee bene enu neca xi neca bee luchi yae. Bee luchi yae nú la ayu uva, chiecu'nue, pero beenú rayu uva, chi'qui yae nú la zibi' para nú lecaxi nae nu che ayulae. 3Li'ihua leca' xi nahua equie nú nzeli arqui'hua bee bedichia' nú unilá luhua. 4Aca tucutsiahua cuna li'á, tucu nú tucutsia necaa cuna li'ihua, xne tucu luchi lube' leca modo ayu uva lue tunu la nzenene cuna luchi uzana le'ca scua li'ihua leca modo ri'ihua lunú riu' arqui' Diose tunu la neca tucutsiahua cuna li'á. 5’Li'á neca xi neca luchi lube' uzana nu li'ihua necahua xi neca luchi yae. Bene enu la tsana' arqui' nú neca tucunecatse cuna li'á, nu li'á necatucunecatsea cuna nze'e, nze'e máse rri'i lunú riu' arqui' Pa Diose, xne tunu la neca tucunecatsehua cuna li'á lecaxi acahua ri'ihua. 6Bene enu sana' arqui' nú neca tucunecatse cuna li'á, zeca nze'e tucu nú seca yaa luchi lube' nú urecu' nu rebichi, che yete'sae para nú chiquine. 7’Tunu la tsana'hua nú neca tucunecatsehua cuna li'á nu la tsana'hua nú sucu'hua stichia'a, una'cuhua nú niarqui'hua nu yucuhuane. 8Nu chenu neli rri'ihua lunú riala ri'ihua equie bee nucua', li'ihua sucu' ayahua Pa Diose, scua rlube' nú neli necahua bee benea. 9Tucu nú seca Pa Diose li'á, le'ca scua se'ca li'ihua udu' equiehua nú li'á se'ca li'ihua. 10Tunu li'ihua sucu'hua stichia'a, rdu' equiehua nú li'á se'ca li'ihua, scua tucu nú sucua nú rni Pa Diose, xne rdu' equiea nú li'inu secanu li'á. 11’Rnia scua luhua para nú ñia tsu arqui'hua tucu nú ñia nzu arquia para nú za' nú ñia nzu arqui'hua. 12Nee lunú rnibiya'a luhua necane: nú uzecahua bee sa'hua tucu nú se'ca li'ihua. 13Le'ca eluseca nú máse llene neca nú zela tucu bene ati equie cuenda' amigo'. 14Nu li'ihua necahua bee amigoa, tunu rri'ihua lunú rnibiya'a luhua. 15La nia mosoa luhua xne tucu moso' la ri'i beya' ye nú rri'i patrón. Li'á rnia luhua bee amigo, xne li'á unila luhua ye beenú uni Pa Diose lua. 16Li'ihua nécañihua li'á, sino que li'á ucañia li'ihua, nu uxe'la li'ihua para nú chetixiule'ehua lubee bene nú chili arqui'beei li'á, tucu nú nzeli arqui'hua li'á para nú nzedalala bee bene enu chili arqui' li'á. Nu scua Pa Diose liqui' luhua ye nú nacu'hua lunu equie cuenda' li'á. 17Nee lunú rnibiya'a luhua necane: nú uzecahua bee sa'hua. 18’Tunu rana arqui' bee bene li'ihua ullu'cu arqui'hua nú li'á rlutila uhuana arqui'beei. 19Tunu li'ihua nehuañisca'hua tucu nú nehuañi beei, seca beei li'ihua tucu nú seca beei sa'beei, pero li'á ucañia li'ihua leta beei, nu rana arqui'beei li'ihua, xne la ria'ahua tucu nú rri'i beei. 20Ullu'cu arqui'hua bee bedichia' nú unilá luhua: “Ni' tucu moso' la neca equiela lu patron'.” Neequie tunu li'á rri'i condra bee bene, le'ca ri'i condra beei li'ihua, nu tunu rri'i caso beei stichia'a, le'ca ri'i caso beei stichia'hua. 21Scua ri'inu beei li'ihua lunú necahua bee benea, xne lachulu beei enu uxe'la li'á. 22’Li'ibeei lecaxi equiya lu'cu beei, tunu li'á lá ayela ania lubeei pero nee lunú ubelalá unia lubeei leca' xi quieru'ulá beei lu cuenda' stula beei. 23Nu bee bene enu rana arqui' li'á, le'ca nuu Pa Diose rana arqui'beei. 24Lecaxi equiya lu'cubeei tunu li'á lá ari'á bee milagro lubeei, bee milagro nú ni' tucu bene lá ri'i, pero nee añinzuca nú ulañi'la' beei beenú uri'á rana arqui'beei li'á, nu le'ca nuu Pa Diose rana arqui'beei. 25Pero recae scua, xne rqui'ña nú yalu tucu nú nequie lu ley' beei elu rni: “Rana arqui'beei li'á nu lecaxi rri'a lubeei.” 26’Pero chenu riña enu du' ana arqui'hua, li'inu necanu Espíritu Santo enu xe'la luhua desde elu nzucu Pa Diose, nu li'inu ninu equie cuendaa. 27Nu le'ca li'ihua nihua equie cuenda' li'á, xne nucua'anuhua li'á desde nú uquixiea setea li'ihua.

will be added

X\