San~Juan 12

1Sexu'cu bichia rri'i para nú aca eliñi baxcu, chenu uya Jesuse Betania, elu neca lachi Lázaro enu uri'inu nú uhuañi zeca lu eluti. 2Ze'e ureche' beella tucu exee para Jesuse, Marta neca enu udete' elubacu lubeella nu Lázaro neca tucu enu nzucununu lu mexa. 3Hora ze'e uriñayu María tucu arula' litro perfume nú huaxi seca xne necache'e puro nardo nu udu'nchue equie cuchiu Jesuse, nu chu ucui'chinchue cuna ichia equienchu. Nu diqui liñi ni'i ze'e ñia ulia uri'i perfume cua'. 4Che uni Judas Iscariote enu neca lliana' Simón enu neca tucu lu chi'chiucu bee bene' Jesuse enu udete' cuenda li'inu, uni: 5―¿Xinu lá autinchu perfume quie' chuna ayu'u dimi denario para nú aca elietsa lubee bene enu seca elitsi? 6Pero né ni Judas scua lunú nzenu arqui'i lu cuenda' bee bene enu seca elitsi, uniitsiai scua xne nehuana'i nu como li'i nuya' cuendai biti nú nu'che' dimi, che rcachi'i bee dimi nú rdete' beella yai duche'i. 7Chequie uni Jesuse lui: ―La ri'chialunchu, xne li'inchu udu'xulanchu perfume quie' li'á para bichia chenu achi'a. 8Xne bee bene elitsi ye bichia nucua'a cuna li'ihua, pero li'á la ye tiembu nzua cuna li'ihua. 9Huaxi bee bene Israel ungabiya' nú nzucu Jesuse eyeche Betania, uya beei ze'e. La necatsiae para nú lañi'beei Jesuse sino que le'ca para nú lañi' beei Lázaro enu uri'inu nú uhuañi lu eluti. 10Enze'e bee ule'ya enu rnibiya' unga tucunecatse beella para nú úti beella Jesuse nu le'ca nuu Lázaro uniarqui' beella úti beella. 11Xne equie cuenda'lla huaxi bee bene Israel xiu'u leta beella, nu nzeli arqui' beella Jesuse. 12Chenu uye'e lu yuu stucu bichia, huaxi bee bene bee enu uriña Jerusalén lu eliñi baxcu ungabiya' beella nú riña Jesuse ze'e. 13Che uchiecu' beei iña nu uya cha'calu beei li'inu, nu urixialibeei nú unibeei: ―¡Diose nzu cuna lia'ahua! ¡Ñia neca lu cuenda' li'inu enu nze'ta lu cuenda' Diose, enu neca Arre Israel! 14Jesuse ullela' tucu burro e'ne' nu uricunuí, tucu nú rni lu ichi' Stichia' Diose elu rni: 15Bee bene Sión la lliquihua, bi'yacuruhua nze'taquiela Arre'hua, nchiucu' equie tucu burro e'ne'. 16Hora ze'e lá ri'i bee bene'nu beya' lunú reca, pero chenu uquienu liñibe che uri'ibeella beya' nú scua niquie lu ichi' Stichia' Diose equie cuenda'nu, enze'e unga scua. 17Bee bene enu nucua'a cuna Jesuse chenu ubixianu Lázaro nú uchiu'ui liñi eluhua, nu uri'inu nú uhuañi lu eluti, bee bene cua' udixiule'e lubee bene lunú ulañi'beei. 18Enze'e uchiu'u huaxi bee bene uyacha'calu Jesuse, xne ungabiya' beei bee milagro nú uri'inu. 19Chequie uni bee fariseo lu sa'beei ulañi'huanee nú leca xa modo ria'ahua: ―Bi'yacuruhua tescuala' huaxi bee bene nzenala li'illa. 20Bee bene enu uriña Jerusalén lu eliñi para nú lu'cu ula'na lu Diose, leta beei nucua'a chiucu chuna bee bene griego. 21Li'ibeei uyabica beei lu Felipe, enu neca bene eyeche Betsaida, tucu eyeche lu iliu Galilea, nu uzequiee beei lulla nú unibeei: ―Detá, niarqui'ru bedichia'nuru Jesuse. 22Che uyatixiule'e Felipe nucua' lu Andrés nu che rucu beella uyatixiule'e beella nucua' lu Jesuse. 23Chequie uni Jesuse lubeella: ―Uriñala hora nú li'á Bene enu uxe'la Diose, zucu' aya bee bene li'á. 24Xne li'á nia luhua nú tucu nú neca tucu ebichi trigo nú tunu la benii, necasca' tucutsiae, pero tunu benii che chiqui' ayune. 25Xne bene enu máse niarqui' huañi lu iliulabe quie', enta bichia nú laxu nucua', pero bene enu nzenu arqui' nú ri'i lunú niarqui' Diose mase ulle'calla lunú ulle'calla lu'culla elunehuañi nú leca xunga laxu ante lu Diose. 26Tunu nu' bene enu niarqui' nú zibi' lua, ye'taquie nze'e li'á, nu elu nza'a le'ca ze'e nza nze'e. Nu bene enu zibi' lua, zucu' aya Pa Diose nze'e. 27’¡Chiqui' nehuana nzu arquia nee hora quie'! ¿Nu xi nia? ¿Nia “Pa Diose, utsila'a li'á lunú chiqui' nehuana se'ca”? ¡La nia scua xne para nucua' nzela! 28Enze'e rnia, Pa Diose ulube' poder'lu lubeei. Che uyene tucu chii enza liñibe, nú rni: ―Ulubela poder nú rlu'cua lubee bene pero lubezecane stucu bese lubeei. 29Chequie chenu ubene' bee bene enu nucua'a ze'e chii cua', uni beella nú biziyu' neca enu uni, pero nu' beella enu uni: ―Tucu ángel neca enu ni lunu. 30Che uni Jesuse lubeei: ―Lá yene chiquie' lu cuenda' li'á sino que necane para li'ihua. 31Nee uriñala hora nú aca elu usticia lu iliulabequie' nu nee la nibiya' beze'lu tucu nú rnibiya'i lu iliulabequie'. 32Pero chenu uquieelá lu cruse, che ri'á nú yelu bee bene chili arqui' li'á. 33Scua udixiule'enu xa modo atinu. 34Che ucuaqui bee bene lunu: ―Li'iru nediya'ru nú lu ley rni, nú leca xunga ati Cristo. ¿Xinu rnilu nú Bene enu uxe'la Diose rqui'ña nú quiee lu cruse? ¿Ti neca Bene enu uxe'la Diose che? 35Chequie uni Jesuse lubeei: ―Lacaxea' nzulá ellie'e quie' cuna li'ihua, enze'e uyaquiehuane diquila nú nzue cuna li'ihua para nú la ri'i nú necabe ana luhua xne bene enu nzenala nú necabe la ri'i nze'e beya' cá nza nze'e. 36Enze'e diquila nú nzu ellie'e quie' cuna li'ihua uchili arqui'huane para nú acahua bee benea. Chenu ulaxu nú uni Jesuse bee bedichia'quie' chu nzanu nu né lañia' beei li'inu. 37Pero añinzuca nú uri'i Jesuse huaxi bee milagro lubeei, né chili arqui'beei li'inu. 38Nu scua uyalu nú uni profeta Isaías chenu unilla: Pa Diose, lecati nzeli arqui' beenú rniru equie cuenda'lu. Lecati rri'i beya' nú equie poder'lu huaxi beenú unga. 39Enze'e né chili arqui'beei li'inu. Nu le'ca uquie'e profeta Isaías: 40Diose uri'i nú neca xi neca nú la lañi'beei, nu uri'inu nú unga nziti arqui'beei, para nú la lañi'beei, nu la ri'ibeei beya', para nú la benchila'beei lua, para nú ri'á perdona stula beei. 41Uni Isaías scua xne ulañi'la'lla poder nú rlu'cu Jesuse hasta hua'tu, enze'e unilla scua equie cuenda'nu. 42Pero huaxi bee bene Israel uchili arqui' Jesuse, nu hasta chiucu chuna bee bene enu rnibiya' uchili arqui' li'inu. Pero lá tsiru'u beei nucua' lubee bene xne xiqui beei nú cánu la zela' bee fariseo nú chu'ulá beei liñi indu. 43Xne másela uyu'u arqui'beei nú zucu' ayaa bee bene li'ibeei, luhuare nú ya'na nze'ca beei lu Diose. 44Nu juerte uni Jesuse: ―Bene enu nzeli arqui' li'á, la nzeli arqui' nze'e li'itsia, le'ca nzeli arqui' nze'e Pa Diose enu uxe'la li'á. 45Nu enu rlañi' li'á, le'ca rlañi'la' nze'e Pa Diose enu uxe'la li'á. 46Li'á enu neca ellie'e, uriña lu iliulabe para nú bee bene enu nzeli arqui' li'á, la chenala' beei inziu nú necha neca. 47Enu riene' stichia'a nu la ri'i casoe, li'á la necaa enu dete' castiya nze'e, xne lá yela lu iliulabe para nú detea castiya bee bene, sino que uriña para nú tsila'a bee bene. 48Bene enu rluachu li'á, nu la ri'i caso stichia'a nzula enu dete' castiya nze'e, bee bedichia' nú unila dete' castiya nze'e bichia chenu hualu Diose lu cuenda' bee bene. 49Xne bee bedichia' nú rnia la necane stichia'tsia, sino que Pa Diose enu uxe'la li'á, li'inu unibiya'nu lua nú xi nia nu xi zetea bee bene. 50Nu nediyaa nú stichia' Pa Diose necane para nú lu'cu bee bene elunehuañi nú leca xunga laxu lu Diose. Enze'e rnia tucu nú unibiya'nu lua nú nia.

will be added

X\