San~Juan 1

1Ante nú quixie iliulabe nzula tucu enu neca bedichia', nu li'inu nzulanu cuna Diose nu necanu Diose. 2Li'inu enu neca bedichia' nzulanu cuna Diose ante nú quixie iliulabe. 3Ye beenú nu' equie cuenda' li'inu ungache' bee nucua'. Nu ni'tucu bee lunú nu' lá acache' tunu leca li'inu. 4Li'inu rlu'cunu elunehuañi, nu elunehuañicua' neca ellie'e para lu yebee bene iliulabe. 5Nu ellie'e cua' rdu'llie'e lubee bene mase nú necabe nzu elliebacu'beei, pero lá ri'i nú natsacabecua' ana lu ellie'ecua'. 6Uhuañi tucu bene enu lee Juan, enu ucañi Diose, 7para nú ungalla enu udixiule'e equie cuenda' ellie' Diose nu li'illa udixiule'ella nucua' para nú chili arqui' yebee bene ellie'e cua'. 8Pero la aca Juan ellie' Diose, ungatsialla enu ube'tatixiule'e lubee bene equie cuenda' ellie'ecua'. 9Xne enu mero neca ellie'ecua', rdu'llie'enu elliebacu' yebee bene iliulabe, nu ube'talanu lu iliulabe quie'. 10Li'inu ube'tanu lu iliulabe, nu añinzuca nú equie cuenda' li'inu ungache' iliulabe, pero né zela bee bene iliulabe achu'lubeei li'inu tucu nú riala nú achu'lubeei li'inu. 11Ube'tanu lubee bene lachinu, nu né ri'ibeei caso li'inu. 12Pero yebee bene enu uri'i caso li'inu cuna nú uyalí arqui' li'inu, li'inu uri'inu nú neca beella lli'ñi Diose. 13Nu neca beella lli'ñi Diose, nu la necane equie cuenda' nú neca beella lli'ñi bene iliulabe, urre nú niarqui' bene urre rri'i bee bene elliebacu' nú lu'cu bene endu' sino que lunú nzelíla arqui'beella li'inu neca beella lli'ñinu. 14Li'inu enu neca bedichia' unganu bene, nu uhuañinu lu iliulabe cuna lia'ahua, llene neca eluseca'nu, uninu puro nú neli neca. Li'iru ulañi'ru lunú rnibiya'nu nu uyucunu elurnibiya', xne li'itsianu necanu Lli'ñi e'cu Diose. 15Chenu udixiule'e Juan equie cuenda' li'inu lubee bene, li'illa unilla: ―Jesuse quie' neca enu unia chenu unia luhua nú enu nze'ta lulá máse neca equienu luquela li'á, xne hasta hua'tu nzulanu luquela li'á. 16Chiqui' llene neca eluseca'nu lua'ahua, yebichia riucua'ahua ye eluxene'nu nú rliqui'nu luyea'ahua. 17Equie cuenda' Moisés uliqui' Diose ley'nu lua'ahua. Pero equie cuenda' Jesucristo uri'i nze'ca'ahua beya' xa neca eluseca'nu lua'ahua, nu uria'ahua beya' ta nú neli neca. 18Ni'tucu bene leca xunga ulañi' Diose, tucutsia Lli'ñinu enu nzucu cuna li'inu ulube' lua'ahua xa neca Diose. 19Chequie desde Jerusalén bee usticia' bee bene Israel, uxe'la beella bee ule'ya cuna chiucu chuna bee bene Levitas para nú uya beella lu Juan Bautista unidichia' beella nú ti necalla. 20Nu li'illa unilla ye nú neli neca lubeella, nu unilla: ―Li'á la neca Cristo. 21Che unidichia' zeca beella lu Juan: ―¿Ti necalu che? ¿Li'ilu necalu Elías la? Nu ucuaquilla: ―Laca bene ze'e. Nu unibeella lulla: ―¿Urre li'ilu necalu profeta enu nzu nú nze'ta la? Nu ucuaquilla lubeella: ―Laca bene ze'e. 22Nu unibeella lulla: ―¿Ti necalu che? Xne rqui'ña nú nzeyuru resuna lubee bene enu uxe'la li'iru. ¿Udixiule'e luru ti necalu? 23Chequie uni Juan lubeella: ―Li'á neca tucu enu juerte rixiali lu tucu dañi achi elu lecati nucua'a: “Ulihua inziu' Diose Pa liñibe” ―tucu nú uni profeta Isaías hasta hua'tu. 24Chequie bee bene enu uxe'la bee fariseo para nú nzebedichia'nu Juan, 25nú unedichia' beella lu Juan: ―Tunu lacalu Cristo, ni' Elías, ni' profeta enu nzu nú nze'talá, ¿xiquie nú rrinzalu bee bene che? 26Che ucuaqui Juan nú unilla lubeella: ―Li'á rrinza bee bene cuna inza, pero letahua nzu tucu enu lasca' chuluhua, 27nu li'inu necanu enu nze'ta lulá, nu ni' nú hua lucunu la yalaa, xne li'inu maselá neca equienu luquela li'á. 28Yebee nucua' unga tucu luhuare elu lee Betábara, stucu chú re'cu Jordán, elu urinza Juan bee bene. 29Chenu uye'e luyuu stucu bichia, ulañi' Juan nú nze'tabica Jesuse elu nzulla, nu unilla: ―¡Ubi'yacuruhua, benequie' neca Cordero' Diose enu chila stula bee bene iliulabe! 30Equie cuenda' li'inu unia luhua chenu unia: “Lulá nze'ta tucu bene enu másela neca equie lua, xne hasta hua'tu nzulanu luquela li'á.” 31Ni' li'á lá ri'á beya' nú li'inu necanu enu nzu nú nze'ta, pero li'á uriñaa para nú rinza bee bene cuna inza para nú chulu bee bene Israel li'inu. 32Le'ca uni Juan lubeei: ―Li'á ulañia nú ulaca Espíritu Santo enza liñibe xi neca tucu paloma equienu. 33Añinzuca nú lá chulua li'inu, pero enu uxe'la li'á para nú rinza bee bene cuna inza, li'inu uninu lua: “Chenu lañi'lu nú laca Espíritu Santo equie tucu bene nu ya'nane equiella, li'illa necalla enu rinza bee bene cuna Espíritu Santo.” 34Li'á ulañilánu, nu nediya nze'ca nú li'inu necanu Lli'ñi Diose. 35Chenu uye'e lu yuu stucu bichia, nzu zeca'la Juan ze'e cuna chiucu bee bene'lla. 36Chenu ulañi'lla nú nzedete Jesuse ze'e, chequie unilla: ―¡Ubi'yacuruhua! Benequie' neca Cordero' Diose. 37Chenu ubene' rucu bene' Juan nucua', che nzequie beella Jesuse. 38Nu chenu ubelleta Jesuse, ulañi'nu nú nze'taquie beella li'inu, nu uninu lubeella: ―¿Xi rla'nahua? Nu ucuaqui beella: ―Maestro, ¿cá nzuculu? 39Che ucuaqui Jesuse lubeella: ―Utehua para nú lañi'hua. Chequie uya beella nu ulañi' beella elu nzucunu, nu uya'nanu beella li'inu ze'e bichia ze'e, xne necala tucu rquietacu uchee. 40Tucu lu rucu bene' Juan enu uyaquie Jesuse, enu ubene' lunú uni Juan, li'i necai Andrés bichi Simón Pedro. 41Andrés quie' rluti uya la'nai bichi Simón Pedro nu uni lulla: ―Ullela'la'ru Mesías ―nu rni bedichia' cua' Cristo. 42Chequie Andrés unguya' Simón elu nzu Jesuse, nu che ulañi' Jesuse li'illa nu uninu: ―Li'ilu necalu Simón, lliana' Jonás, pero nee chiu'uleelu Cefas ―nu rni bedichia' cua' Pedro. 43Chenu uye'e luyuu stucu bichia uri'ila Jesuse elliebacu' nú nzanu Galilea, nu ulla'canu Felipe nu uninu lulla: ―Utequie li'á. 44Felipe quie' neca bene eyeche Betsaida, elu le'ca neca lachi Andrés cuna Pedro. 45Nu che uya la'na Felipe Natanael, nu unilla lui: ―Ullela'la'ru bene enu rni Moisés lu libro ley, le'ca li'illa enu uni bee profeta enu uquie'e Stichia' Diose. Li'inu necanu Jesuse lli'ñi José bene eyeche Nazaret. 46Che ucuaqui Natanael: ―¿Xie' nu' bene nze'ca eyeche Nazaret la? Nu uni Felipe lulla: ―Utecuru ne lañi'lu. 47Chenu ulañi' Jesuse nú nze'ta Natanael, uninu: ―Ca'a nze'ta tucu bene enu neli neca bene Israel, enu la zequiee. 48Chequie unidichia' Natanael lunu: ―¿Xaquie nu'lulu li'á? Nu ucuaqui Jesuse lulla: ―Ante nú bixia Felipe li'ilu chenu nzulu rqui' tucu aca higuera, che ulañia li'ilu. 49Nu uni Natanael lunu: ―Maestro, ¡li'ilu necalu Lli'ñi Diose, li'ilu necalu arre Israel! 50Che ucuaqui Jesuse nú uninu: ―Li'ilu nzeli arqui'lu li'á lunú unitsia lulu nú ulañia li'ilu rqui' tucu aca higuera. Pero nze'ta nú huaxilá nú lañi'lu luquela nú ulañi'lalu. 51Le'ca uni Jesuse lulla: ―Li'á nediyanze'ca nú li'ihua lañi'hua nú na'la liñibe, nu le'ca lañi'hua bee ángele' Diose, nú rquiee beenu nu rlaca beenu equie Bene enu uxe'la Diose lu iliulabe.

will be added

X\