Santiago 5

1Nee, ¡uquie'e diacahua li'ihua bee bene xene! ¡Una'hua nu ubixialihua equie nú nehuana zecahua nu cuna nú tsi'hua! 2Bee eluxene'hua rlaxulane, nu bee xucuhua racula bee belala'. 3Bee oro cuna bee plata nú rlu'cuhua ruchila bee. Ye bee nucua' rlube' lunú necha rri'ihua, nu le'ca li'ibee nucua' la'xue li'ihua tucu nú rri'i quii. Lecaxi zibi' nú uduche' tsiahua eluxene cua' para bichia chenu hualu Diose lu cuenda' bee bene. 4Ubi'yacuruhua, bee moso' enu uri'i riña'hua, rnacu' beella luhua nú ixiuhua beella, nu hasta Diose enu rlu'cu ye nú rnibiya' ubene'la' lunú xanabitsi beella. 5Li'ihua nehuañihua lu iliulabe quie' tucu nú niarqui'tsiahua nu rri'ihua tucu nú riu' arqui'hua, pero rri'itsiahua nú rru'cu nucua' arqui'hua lunú lecaxi zibi' para bichia nú hualu Diose lu cuenda' bee bene. 6Nu hasta ucua'nahua xa modo unguti bee bene enu lecaxi uri'i sin nú azucu' ru'u beella luhua chenu unguti beella. 7Nee, bee sa'a enu nzeli arquia'ahua Jesucristo, ulu'cuhua paciencia hasta bichia chenu riña Jesucristo enu rnibiya' lua'ahua. Tucu nú rlu'cu bene enu rri'i riña' lu yuu paciencia desde chenu rquixie rlaca quiu nu hasta nú rdete ru'u quiu para nú riuculla ula'cu'lla. 8Le'ca scua li'ihua ulu'cuhua paciencia nu la llaca'hua, xne la lea' nú nze'ta zeca Jesucristo enu rnibiya' lua'ahua. 9Le'ca nia luhua nú la xana bitsia'hua lu cuenda' bee sa'hua para nú la yalahua ni' tucu castiya, xne axula nzu nú riña li'inu enu hualue lu cuenda' bee bene. 10Uquia quiehua tucu nú uri'i bee profeta enu udixiule'e tucu nú uni Diose lubeella, ulu'cu beella paciencia nu uriqui' beella lunú nehuana ulle'ca beella. 11Li'ihua nediya'hua nú ñia nza lu cuenda' bee bene enu rriqui' lunú nehuana seca. Ubene'la'hua xa uriqui' Job lunú nehuana ulle'calla, nu le'ca nediya'hua xa uri'i Diose lulla chenu ulaxu nú ulle'calla scua, xne rua'a arqui' Diose bee bene cuna nú rlu'cu arqui'nu bee bene. 12Pero ubi'yahua chenu rdichia'hua urre chenu rri'ihua tucu compromiso cuna bee bene, la yala nú quie'ehua Diose, urre stucu nú rene para nú la zecahua castiya'hua, mejora uni'hua nú esquie necane tunu esquie necane, nu uni'hua nú la acane esquie tunu lacane esquie. 13Tunu nu'hua enu nehuana seca, rqui'ña nú nacu'lla lu Diose para nú ri'inu elietsa lulla. Nu tunu ñia nzu arqui' tatse tucuhua ula nze'e canto lu Diose. 14Nu tunu nu'hua enu riti, bixia nze'e bee sa'ahua enu rnibiya' leta bee sa'ahua enu nzeli arquia'ahua Jesucristo, para nú nacu' beella lu Diose equie cuenda' bene ze'e nu du' beella aceite equie bene ze'e lunú lee Jesucristo. 15Chenu rnacu' beella lu Diose equie cuenda' bene enu riti ze'e nu nzu teneli arqui'beella lunu, che yeca' bene enu riti ze'e, nu ri'iyeca Diose li'illa, nu tunu nu' dula nú uri'illa ri'i Diose perdona li'illa. 16Enze'e utsiru'uhua bee dula nú uri'ihua lubee sa'hua, nu una'cu'hua lu Diose lu cuenda' bee sa'hua para nú yeca'hua. Xne bene enu neca nze'ca arqui' lu Diose chenu rnacu'lla lunu, rri'inu caso li'illa. 17Tucu nú ulle'ca profeta Elías ungalla tucu bene tucu nú neca'ahua, chenu uziquiella nu unacu'lla lu Diose nú la laca quiu, che né laca quiu chuna lana arula'. 18Nu chenu unacu' zecalla lu Diose nú laca quiu, che uquixie nú ulaca quiu nu unguyu' zeca beenú unguyu' luyuu. 19Bee sa'a enu nzeli arquia'ahua Jesucristo, tunu nu' ta tucuhua enu xiu'uchu inziu' Diose, nu stucuhua ri'i nú benchila' zecalla inziu' Diose. 20Uri'ihua beya' nú tatse tucuhua enu rri'i nú benchila' zeca tucuhua inziu' Diose para nú la chequia'lla inziu nú necha neca, utsila'alla nze'e lu castiya' nze'e nu uri'illa nú unga perdona huaxi stula nze'e che.

will be added

X\