Santiago 2

1Nee, bee sa'a enu nzeli arquia'ahua Jesucristo enu rnibiya', la cañihua xa ri'ihua lubee bene. 2Te zucua'ahua, chenu neyete'sa'hua liñi indu elu riete'sa'hua, nu riña tucu bene xene enu nutu laquie fiñu luhua nu nu' bi'i oro yaalla, nu che riña tucu bene elitsi enu nutu laquie uxu luhua. 3Chequie máse ri'i casohua bene xene enu nutu laquie fiñu nu nihua lulla: “Uzucu ca'a elu neca nze'ca.” Nu nihua lu bene elitsi ze'e: “Uzucu lu'tsia urre uzucu lu yuu cua'.” 4¿Xie' la cañihua nú rri'ihua lubee bene chenu rri'ihua scua la? Chenu rri'ihua scua se'tahua bee bene cuna elliebacu'hua nú necha neca. 5Uri'ihua beya' bee sa'a enu nzeli arquia'ahua Jesucristo enu chiqui' se'ca. Diose ucañi bee bene elitsi lu iliulabe quie' para nú chiqui' tsu teneli arqui'beella lunu, nu riña beella elu rnibiya'nu, tucu nú ucuaqui u'nanu nú dete'nu lubee bene enu seca li'inu. 6Nu li'ihua lle'natsia rri'ihua caso bee bene elitsi. ¿Xie' la neca bee bene xene enu máse rri'i nú nehuana secahua nu ruya' beei li'ihua lubee usticia la? 7Nu ¿xie' la neca bee bene xene enu máse rni bedichia' nú necha neca equie cuenda' Jesucristo la?, nu equie cuenda' li'inu neca'ahua bene' Diose. 8Nee quie tunu li'ihua rri'ihua tucu nú rnibiya' ley Diose, tucu nú niquie lu ichi' stichia'nu elu rni: “Uzeca bee bene tucu nú secalu li'ilu rri'i nze'calu che.” 9Pero tunu la ri'ihua tucu necatse lubee bene, rri'ihua dula che, xne la zucu'hua tucu nú rni ley' Diose. 10Xne tatse bene enu sucu' yee nú rni ley' Diose, pero nu' tucu nú la zucu'lla lu cuenda' ley cua', uri'illa fallo lu yeene che. 11Le'ca li'i Diose enu uni: “La lu'cu niyu stucu una'a, nu la lu'cu una'a stucu niyu”, le'ca uninu: “La úti bee bene sa' bene.” Nu tunu la lu'cu niyu stucu una'a nu la lu'cu una'a stucu niyu, pero ruutilla bee bene, scua la zucu'lla lunú rni ley. 12Enze'e uni'hua nu uri'ihua xi neca bee bene enu neli dete' cuenda lu Diose, tucu nú rni stichia'nu nú sila'a lia'ahua lu dula. 13Xne bee bene enu la hua'a arqui' bee sa', le'ca lahua'a arqui' Diose li'ibeella chenu hualunue lu cuenda' bee bene, pero bee bene enu rua'a arqui' sa' lecaxi lliquilla chenu riña bichia ze'e. 14Bee sa'a enu nzeli arquia'ahua Jesucristo enu chiqui' se'ca, nee nia luhua lecaxi zibi' tunu rni tucu bene nú nzeli arqui'lla Diose nu la ri'illa tucu nú rninu, ¿xie' nu' modo tsila'alla equie nú rnilla nú nzeli arqui'lla scua la? 15Te zucu'ahua tunu nu' taa tucu'ahua sia niyu urre sia una'a rri'i falta xuculla, urre beenú aculla tucu bichia. 16Chequie ni tucuhua lubeella: “Uquia nze'cahua nu la tsi'hua nú nucuaa nu la lia'na'hua”, pero tunu la dete'hua nú secala'cha' beella; ¿lecaxi zibi' nú unihua scua lubeella che? 17Le'ca esquie tunu rni tucu bene nú nzeli arqui'lla Diose nu la ri'illa tucu nú rninu, lecaxi zibi' nú rnilla nú nzeli arqui'lla Diose che. 18Hasta nu' bene enu ni: “Li'ilu rnilu nú nzeli arqui'lu Diose, nu li'á rri'á tucu nu niarqui'nu.” Nee ulube' tucu nú nzeli arqui'lu Diose sin nú ri'ilu tucu nú rninu, che lubea tucu nú nzeli arquia li'inu xne rri'a tucu nú rninu. 19Rri'i nze'calu nú nzeli arqui'lu nú nu' tucutsia Diose. Pero hasta bee beze'lu nzeli arqui' nú nu' tucutsia Diose nu hasta recatse'tse' beei xiqui beei. 20Enze'e la aca netundulu, uri'i beya' tunu nzeli arqui' bene Diose nu la ri'illa tucu nú niarqui'nu, lecaxi zibi' nú nzeli arqui'lla scua che. 21Benea'ahua enu udetela tuxie Abraham, uri'i Diose nú necalla xi neca tucu bene enu la lu'cu dula, xne uzucu'lla nú rni Diose chenu uninu lulla nú nze utilla endu'lla Isaac para dete'lla li'i xi neca tucu u'na lunu. 22Ulañi'hua nee, equie nú uyali arqui' Abraham Diose, nu equie nú uri'illa tucu nú niarqui'nu, scua unga achee nú diquinu' arqui'lla uyalí arqui'lla li'inu. 23Scua uyalu tucu nú niquie lu ichi' Stichia' Diose elu rni: “Uchili arqui' Abraham Diose, enze'e uyucu arqui' Diose li'illa xi neca tucu bene enu né ri'i dula.” Nu scua uyulu bee bene li'illa nu necalla xi neca tucu enu rquiete' Diose. 24Ulañi'hua nee, nú rri'i Diose nú neca bee bene xi neca tucu bene enu la lu'cu dula equie nú rri'i bene tucu nú niarqui'nu, nu lacane equie nú nzelitsia arqui'lla li'inu. 25Tucu nú unga lu una'a huexe enu lee Rahab uri'i Diose nú necanchu xi neca tucu bene enu la lu'cu dula, xne uri'inchu tucu nú niarqui'nu chenu udete'nchu ni'nchu ucachi'lu chiucu bene Israel enu uyatsi'ña lachinchu, nu uri'inchu elietsa lubeella nú ubenchila' beella stucu inziu rene. 26Xne xi neca tucu bene enu la lu'cu espíritu la nehuañilla, le'ca scua necane tunu nzelitsia arqui' bene Diose, nu la ri'illa tucu nú niarqui'nu lecaxi zibi' nú rni bene nú nzeli arqui'lla li'inu che.

will be added

X\