Hebreos 3

1Enze'e bee sa'a li'ihua bee enu necala bee bene' Diose li'ihua bee enu ucañilanu, para nú acahua bee lli'ñinu, la zañi'hua nú Jesucristo neca ule'ya enu máse neca equie enu nzeli arquia'ahua, li'inu enu uxe'la Diose lu iliulabe. 2Xne Jesucristo neli uzucu' Stichia' Diose nu li'inu enu ucañi Diose para nú zibi'nu lu Diose, tucu nú uzucu' Moisés Stichia' Diose nu uzibi' Moisés lubee bene Israel. 3Pero máse riala zucu' aya bene Jesucristo luquela Moisés, xi neca lu cuenda' tucu bene enu rreche' ni'i nú máse sucu' aya bee bene li'illa luquela ni'i. 4Ye bee ni'i nu' tucu bene enu ureche'e, pero Diose ureche' yebee nú nu' lu iliulabe. 5Nu uzucu' Moisés Stichia' Diose, nu uzibi'lla lu Diose chenu udete'lla stichia Diose lubee bene Israel para nú ixiule'ella lubee bene Israel lunú xi aca. 6Pero Jesucristo neca lli'ñi Diose nu rnibiya'nu lu yebee bene' Diose. Nu lia'ahua neca'ahua bene' Diose, tunu la tsana' arquia'ahua nú nzeli arquia'ahua li'inu, nu ñia tsu arquia'ahua hasta bichia nú riña zeca Jesucristo stucu bese. 7Enze'e tucu nú rni Espíritu Santo: Tunu yene'hua Stichia' Diose bichia quie'. 8La ri'i nzitihua arqui'hua tucu nú uri'i bee bene'ahua enu udetela chenu lá zucu' beella Stichia' Diose, nu udete' beella preu li'inu, chenu udete beella lu yuu achi. 9Ze'e lá zucu' bee bene'hua enu udetela Stichia' Diose, añinzuca nú ulañi' beella bee milagro nú uri'inu lubeella, diqui chiu'a lana lu yuu achi. 10Enze'e ulee Diose lubee bene ze'e, nu uninu: “Yelu elliebacu' rri'i beella, nu ni' la la'na beella nú ri'i beella beya' nú xi niarquia nú ri'i beella.” 11Scua uri'i beella nú ule Diose nu che uninu tucutsia bese, nú ni' tucu beella la riña beella lu yuu elu ucuaqui u'na Diose lubeella nú tsulachi beella. 12Enze'e, bee sa'a enu nzeli arquia'ahua Jesucristo ubi'yahua li'ihua para nú la chu'u elliebacu' nú necha neca arqui' tá tucuhua nu che ri'i nucua' nú la chilia' arqui'hua Diose. Nu che tsana' arqui'hua Diose li'inu enu nehuañi. 13Mejora cada bichia udu'hua ana arqui' sa'hua, diqui nú nu' tiempo nihua lu sa'hua xne canu enta bichia nú ri'i dula ana luhua, nu che la zucua'hua Stichia' Diose. 14Xne tunu neca'la'ahua bee bene' Jesucristo, diqui tiempu rqui'ña nú tsuta' arquia'ahua lunú nzeli arquia'ahua li'inu tucu nú uchili arquia'ahua li'inu chenu uchili inza arquia'ahua li'inu. 15Tucu nú unila lu ichi' Stichia' Diose nú rni: Tunu riene'hua Stichia' Diose bichia quie', la ri'i nzitihua arqui'hua tucu nú unga nziti bee bene enu lá zucu' stichia'nu hua'tu. 16Neequie, ¿ta bee bene enu lá zucu' Stichia' Diose añinzuca nú ubene' beella nú uninu? ¿Xie' lanú bee bene Israel enu ulua Moisés Egipto beella la? 17¿Nu xie' lanu le'ca li'ibeella neca enu ule Diose lu diqui' chiu'a lana, nu li'ibeella enu uri'i dula nu unguti beella lu yuu achi la? 18¿Xie' lanú le'ca li'ibeella enu uni Diose nú leca xunga riñabeella lu yuu elu ucuaqui un'na Diose nú tsulachi beella xne né zucu' beella stichia'nu la? 19Scua rria'ahua beya' nú né riñabeella lu yuu elu ucuaqui u'na Diose nú tsulachi beella xne lá chili arqui'beella nú uni Diose lubeella.

will be added

X\