Hebreos 2

1Enze'e, rqui'ña nú ri'i caso'ahua nu zucua'ahua Stichia' Diose nú ubene'la'ahua para nú la tsana' arquia'ahua stichia'nu nú nzenala'la'ahua. 2Xne scua tucu nú uyalu ye Stichia' Diose nú uni bee ángele tiembu hua'tu enze'e bee bene enu la zucu' stichia'nu bee enu rlu'cu dula, yala bee nze'e castiya nú riala zeca bee nze'e. 3Nu, ¿xneca tsila'ahua lu castiya cua', tunu le'ca nua'ahua la zucu'ahua Stichia' Diose, nú rixiule'e nú xneca tsila'ahua? Nu le'ca li'i Jesucristo udixiule'e equie nú xneca tsila'ahua hasta hua'tu nu bee bene enu ubene' bee bedichia' cua', li'ibeella udixiule'e beellae lua'ahua. 4Nu scua tucu nú unguti'la' cada tucu bene Espíritu Santo tucu nú niarqui' Diose nu equie cuenda' seña, nu bee milagro nu cuna ye beenú nzenu arqui' bee bene scua ulube' Diose nú neli bee bedichia' cua'. 5Diose la dete' elurnibiya' lubee ángele para nú nibiya' beenu elu lu'cua'ahua stucu elu nehuañi nú necuqui neca nú rniru luhua. 6Xne tucu luhuare Stichia' Diose nu' tucu enu uni: Diose, ¿ti neca bene iliulabe para nú ellu'cu' arqui'lu li'illa? ¿Nu ti neca lli'ñi bene iliulabe nú nzenu arqui'lu? ¿equie cuenda'lla? 7Tucu tiembu nú uri'ilu nú menula unga neca equienu luquela bee ángele, pero cheelá uri'ilu nú neca equienu, nu udete'lu elurnibiya' lunu para nú nibiya'nu lu ye beenú ureche'lu; 8nu uzelalu nú nibiya'nu lu yeene. Chenu udete'lu elurnibiya' lunu para nú nibiya'nu lu yeene, lecaxi nú la nibiya'nu lu, añinzuca nú lá lañia'ahua nú ye nú rnibiya'nu lu. 9Pero nediya'ahua nú uyu'u tucu tiembu nú Jesucristo unganu menola luquela bee ángele. Pero nee li'inu rlu'culanu elurnibiya', nu rlu'cu bee bene ula'na lunu equie nú nehuana ulle'canu chenu ungutinu equie stula yebee bene, nu ungae scua xne seca Diose lia'ahua. 10Diose ureche' ye beenú nu' nu li'inu rnibiya'nu lu yeene nu li'inu niarqui'nu nú huaxi bee bene chu'u liñibe. Enze'e equie nú nehuana ulle'ca Jesucristo utsa'alunu Stichia' Diose, nu equie cuenda' li'itsianu nu' modo tsila'ahua. 11Bee bene enu la lu'cu dula ante Diose, equie cuenda' Jesucristo leca' xi ná beella. Nu sia Jesucristo nu bee bene enu la lu'cua' dula equie cuenda'nu, nu tucutsia Diose neca pa' beella. Enze'e la tu' Jesucristo nú rninu nú neca'ahua bichinu. 12Tucu nú nequie tucu luguare lu ichi' Stichia' Diose elu rni: Li'á ixiule'a lubee bichiaa equie cuenda'lu, nu chenu yiete'sa' beella che ula beella canto lulu nú rni nú neca equielu. 13Le'ca uninu: Nzuta' arquia nú Diose ri'i elietsa lua. Ca'a nzunua bee bene enu uliqui' Diose lua. 14Lunú necache' bee bene rene nu be'la, le'ca scua unga Jesucristo chenu ube'tanu lu iliulabe ungutinu, nu equie cuenda' nú ungutinu uri'inu ana lu elurnibiya' nú rlu'cu beze'lu lu eluti. 15Scua uri'inu para nú tsila'anu bee bene lunú xiqui bee bene eluti, bee bene enu diqui tiembu nehuañi nu xiqui eluti tucu nú xiqui bene patron'lla. 16Xne lá ye'ta Jesucristo lu iliulabe para nú ri'inu elietsa lubee ángele sino que ube'tanu lu iliulabe para nú ri'inu elietsa lubee bene enu nzeli arqui' tucu nú uyalí arqui' Abraham Diose. 17Enze'e unganu tucu nú neca bene lu iliulabe para nú unganu ule'ya enu máse neca equie lu Diose, ule'ya enu neli rua'a arqui' bee bene nu sucu'nu Stichia' Diose nu scua udixiunu stula bee bene. 18Nu lunú le'ca nehuana ulle'canu, nu ula'na beze'lu nú xa modo la zucu'nu Stichia' Diose, pero lá ri'i ana lunu, enze'e recanu rri'inu elietsa lubee bene enu rla'na beze'lu nú xa modo ri'i dula.

will be added

X\