Hebreos 13

1La tsana'hua nú secahua bee sa'hua enu nzeli arqui' Jesucristo. 2La zañi'hua nú ri'i nze'cahua lubee bene enu rriña ni'hua, xne scua nu' bee bene enu uriña bee ángele' Diose ni'i sin nú ari'i beella beya' nú neca bee bene ze'e ángele' Diose. 3Ullu'cu arqui'hua bee bene enu nchiñi ni'cu', nu utsi'hua xi neca nú le'ca nuuhua netsehua ni'cu' cuna li'ibeella. Uri'ihua elliebacu' equie cuenda' bee bene enu nehuana seca, nu le'ca utsi'hua xi neca nú le'ca nuuhua nehuana secahua. 4Li'ihua enu nechia la tsi'hua nú neca nucua' xi neca güita, la zequienuhua una'hua urre niyu'hua xne Diose dete' castiya lubee bene enu rlu'cu stucu una'a urre stucu niyu cuna luyee bee bene enu rri'i eluhuexe. 5Latsu arqui'hua lu dimi, ñia utsu arqui'hua cuna lunú rlu'cuhua xne unila Diose: “Ye bichia nzua cuna li'ilu, nu leca bichia nu tsana arquia li'ilu.” 6Enze'e diquinu' arquia'ahua nia'ahua: Diose Pa neca enu rri'i elietsa lua, la lliquia lu xitse nú ri'inu bee bene li'á. 7Ullu'cu arqui'hua bee bene enu unibiya' luhua, li'ibeella enu uzete' li'ihua Stichia' Diose. Ullu'cu' arqui'hua xneca uhuañi beella, nú diquinu' arqui'beella uchili arqui' beella Diose tucu nú uyali arqui'hua Jesucristo. 8Jesucristo leca xunga che'e nú ti necanu tucu nú necanu neca' necanu nee nu le'ca necanu diqui tiembu. 9La zelahua núti zequienu li'ihua luye beenú sete' bee bene enu la zete' stichia' Jesucristo tucu nú necane. Mejora uzelahua nú ri'i Diose elietsa luhua para nú huañihua tucu nú necane luhuare nú chenalahua bee costumbre nú xi nu' modo nú acu bee bene nu xi leca modo nú acu bee bene, xne bee nucua' lecaxi rri'i elietsa lubee bene ante Diose. 10Lia'ahua rlu'cua'ahua tucu enu unguti equie cuenda'ahua, li'inu necanu xi neca u'na nú rdete' bene equie cuenda' stula bene tucu u'na nú leca modo acu bee ule'ya enu nzenalasca' ley. 11Sino que ule'ya enu máse neca equie lubeelá bee ule'ya li'illa ruya'lla rene' bee nañi rdetella u'na liñi indu luhuare elu máse necachi para nú lecaxi naa bee bene equie cuenda' stula bee bene. Chequie bee nañi enu unguti ze'e riqui beeí ru'u eyeche elu la nucua'a bee bene. 12Le'ca scua ulle'ca Jesucristo, ru'u eyeche Jerusalén, unguuti bee bene li'inu para nú lecaxi naa bee bene equie cuenda' rene'nu. 13Enze'e rqui'ña nú chenala'ahua Jesucristo mase nú ulua bee bene li'inu ru'u eyeche Jerusalén, nu mase huaxi nú nehuana se'ca'ahua tucu nú ulle'canu. 14Xne lu iliulabe quie' la necane elu nehuañilia'ahua, sino que lia'ahua nellua'a quie'ahua tucu luhuare elu huañilia'ahua. 15Enze'e cuna elietsa' Jesucristo la tsana' arquia'ahua nú nia'ahua bedichia' nze'ca lu Diose xne nuacua' neca xi neca u'na nú rdete'ahua lunu, nu scua xucu' rua'ahua nú li'inu necanu Diose'ahua. 16La zañi'hua nú ri'i nze'cahua lubee sa'hua nu ri'ihua elietsa lubeella lunú rlu'cuhua, xne nucua' neca xi neca u'na nú riu' arqui' Diose nú ri'i bene. 17Uzu'cu'hua nú rni bee bene enu rnibiya' luhua, nu sete' Stichia' Diose li'ihua ulu'cuhua ula'na lubeella xne li'ibeella ri'ya beella li'ihua nú la tsana' arqui'hua Stichia' Diose, xne li'ibeella dete'beella cuenda lu Diose nú xa uri'i beella luhua. Uri'ihua lunú ri'i nú ñia nzu arqui'beella, nu la ri'ihua lunú la yu' arqui' beella, xne lecaxi zibi' nú la zucu'hua nú rnibeella. 18Una'cuhua lu Diose equie cuenda'ru. Li'iru nediya'ru nú lecaxi nú necha neca rri'iru, nu niarqui'ru nú ye nú rri'iru, ri'irune tucu nú necane. 19Nacua nu zequiea luhua nú nacu'hua lu Diose para nú la lea' liqui'nu nú nzelabi'ya li'ihua stucu bese. 20Diose enu rliqui' nú nzuxe arquia'ahua li'inu enu uri'i nú uhuañi Jesucristo lu eluti, Jesucristo enu rri'i ucu lia'ahua tucu nú rriucu tucu bene bee sanchi nu equie cuenda' nú ungutinu rlu'cula'ahua tucu inziu para nú riña'ahua lu Diose nu ze'e la atia'ahua. 21Li'inu ri'inu elietsa luhua lu yebeenú neca nze'ca para nú acahua ri'ihua tucu nú niarqui'nu. Li'inu ri'inu elietsa lua'ahua para nú aca'ahua tucu nú niarqui'nu equie nú neca tucu necatsela'ahua cuna Jesucristo, nu ¡Lu Jesucristo riala nú lu'cu bee bene ula'na diqui tiembu! Amén. 22Bee sa'a enu nzeli arquia'ahua Jesucristo la aca llene carta quie', pero nacua luhua nú la leehua equie cuenda' nú unia bezete' luhua lu carta quie'. 23Nu le'ca ixiule'a luhua nú uchiu'ula sa'ahua Timoteo ni'cu', nu tunu chu riñalla ca'a che nzelabi'yaru li'ihua. 24Uri'ihua saludar ye bee bene enu rnibiya' luhua li'ibeella enu sete' li'ihua Stichia' Diose cuna ye beelá bee sa'ahua enu nzeli arquia'ahua Jesucristo. Nu le'ca xe'la bee bene Italia saludo luhua. 25Diose ri'i nú chanze'cae lu cuenda' yehua. Amén.

will be added

X\