Hebreos 12

1Enze'e lunú ubene'la'ahua equie cuenda' huaxi bee bene lunú xneca uchili arqui'beella Diose, rqui'ña nú tsana' arquia'ahua ye stula'ahua cuna ye beelá beenú rca nú ria'ahua tucu nú necane, nu la llaca'ahua nú chenala'ahua inziu nú ulube'la Diose lua'ahua. 2La yala nú zañia'ahua Jesucristo xne li'inu rri'inu elietsa lua'ahua lunú nzeli arquia'ahua, nu equie cuenda' li'inu nze'ta nú nzeli arquia'ahua tucu nú necane. Li'inu uriqui'nu lunú nehuana ulle'canu lu cruse nu lá tu'nu nú ungutinu scua xne nediya'nu nú chenu dete nú nehuana zecanu che nze'ta nú ñia tsu arqui'nu, nu nee nzuculanu cue'tse Diose chube liñibe. 3Enze'e uri'ihua elliebacu' xneca nehuana uri'inu bee bene enu rlu'cu dula Jesucristo para nú la llaca'hua, nu uriqui'hua luye nú secahua. 4Xne mase nú nehuana rri'inu bee bene li'ihua, nu rcua'nahua modo nú la ri'ihua nú necha neca pero ni' tucuhua lá uti bee bene. 5¿Xie' uzañi'la'hua xa uni Diose bezete luhua li'ihua enu neca xi neca lli'ñinu la? Lu ichi' stichia'nu rni: Endua uri'i caso chenu rni Diose bezete' lulu nu uriqui' chenu rri'inu nú rri'ilu beya' nú necha neca nú rri'ilu. 6Xne li'inu rninu bezete' luye bee bene enu neca bee lli'ñinu, nu rdete'nu castiya bee bene enu secanu. 7Enze'e uriqui'hua chenu rni Diose bezete' luhua xne neca nze'ca nucua' para li'ihua. Ri'inu luhua xi rri'i tucu uzana lu lli'ñilla. ¿Xne xie' nu' bee uzana enu la ni bezete' lubee lli'ñila? 8Pero nee tunu la ni Diose bezete' luhua tucu nú rri'inu luye beela bee lli'ñinu, che lacahua mero lli'ñinu nu lacanu pa'hua che. 9Li'ihua nediya'hua nú lu iliulabequie' chenu unga'ahua endu', uni bee uzana'ahua bezete' lua'ahua para nú zucua'ahua nú uni beella. 10Bee uzana'ahua lu iliulabe quie' rni bezete' lua'ahua lle'na tiembu nú nehuañia'ahua para nú ria'ahua nú neca nze'ca. Pero Diose rninu bezete' nú máse neca nze'ca lua'ahua para nú huañia'ahua nú lecaxi na'ahua ante lunu tucu nú lecaxi nanu. 11Neli nú ni'tucua'ahua la yu' arquia'ahua nú zeca'ahua castiya hora nú se'ca'ahua scua sino que rcuee, pero bee enu rri'i ana nú sucu' nucua' che nehuañi nze'ca nze'e lu Diose nu ñia nzu arqui' nze'e. 12Enze'e udu'hua ana arqui'hua nu ude'te'hua baluro tucu nú riu'u zeca juerza' tucu bene chenu chiqui' nellacalla. 13Ucua'nahua nú huañi nze'cahua tucu nú riala nú huañi bene. Para nú bee bene enu nzu chiucu arqui' lubee nú rri'i la tsana' arqui'beei inziu' Diose sino que du' beei ana arqui'beei chenala beei inziu'nu. 14Ucua'nahua nú huañihua sin xuu cuna ye bee bene nu la ri'ihua dula xne bee bene enu rri'i dula leca modo lañi' bee nze'e Pa'ahua Diose. 15Ubi'yahua li'ihua para nú leca ta tucuhua enu huachu elietsa nú niarqui' Diose ri'i luhua para nú leca ta tucuhua enu neca xi neca tucu huañi nú nelá nú rri'i daño nú rri'i nú rnitilu beelá bee sa'ahua. 16Ni'tucuhua la yala nú ri'ihua eluhuexe nu la luachuhua beenú neca nze'ca nú nze'ta lu cuenda' Diose para nú la zecahua xi ulle'ca Esaú, equie cuenda' tucutsia pliatu entsa' ungüitilla elurnibiya' nú rialalla xi neca endu' rlu nú necalla. 17Nu li'ihua nediya'hua nú chenu uniarqui' Esaú nú ri'ile'ya pa'lla li'illa, chequie leca' modo nú ari'ile'ya pa'lla li'illa xi neca endu' rlu nú necalla, mase nú chiqui' unguna'lla pero leca modo nú ache'e lunú uri'illa. 18Li'ihua lá riñahua dañi elu leca modo na'tsehua, tucu nú uyabica bee bene Israel tiembu ze'e e'ya dañi nú lee Sinaí elu ulañi' beella nú riqui dañi ze'e, nu ulañi' beella tucu llene nú natsacabe utsacu' equie dañi ze'e nu reca tucu biduna nú fuerte equie dañi ze'e. 19Chequie ubene' beella tucu chii trompeta, nu ubene' beella chii Diose nú rnilubeella. Pero lunú chiqui' xiqui beella nú riene' beella chii Diose, che chiqui' uzequie beella nú la nia'nu lubeella. 20Xne li'ibeella nediya' beella nú chiqui' juerte nú unibiya' Diose lubeella chenu uninu: “Titse bee bene urre bee nañi enu riña nu di' tetsu' dañi quie' rqui'ña nú ati nze'e cuna quiee urre cuna lanza.” 21Chiqui' nelliqui rna nú ulañi' beella enze'e hasta Moisés unii: “Recatse'tsea xne chiqui' xiquia.” 22Pero li'ihua lá alle'cahua scua sinoque uyabicalahua lu Diose. Nu nu'la modo nú xa rñiahua dañi Sión, nú neca Jerusalén liñibe lachi Diose enu nehuañi, elu nucua'a huaxi bee ángele. 23Ñia nzu arqui'beenu rni beenu bedichia' nze'ca lu Diose elu yetesa' bee bene' Diose bee enu nequiela nombre' lu libro nú nchiucu' liñibe. Ze'e nzucu Diose nu li'inu enu hualue lu cuenda' ye bee bene, le'ca ze'e nzu espíritu' bee bene enu uhuañi tucu nú necane, li'ibeella enu leca xina lu Diose. 24Le'ca ze'e nzucu Jesucristo, li'inu enu uxa'la tucu inziu cuqui para nú riña'ahua lu Diose. Chenu unguti Abel unacu' quiya rene'lla nu aca elu usticia, pero cuna rene' Jesucristo la acae scua sino que li'inu uti'chianu rene'nu chenu ungutinu para nú lu'cua'ahua perdona equie stula'ahua. 25Enze'e ubi'yahua li'ihua nu la luachuhua Diose enu rni lua'ahua. Xne bee bene enu né ri'i caso nú uni Moises enu udete' Stichia' Diose lubee bene enu udetela lá tsila'a beella lu castiya nu riala beella xne né zucu' beella nú uni Moisés. Enze'e enzalaquie' lia'ahua nu la yala'ahua castiya tunu la ria'ahua caso stichia' Jesucristo, li'inu enu ube'ta enza liñibe para nú ninu lua'ahua. 26Chenu uni Diose lubee bene'ahua enu udetela equie dañi Sinaí, ucuñi luyuu ze'e. Pero nee unizeca'lanu: “Enta bichia nú cuñi zeca luyuu, nu la necane nú luyuu quietsia sino que nuu liñibe.” 27Chenu uni Diose nú ri'inu scua stucu bese, nucua' rni nú nitilu Diose yebee nú rcuñi ureche'nu lu iliulabe quie' nu ria'na beenú leca' modo cuñi. 28Ze'e neca elu liqui' Diose lua'ahua elu rnibiya'nu nú leca xunga nitilu, enze'e rqui'ña nú dete'ahua che'tsa lu Diose. Nu lu'cua'ahua ula'na lunu diquinu' arquia'ahua tucu nú riu' arqui'nu, nu la yala nú zañia'ahua nú li'itsianu neca equienu. 29Xne Diose neca xi neca tucu quii llene nú siqui' yeene.

will be added

X\