Hebreos 11

1Nu nee lunú nzeli arqui' bene Diose, necane nú nediya' nze'ca'ahua nú neli aca tucu nú nellua'aquie'ahua nú aca, nu neli nzeli arquia'ahua lunú aca, mase nú la lañia'ahuane. 2Bee bene'ahua enu udetela uya'na nze'ca beella lu Diose equie nú uchili arqui'beella li'inu. 3Equie nú nzeli arquia'ahua Diose rria'ahua beya' nú cuna stichianu ureche'nu iliulabe cuna liñibe cuna ye nú nu' lue, nu lecaxi uqui'ñianu nú ureche'nue. 4Nu Abel lunú diquinu' arqui'lla uchili arqui'lla Diose enze'e máse neca nze'ca u'na nú udete'lla lu Diose, luquela nú udete' Caín, enze'e uya'na nze'calla lu Diose xne uyucunu u'na nú udete'lla nu máse nú ungutila Abel pero riene'sca'ahua nú xa uchili arqui'lla Diose. 5Equie nú uchili arqui' Enoc Diose enze'e nzia nehuañilla liñibe nu lá atilla, nu lá llela' bee bene li'illa xne unguya'la Diose li'illa liñibe. Nu lu ichi' Stichia' Diose rni: “Nú ante nú uya' Diose Enoc uyu' arqui'nu xneca uhuañilla.” 6Lecati huañi tucu nú riu' arqui' Diose tunu la chili arqui'lla li'inu. Titse bene enu niarqui' chebica lu Diose, rqui'ña nú chili arqui'lla nú nu' Diose nu le'ca rqui'ña nú chili arqui'lla nú dete' Diose nú uninu nú dete'nu lubee bene enu rla'na li'inu. 7Equie nú uchili arqui' Noe Diose enze'e chenu uni Diose lulla nú aca lunú lasca lañi'lla aca, che uzucu'lla nú uninu, nu ureche'lla tucu barco nú tsila'alla cuna bee bene'lla equie cuenda' nú uni Diose lulla nú nze'ta aca. Nu lunú uchili arqui' Noe Diose unga achee nú zeca bee bene enu lá chili arqui' Diose castiya. 8Le'ca scua lunú uchili arqui' Abraham Diose, enze'e uzucu'lla nú uni Diose chenu uninu lulla nú uchiu'ulla lachilla nu challa lu yuu elu uni Diose nú dete'nu lulla, nu uchiu'ulla lachilla nzalla sin nú ri'illa beya' cae. 9Nu lunú uchili arqui'lla Diose, uzuculla lu iliu nú uni Diose nú dete'nu lulla xi neca tucu bene rene, nu uzuculla liñi carpa le'ca scua uhuañi Isaac cuna Jacob li'ibeella enu le'ca riala yucu yuu ze'e. 10Scua uhuañi Abraham xne nediya' nze'ca'lla nú nzialla huañilla eyeche nú ureche' Diose, eyeche nú leca xunga enta bichia nú nitilu. 11Le'ca scua Sara, lunú uchili arqui'lla añinzuca nú leca modo lu'culla endu', nu le'ca unguxulalla para nú lu'culla endu', pero udu' Diose fuerza'lla para nú acalla naa lu iliulabe nu ulu'culla tucu endu' lunú uchili arqui'lla nú Diose neli sa'alunu stichia'nu. 12Scua ungae añinzuca nú unguxula Abraham nu ulu'culla endu', nu ulu'culla huaxi bee familia'lla xi huaxi bee belaa liñibe, cuna xi huaxi bee eyuxi ru'u inzatu' nú leca modo bacu'. 13Ye bee benecua' uchili arqui'beella Diose hasta nú unguti beella nu añinzuca nú lá lañi' beella lunú ucuaqui u'na Diose lubeella pero lunú uchili arqui'beella enze'e nediya' beella nú aca tucu nú uni Diose lubeella nú aca, nu ñia nzu arqui'beella. Nu nediya' nze'ca' beella nú chiucu chuna tsia bichia nze'ta beella lu iliulabe quie' nu la ye'ta beella para nú huañili beella. 14Nu bee enu rni scua. Scua achee nze'ca rlube' nú rcua'na beella nú camero aca lachi beella. 15Xne tunu rri'isca' beella elliebacu' lachi beella elu uchiu'u beella che nu' modo nú abenchila' zeca beella eyeche ze'e. 16Pero máse rri'ibeella elliebacu' tucu luhuare elu máse neca nze'ca nú neca liñibe. Enze'e la tu' Diose nú necanu Diose' beella, nu utsuche'lanu elu cua'a beella liñibe. 17Equie nú uchili arqui' Abraham Diose enze'e chenu udete' Diose preu Abraham nú nze utilla endu'lla Isaac xi neca u'na lu Diose, uzela Abraham añinzuca nú tuculi' Isaac neca endu'lla, nu añinzuca nú nediya'lla nú uni Diose lulla: 18“Equie cuenda' endu'lu Isaac dala huaxi bee familia'lu.” 19Pero nediya' Abraham nú rlu'cu Diose poder para nú ri'inu nú huañi zeca bee benenguti chenu udete Abraham preu scua neca xi neca nú unguti endu'lla nu uhuañi zeca endu'lla lu eluti. 20Le'ca esquie lunú uchili arqui' Isaac Diose, unilla nú cha nze'cae lu cuenda' endu'lla Jacob nu Esau, nu unilla nú xi enta zeca cada tucu beella. 21Le'ca scua lunú uchili arqui' Jacob Diose, le'ca unilla nú cha nze'ca lu cuenda' rucu bee endu' José, chenu yamerotsia atilla. Che uricu'lla yalla equie xcalla nu unacu'lla lu Diose. 22Le'ca scua, lunú uchili arqui' José Diose, chenu yamero atilla, che unilla nú chiu'u bee bene Israel Egipto, nu unilla lubee bene ze'e nú xneca ri'inubeella bee arta'lla. 23Equie nú uchili arqui' pa' Moisés cuna na'lla Diose, chenu ungulalla che ucachi' beella li'illa diqui chuna guu equie nú ñia rnalla, nu lá lliqui beella chenu uni arre nú ati ye bee endu' me' enu neca endu' niyu. 24Nu chenu uru'cu Moisés, equie nú uchili arqui'lla Diose, lá niarqui'lla nú acalla endu' xinchiu'cu arre Egipto. 25Para Moisés, máse neca nze'ca nú nehuana zecalla cuna bee bene sa'lla enu neca bee bene Israel, luhuare nú ri'illa dula nú tsana' arqui'lla bee sa'lla para nú lu'culla lunú niarqui'lla nu ri'illa bee nú la zibi'. 26Para li'illa máse neca nze'ca nú nehuana ulle'calla tucu nú ulle'ca Jesucristo, luhuare nú lu'culla ye bee eluxene nú nu' Egipto xne máse nzu arqui'lla lu eluxene nú ati'lla lu Diose. 27Le'ca esquie lunú uchili arqui' Moisés Diose, uchiu'ulla eyeche Egipto nu lá lliquilla mase ulee arre Egipto lulla. Nu utsuta' arqui'lla lu Diose xi neca nú rlañi'lla Diose, li'inu enu la lañi' bee bene. 28Equie nú uchili arqui' Moisés Diose, uri'illa eliñi baxcu, nu unibiya'lla nú ucuatsa bee bene Israel rene' bee sanchi ru'u bee ni'i beella para nú chenu dete ángele enu ruuti la úti nze'e bee endu' rlu' bee bene Israel. 29Le'ca esquie lunú uchili arqui' bee bene Israel Diose. Enze'e uya'la labe inzatu' nú lee nelu udete beella xi neca tucu yuu bichi. Pero chenu nzedete bee bene Egipto luhuare ze'e, hora ze'e udete zeca inzatu' luhuare ze'e nu unguti beei lue. 30Le'ca esquie lunú uchili arqui' bee bene Israel Diose che chenu uza' achi bichia nú rdu' beella vuelta diqui abenchila' eyeche Jericó, che uluquie muro nú necache' abenchila' eyeche ze'e. 31Le'ca esquie lunú uchili arqui' una'a huexe enu lee Rahab Diose, utsila'anchu chenu unguti bee bene lachinchu, bee enu né zucu' Stichia' Diose xne li'inchu uyucu nze'canchu bee bene Israel enu uya tsi'ña eyeche ze'e. 32Nu huaxi nú niláa luhua, pero leca' tiempo nú ixiule'a luhua equie cuenda' beelá bee bene xi neca lu cuenda' Gedeón, Barac, Sansón, Jefté, David, Samuel nu bee profeta. 33Ye beella uchili arqui'beella Diose nu uri'ibeella ana lu huaxi nación, nu uri'i beella elu usticia tucu nú necane, nu ulañi' beella nú uyalu tucu nú uni Diose lubeella nú aca, nu utsacu' beella ru'u bee bichiee. 34Le'ca nu' beella enu utsi'qui bee bene lu quii nu lecaxi ulle'ca, nu nu' beella enu utsila'a lubee bene enu niarqui' úti li'ibeella cuna espada, nu uyu'u juerza' beella nu utsu naaqui arqui'beella, añinzuca nú nechula' nzu arqui'beella, nu uyu'u juerza' beella chenu uri'ibeella xuu. Nu utiliaca' beella bee bene rene enu uliunu li'ibeella. 35Nu le'ca nu' bee una'a enu unguti bee familia', nu equie nú uchili arqui'beella Diose, che uhuañi zeca bee familia' beella stucu bese. Pero le'ca nu' bee bene enu mase unguti, pero para li'ibeella máse neca nze'ca nú nehuana zeca beella nu mase nú unguuti bee bene li'ibeella, lá zela beella nú tsana' arqui' beella Diose, para nú lu'cu beella stucu elunehuañi nú necuqui nú máse seca. 36Le'ca nu' beella enu nehuana ulle'ca, utsequichia' bee bene li'ibeella, nu udiñi bee bene li'ibeella, nu ullica'cu bee bene li'ibeella cuna cadena, nu udu' bee bene li'ibeella ni'cu'. 37Le'ca nu' beella enu unguuti bee bene cuna quiee, le'ca nu'beella enu uchiecu' bee bene arli'tilluu cuna sierra, nu nu' beella enu unguti bee bene cuna espada, le'ca nu' beella enu uyanze enzichiu' enzerquie, nu nehuana ulle'ca beella, nu ulle'ca beella elitsi, nu ungututsia beella iti' sanchi cuna iti' chipa nu nehuana uri'inu bee bene li'ibeella. 38Uyanzee beella enza lu dañi achi, nu enza dañi nu uya'na beella liñi ye clasia' bee yube'. Bee bene ze'e lá yala nú ahuañi beella lu iliulabe quie' xne neca beella bee bene nze'ca. 39Mase nú yebeella achee nú neli uchili arqui'beella Diose, pero né yucubeella lunú ucuaqui u'na Diose lubeella. 40Xne Diose uri'inu elliebacu' tucu nú máse neca nze'ca lua'ahua, nu lá acae luego tucu nú uninu lubeella xne niarqui'nu nú junto atia'ahua cuna li'ibeella lunú ucuaqui u'nanu lua'ahua.

will be added

X\