Gálatas 6

1Bee sa'a enu nzeli arquia'ahua Jesucristo, nia luhua nú tunu tucu bee sa'ahua rri'i dula ana lu, li'ihua enu másela nzuta' arqui' lu Stichia' Diose rqui'ña nú nihua lulla pero ni' nze'cahua lulla. Nu uri'ihua beya' nú le'ca nu' modo nú ri'i dula ana luhua. 2Uri'ihua elietsa lubee sa'hua lu xitse beenú nehuana seca beella che scua sucu'hua lunú rnibiya' Jesucristo nú ri'ihua. 3Tunu nu' enu seca nú reca ye nú reca nu lecaxi reca, che le'catsia li'illa sequienulla li'illa. 4Cada tucuhua ri'ihua beya' tunu neli nú nehuañihua tucu nú niarqui' Diose nú huañihua. Nu tunu nehuañi nze'cahua li'itsiahua llila'hua luhuare nú ri'ihua elliebacu' nú nehuañi nze'calahua luquela beelá bee bene. 5Xne cada tucua'ahua rqui'ña nú bi'ya'ahua lunú xneca nehuañia'ahua. 6Titse bene enu sete' Stichia' Diose rqui'ña nú ri'illa elietsa lu bene enu sete' li'illa lu xitse nú rqui'ñalla. 7La zequienuhua le'catsia li'ihua, xne leca modo nú itanu bene Diose xne ye beenú rdu' ni bene enze'e ri'i bene ula'cu. 8Tunu nehuañitsia bene lunú necha neca rri'i bene elliebacu'. Riña bichia nú zecalla castiya, pero bene enu nehuañi tucu nú rnibiya' Espíritu Santo, equie cuenda' Espíritu Santo lu'culla elu nehuañi nú leca xunga laxu ante Diose. 9La llaca'ahua ria'ahua nú neca nze'ca. Xne tunu la llaca'ahua, che riña bichia nú atia'ahua nú riala atia'ahua. 10Enze'e chenu nu' modo nú ria'ahua elietsa lubee bene rqui'ña nú ria'ahuane, nu máse rqui'ña nú ria'ahua elietsa lubee sa'ahua enu nzeli arqui' Jesucristo. 11Bi'yacuruhua xi llene bee letraquie' rquie'á luhua nu li'i e'cua rquie'ene. 12Bee bene enu rri'i juerza li'ihua nú quie seña nú rquie bee bene Israel li'ihua rri'i beei scua para nú ya'na nze'ca beei ante bee bene nu la niarqui'beei nú nehuana zeca beei equie nú nzeli arqui'beei Jesucristo. 13Pero ni' bee bene enu nequie seña cua' la ri'ibeei tucu nú rni ley. Niarqui'tsiabeei nú quie señacua' li'ihua para nú aca nelliñabeei nú uri'ilabeei ana luhua nú quie señacua' li'ihua. 14Pero li'á leca xi stucu nú aca nelliñaa, necatsiae equie cuenda' nú unguti Jesucristo. Nu equie cuenda' nú ungutinu lu cruse utsa'nalá ye nú nechá neca nu' lu iliulabe quie', nu para bee nucua' neca xi neca nú ungutilá. 15Xne chenu neca tucu necatsela bene cuna Jesucristo lecaxi zibi' tunu nequie seña bene urre la nequie seña bene. Lunú mase neca equie neca nú uche'ela nú xneca nehuañi bene. 16Nu bee bene enu nzenalala inziu' Jesucristo, Diose hua'a arqui' bee nze'e nu ri'inu nú nzuxe arqui' beella cuna yebeelá bee bene enu neli neca bee bene' Diose. 17Desde nee la nia' arquia nú zucu' llianaláhua arquia. Xne bee beya' nú nuyaa cuerpoa rlube' nú necaa apóstol' Jesucristo. 18Bee sa'a enu nzeli arquia'ahua Jesucristo, li'inu ri'inu nú cha nze'ca lu cuenda' yehua. Amén.

will be added

X\