Gálatas 3

1¡Bee bene Galacia! ¿Xiquie nú chiqui' netunduhua? ¿Ti uzequienuu arqui'hua? Xne chenu uzete'ru li'ihua, claro udixiule'eru luhua xiquie nú unguti Jesucristo lu cruse. 2Neequie tucutsia nú niarquia ri'á beya': ¿Xie' nzu Espíritu Santo cuna li'ihua xne rri'ihua tucu nú rnibiya' ley' Moisés la, urre necane nú uchili arqui'hua stichia' Jesucristo nú ubene'la'hua la? 3¿Xiquie nú nzitisca'hua, nu nzula Espíritu Santo cuna li'ihua nu nee secahua nú para nú yalu tucu nú niarqui' Diose nú ri'ihua rqui'ña nú ri'ihua tucu nú rni ley' Moisés? 4¿Xie' lecaxi uzibi' nú chiqui' nehuana ulle'cahua la, o xie' lia xle'e nehuana ulle'cahua la? 5Chenu xe'la Diose Espíritu Santo luhua nu rri'inu milagro luhua, ¿rri'inu scua equie nú sucu'hua nú rni ley' Moisés la? o ¿necane equie nú nzeli arqui'hua stichia' Jesucristo nú ubene'la'hua la? 6Ullu'cu arqui'hua nú equie nú uchili arqui' Abraham Diose enze'e udu' cuenda Diose li'illa xi neca tucu bene enu la lu'cu dula. 7Enze'e, uri'ihua beya' nú ye bee bene enu nzeli arqui' Diose, bee nze'e neca xi neca lli'ñi Abraham. 8Hasta hua'tu nediya'la' Diose nú leta bee bene enu laca bee bene Israel nu' bee bene enu lu'cu cuenda Diose xi neca enu la lu'cu dula xne nzeli arqui'lla Diose. Xne tucu luhuare lu ichi' Stichia' Diose rni nú uninu lu Abraham: “Li'á ri'á nú cha nze'cae lu cuenda' yebee bene iliulabe equie cuenda'lu.” 9Enze'e, rri'i Diose nú nza nze'cae lu cuenda' bee bene enu nzeli arqui' li'inu tucu nú uri'inu lu Abraham xne uyali arqui' Abraham li'inu. 10Ye bee bene enu sucu' nú rnibiya' ley' Moisés zeca bee nze'e castiya xne le'ca lu ichi' leycua' rni: “Bee bene enu la ri'i ye beenú rnibiya' leycua', zeca bee nze'e castiya.” 11Enze'e, ¿lecati enu la lu'cu dula ante Diose equie nú sucu'tsialla nú rnibiya' ley? Xne lu ichi' Stichia' Diose rni: “Bene enu ubacu'lanu nú la lu'cu dula xne nzeli arqui'lla li'inu lu'culla elunehuañi ante lunu.” 12Pero equie cuenda' ley, la nacu' ley nú chili arqui' bene ley sino que lu ichi' ley rni: “Bene enu sucu' nú rni ley nze'e si lu'cu elunehuañi.” 13Jesucristo neca enu utsila'a lia'ahua lu castiya' ley nu li'inu uyucunu castiya nú riala zeca'ahua, chenu uquienu lu cruse, xne lu ley rni: “Bene enu necha rri'i si'quinala bee bene li'illa lu aca ratilla.” 14Ulle'ca Jesucristo scua para nú nu' beya' ri'i Diose nú cha nze'ca lu cuenda' bee bene enu laca bee bene Israel, tucu nú uri'inu nú uya nze'ca lu cuenda' Abraham. Nu lunú nzeli arquia'ahua Jesucristo enze'e nzula Espíritu Santo cuna li'ihua tucu nú unila Diose hasta hua'tu. 15Nee nia luhua nú xa rri'i bee bene, chenu rreche' chiucu bene tucu ichi' nu rdu'lla firma'lla lu ichi' ze'e, che leca' ti nitilu nú nequie lu ichi' ze'e urre quie'ella huaxisca'lá lunú nequie lue. 16Le'ca scua uri'ihua beya' nú chenu uri'inu nú nza nze'ca lu cuenda' Abraham nu cuna lucuenda' bene enu nze'ta lu familia'lla, lu ichi' Stichia' Diose la ni nú ri'ile'yanu “bee bene enu nze'ta lu familia'lla”, nu la nine equie cuenda' huaxi bee bene sino que rnitsiae equie cuenda' “tucutsia bene”; xne li'inu rninu equie cuenda' bene enu nze'ta lu familia'lla. Nu bene ze'e enu nze'ta lu familia'lla neca Jesucristo. 17Nu lunú rnia luhua nú ley' Moisés uyu'u cuatrocientos treinta lana luquielá chenu ucuaqui u'na Diose nú dete'nu xi dete'nu lu Abraham. Enze'e leca modo nú nitilu ley cua' lunú ucuaqui u'na Diose lu Abraham hasta hua'tu. 18Xne tunu equie cuenda' ley atia'ahua lunú ucuaqui u'na Diose lu Abraham. La neca'e lunú ucuaqui u'na Diose che. Pero Diose lia udete' lu Abraham nú uninu lulla nú dete'nu lulla lunú ucuaqui u'nanu lulla hasta hua'tu. 19Tala bese nedicha'hua lua: ¿Xi sibi' ley che? Diose udu' ley para nú ri'i bee bene beya' nú la zucu' bene nú rninu nu uzibi' ley' Moisés hasta bichia nú uriña bene enu nze'ta lu familia' Abraham tucu nú ucuaqui u'na Diose lulla hasta hua'tu. Bee ángele' Diose udete' ley cua' lu Moisés, nu che Moisés udixiule'e lubee bene. 20Pero chenu ucuaqui u'na Diose lu Abraham nú xi dete'nu lulla lecati udixiule'e stichia'nu lulla sino que li'i e'cu Diose ubedichia'nu li'i Abraham. 21La ri'ihua elliebacu' nú rnia luhua nú rri'i cundra leycua' lunú ucuaqui u'na Diose. Sino que tunu equie cuenda' leycua' nu' modo lu'cu bene elunehuañi ante Diose che nediya'la' bene nú la lu'cu bene dula ante lunu equie nú nzenala bene ley. Pero lacane esquie. 22Xne lu ichi' Stichia' Diose rni nú yebee bene rnibiya' dula lu nu ungae scua para nú yebee bene enu nzeli arqui' Jesucristo yucu bee nze'e lunú ucuaqui u'nala Diose. 23Ante nú riña Jesucristo, unibiya' ley lua'ahua xi neca chenu nuche'nacu' tucu bene, nu nelluaquie'tsia'ahua chenu riña Jesucristo. 24Enze'e, ley cua' neca lua'ahua xi neca tucu bene enu rni lua'ahua nú xneca huañia'ahua nu hasta bichia nú uyulua'ahua Jesucristo che ulaxu nú unibiya' ley lua'ahua para nú lu'cu cuenda Diose lia'ahua xi neca tucu bene enu la lu'culi dula equie nú nzeli arqui'lla Jesucristo. 25Pero nee nú uchilila arquia'ahua Jesucristo la qui'ña nú ni ley lua'ahua nú xneca huañia'ahua. 26Xne ye'ahua bee enu nzelila arqui' Jesucristo neca'la'ahua lli'ñi Diose. 27Nu equie nú urinzala'ahua necatucu necatsela'ahua cuna Jesucristo xne nzulanu cuna lia'ahua. 28Nu lecaxiri'i tunu neca'ahua bee bene Israel urre laca'ahua bee bene Israel, tunu neca'ahua esclavo lubee bene, o laca'ahua esclavo, nu tunu neca bene niyu urre neca bene una'a xne para Jesucristo iguale neca'ahua xne neca tucu necatsela'ahua cuna li'inu. 29Enze'e, tunu neca'la'ahua bene' Jesucristo le'ca esquie neca'la'ahua xi neca lli'ñi Abraham, nu riala'ahua lunú ucuaqui u'nala Diose lu Abraham hasta hua'tu.

will be added

X\