Gálatas 2

1Chenu udete rta lana, che uya'a Jerusalén stucu bese uya'nua Bernabé cuna Tito. 2Xne Diose uni lua nú uya'a ze'e. Nu Jerusalén, ze'e uyetesa'ru stucu luhuare puro bee bene enu rnibiya' leta bee bene enu nzeli arqui' Jesucristo para nú bedichia'ru equie cuenda' stichia' Jesucristo nú setea bee bene enu laca bee bene Israel scua uri'á para nú laca xle'e uri'á yebeenú uri'á nu cuna nú rri'á. 3Pero ni' Tito enu nzu cuna li'á ze'e añinzuca nú necalla bene griego lá nibiya' bee bene' Diose nú aquie seña nú rquie bee bene Israel li'illa. 4Xne nu' bee bene Israel enu lia rri'i nu neca beei sa'ahua para nú scua aca chu'u beei leta'ahua nu tsi'ñia beei ta beenú la zucua'ahua, para nú scua nibiya' zeca beei lua'ahua nú zucua'ahua nú rnibiya' ley. 5Pero ni' teme' lá azelaru nú ari'ibeei ana luru, xne la niarqui'ru nú tsana' arqui'hua bedichia' nze'ca' Jesucristo nú neli neca nú nzenalalahua 6Nu bee bene enu rnibiya' leta bee bene' Jesucristo lá nia'beella lua xilá riala ri'á, añinzuca nú xi ri'á nú ti neca beella xne ante Diose iguale yebee bene. 7Luhuare nú anibeella lua nú xilá rqui'ña ri'á, luego chu uri'ibeella beya' nú ucañila Diose li'á para nú ixiule'a bedichia' nze'ca' Jesucristo lubee bene enu laca bee bene Israel, tucu nú ucañi Diose Pedro para nú ixiule'ella bedichia' nze'ca' Jesucristo lubee bene Israel. 8Nu le'ca Diose enu ucañi Pedro nú necalla apóstol lubee bene Israel le'ca li'inu ucañinu li'á para nú necaa apóstol lubee bene enu laca bee bene Israel. 9Enze'e, Jacobo, Pedro nu Juan li'ibeella enu máse rnibiya' leta bee bene enu nzeli arqui' Jesucristo luego uri'ibeella beya' nú Diose neca enu uliqui' elurnibiya'cua' lua. Nu che una'tse beella yaru xi neca tucu seña nú neca tucunecatselaru, nu uya'naru nú li'á nu Bernabé nzetixiule'eru stichia' Jesucristo lubee bene enu laca bee bene Israel. Nu li'ibeella ixiule'ebeella stichia' Jesucristo lubee bene Israel. 10Tucutsia nú unibeella luru nú la zañi'ru ri'iru elietsa lubee bene enu seca elitsi nu nucua' riu' arquia nú ri'á. 11Pero chenu uya Pedro eyeche Antioquía, che uqui'ya'lla uri'á xne la ri'illa tucu nú riala ri'illa, 12xne rluti udacunuuxulla bee bene enu laca bee bene Israel. Pero chenu uriña bee bene enu uxe'la Jacobo eyeche Antioquía che né quietea' Pedro bee bene enu laca bee bene Israel xne ulliquilla nú xi ni bee bene enu neli sucu' nú rni ley. 13Ye beelá bee bene Israel enu nzeli arqui' Jesucristo enu nucu'a ze'e le'ca uri'ibeella tucu nú uri'i Pedro, nu le'ca hasta Bernabé uri'i scua. 14Enze'e, chenu ulañia nú la ri'i beella tucu nú rni stichia' Jesucristo che unia lu Pedro ante lu yebeella: “Li'ilu nú necalu bene Israel la nehuañilu tucu nú nehuañi beella. ¿Nu xneca niarqui'lu nú ri'ilu juerza bee bene enu laca bee bene Israel nú huañi beella tucu nú nehuañi bee bene Israel?” 15Li'iru necaru bene Israel desde nú ungularu nu siempre uzucu'ru nú rni ley' Diose nu la nehuañiru xi nehuañi bee bene enu laca bee bene Israel. 16Pero li'iru nediya'ru nú lecati enu la lu'cu dula ante Diose equie nú sucu'lla ley cua' sino que lunú nzeli arqui' bene Jesucristo, enze'e le'ca nuuru nzelila arqui'ru Jesucristo para nú la lu'curu dula lunu, nu la necane equie nú rri'iru nú rnibiya' ley, xne lecati enu la lu'cu dula lu Diose equie nú nzenalatsia nze'e ley cua'. 17Neequie tunu li'iru rla'naru nú la lu'curu dula lu Diose equie cuenda' Jesucristo, nu tunu le'ca nuuru necaru bene enu rlu'cu dula, ¿xie' nú másela rri'i Jesucristo nú rlu'curu dula che la? Li'iru nediya' nze'ca'ru nú lacane esquie, 18xne tunu utsana arquilá ley' Moises, nu chequie zucu zeca nú rni ley cua' stucu bese, che le'catsia li'á rri'á nú necaa bene enu rlu'cu dula. 19Enze'e neca xi neca nú ungutilá equie cuenda' ley para nú huañia para Diose. 20Nu nee neca xi neca nú le'ca ungutia chenu unguti Jesucristo lu cruse nu nee la nehuañia'a lu cuenda' li'itsia sino que Jesucristo neca enu nehuañi cuna li'á nee. Nu nee nehuañia lunú nzeli arquia lli'ñi Diose enu chiqui' seca li'á nu unguti equie cuenda' li'á. 21Nu la luachua eluseca' Diose xne tunu nu' modo nú la lu'cu bene dula ante Diose equie nú sucu' bene ley' Moisés, lecaxi sibi' nú unguti Jesucristo lu cruse che.

will be added

X\